YOBA 42
42
1Dai hpang, Yoba gaw dai Madu hpe htan wu ai.
Yoba
2 Madu e, nang gaw daru magam n-gun yawng hte hpring ai wa rai nna;
nang ra ai lam magup hpe nang galaw lu nga ndai gaw ngai chye nngai.
3Ngai grai angawk angak nga nngai shaloi na a hpaji byeng-ya ga
hpe ngai kaning rai san gwi na gaw nang san nga ndai.
Ngai n chye na hkraw ai lam ni hte nye a matu
chye na na nau galu kaba ai mauhpa lam ni hpe ngai tsun hkrup se ai. #Yob 38:2.
4Nang ga tsun ai shaloi madat na matu hte
na a ga san ni hpe htai shakut na matu nang tsun nit dai. #Yob 38:3.
5Lai sai aten hta, kaga ni ngai hpe tsun ai ga hpe sha ngai chye nngai;
rai ti mung ya chyawm gaw ngai nang hpe nye a myi hte chyaw mu sade ai.
6Dai rai nna, ngai tsun kau sai lam yawng mayawng a majaw kaya hkrum nga nngai;
shing rai ga nhpu hte wan dap hte bun nna myit malai lu nngai.
Ga Hpungdim
7Dai Madu gaw Yoba hpe ga shaga ngut jang, shi gaw Elihpaza hpe, “Nye a lam hte seng nna nye a shangun ma Yoba zawn teng man ai ga nang n tsun ndai majaw, nang hte na a manang lahkawng yan hpe pawt bu nngai. 8Ya, usu sanit hte sagu la sanit Yoba hpang de la sa nna, dai ni hpe nanhte a matu shagu hkungga shatai let nawng ya mu. Shaloi, Yoba gaw nanhte a matu akyu hpyi ya na ra ai; ngai mung shi a akyu hpyi ga hpe htan ya na nngai; nanhte hkam la ging ai ari hte maren ngai kaya n jahkrum na nngai. Nanhte gaw shi galaw ai zawn nye a lam hpe teng man ai hku n tsun nga myit dai,” ngu nna tsun wu ai.
9Elihpaza, Bildad, hte Zohpa hte gaw dai Madu shanhte hpe tsun ai hte maren galaw ma ai rai nna, Yoba a akyu hpyi ga ni hpe dai Madu htan ya wu ai.
10Yoba gaw shi a manang marai masum a matu akyu hpyi ngut jang, dai Madu gaw shi shawng e lu malu mahkra hta htam lahkawng bai jat ya let shi hpe bai ngamu ngamai shangun wu ai. #Yob 1:1-3. 11Yoba a kahpu kanau ni, kajan ni hte shawng de na manang ni yawng shi kaw sa chyai nhtawm shi hte rau shi a nta e rau lu rau sha nga ma ai. Shanhte gaw dai Madu shi hpe hkrum shangun ai ru yak tsin-yam tsindam mahkra a majaw, shanhte matsan yu dum ai lam tsun nna shi hpe shalan shabran ma ai. Shanhte langai hte langai mung shi hpe gumhpraw hte ja lachyawp langai ngai jaw ma ai.
12Dai Madu gaw shawng na lang shi shaman ya ai hta grau nna law hkra pyi Yoba a asak hkrun lam a hpang jahtum daw hta shaman ya nga ai. Yoba gaw sagu mun mi hkying mali, gawla-uk hkying kru, dumsu hkying mali hte lawze hkying mi madu da nga ai. 13Shi gaw shadang sha sanit hte shayi sha masum hte a kawa rai nga sai. 14Shi gaw kaba htum shayi sha hpe Yemima, lahkawng ngu na hpe Kesia, hte hpang jahtum kaji htum wa hpe Keren Hapuk ngu nna shamying wu ai. 15Mungkan ting hta Yoba a shayi sha ni daram hpraw tsawm ai numsha ni n nga nga ai. Shanhte a kawa mung shanhte a kahpu kanau ni hte maren sali wunli garan ya wu ai.
16Ya ndai amu byin ai hpang, Yoba gaw asak latsa e mali shi ning du hkra hkrung nga nhtawm shi a kashu kasha ni hte shu mashi shu masha ni hpe mu kau da wu ai. 17Dai hpang shi gaw grai dingla ugut gu nna si mat wa sai.
Currently Selected:
YOBA 42: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.