YAWHAN 6
6
Masha Hkying Manga Hpe Muk Daw Ai
(Mat 14:13-21; Mrk 6:30-44; Luk 9:10-17)
1Dai hpang Yesu gaw Tiberi ngu ai Galile nawng wora hkran de rap sa wa ai. 2Machyi makaw hkrum ai ni hta, shi galaw dan ai lamik kumla ni hpe shanhte mu ma ai majaw, masha wunawng kaba shi kaw hkan nang ma ai. 3Shaloi Yesu gaw kawng langai mi a ntsa de lung wa nna, shi a sape ni hte rau dung nga ai. 4Ya, Yuda masha ni a Shalai wa ai Poi du na ni wa sai. 5Yesu gaw mada yu nna, masha wunawng kaba shi kaw sa wa ai hpe mu wu ai rai nna, shi gaw, Hpilip hpe, “Ndai ni sha na lu sha law hkra anhte kanang na mari la lu na ga ta?,” ngu nna san wu ai. 6(Shing nga san ai gaw, Hpilip hpe chyam yu na nga nna rai nga ai, hpa majaw nga yang, kaja wa kaning di na gaw, shi dai chye da wu ai.)
7Hpilip gaw, “Gumhpraw ni tsa a matu mari ti mung, masha hkum shagu kachyi mi hpra sha na pyi law na n rai,” ngu nna htan wu ai.
8Shaloi shi a sape ni hta na Simun Petru a kanau Andre gaw, 9“Nang e, muk yaw muk tawng manga hte nga lahkawng lu ai lasha ma langai mi nga nga ai. Rai ti mung, nde wa law ai masha ni a matu gaw kanang dang law na rai ta?,” ngu nna tsun dan wu ai.
10Yesu gaw, “Masha ni hpe dung nga shangun mu,” ngu nna shanhte hpe tsun mu ai. (Dai yang e tsingdu mung htat nga ai) Shanhte yawng dung ma ai rai nna lasha hkrai hkying manga daram rai nga ma ai.’ 11Shaloi Yesu gaw dai muk tawng ni hpe la nna Karai Kasang kaw chyeju shakawn nhtawm, dung nga ai ni hpe karan jaw mu ai; dai hte maren nga hpe mung shanhte ra ai made karan jaw mu ai. 12Shanhte sha hkru ma jang, shi gaw, “Hpa mung n lahpawt mat u ga, ngam ai ahkyep alep ni hpe hkan hta la mu,” ngu nna sape ni hpe tsun mu ai. 13Dai rai nna shanhte hkan hta la ma yang, dai muk yaw tawng manga hta na sha ai ni ngam ai ahkyep alep, ka shi lahkawng hpring tup lu la ma ai.
14Ndai zawn Madu Yesu madun ai lamik kumla hpe mu ma yang, masha ni gaw, “Kaja wa teng teng ndai wa gaw mungkan ga de du sa na ra ai dai myihtoi wa rai nga ai,” nga ma ai. 15Yesu gaw masha ni shi hpe adip arip di rim la nna Hkawhkam shatai na maw nga ma ai hpe chye wu ai majaw, shi hkrai sha dai kawng de mayun lung mat wa ai.
Yesu Hka Ntsa E Lam Hkawm Ai
(Mat 14:22-33; Mrk 6:45-52)
16Shana de du jang shi a sape ni gaw nawng de yu wa ma ai. 17Bai, li jawn nhtawm nawng wora hkran na Kaperna-um mare de rap sa wa ma ai. Ya nsin sin wa ti mung Yesu gaw shanhte kaw garai n du wa ai. 18Dai ten hta nbung laru kaba ru hkrat wa nna nawng e hkaleng ni hta nga ai. 19Dai sape ni gaw mai masum mali (Kilometres 5-6) daram shap sa wa sayang, Yesu gaw hka ntsa e hkawm let li makau de du hkra sa wa ai hpe, shanhte hkap mu nna, hkrit kajawng nga ma ai. 20Yesu gaw, “Hkum hkrit myit, ngai she rai nngai!,” ngu mu ai. 21Dai shaloi shanhte gaw, kabu gara let shi hpe hka li hta hkap shalun la mu ai. Dai li mung dai shaloi jang, shanhte du mayu ai danam de du wa ma ai.
Masha Ni Madu Yesu Hpe Tam Ai
22Hpang shani e, nawng wora hkran e tsap nga mala ai shawa masha ni gaw, dai yang e li langai sha nga ai hpe dum ma ai. Dai li hta Madu n jawn lawm mat wa ai, sape ni hkrai sha shang ma ai hpe dum chye ma ai. 23Rai ti mung Tiberi Mare na sa ai li ni gaw Yesu Karai Kasang a chyeju hpe shakawn nna shawa masha ni hpe muk daw jaw ai shara de du sa wa ma ai. 24Shawa masha ni gaw, dai kaw e Yesu mung, sape ni mung n nga masai hpe chye mu yang, shanhte ni mung dai li hta jawn nna Madu Yesu hpe tam na matu Kaperna-um mare de du ma ai.
Yesu Gaw Asak Muk Rai Nga Ai
25Shing rai dai nawng wora hkran e Yesu hpe mu mu yang, shanhte gaw, “Sara e nang nang de galoi me du nit ta?,” ngu nna san mu ai.
26Yesu gaw, “Ngai nanhte hpe kaja wa teng teng tsun made ga, nanhte ngai hpe tam ai lam gaw, ngai madun ai lamik kumla ni a sung ai lachyum hpe chye na myit hkawn ai majaw n rai, muk lu sha nna hkru kat ai majaw sha tam ai rai nga myit dai. 27Hten bya yat mat chye ai lusha a matu hkum shaja myit, de a malai htani htana asak lu la shangun ai n hten n yat lu ai lusha a matu she shaja mu. Dai gaw dai Masha Kasha nanhte hpe jaw na ra ai lusha rai nga ai, hpa majaw nga yang, dai wa gaw Karai Kasang a myit hkrum masat masa galaw ai lam lu la ai wa rai nga ai,” ngu nna htan mu ai.#Yhn 1:33; Mat 3:17; Luk 3:22; Kas 2:22; Ehp 1:13; 4:30; 2Pe 1:17.
28Dai majaw shanhte gaw, “Karai Kasang anhte hpe galaw shangun mayu ai lam galaw lu na matu, anhte kaning rai galaw na rai ta?,” ngu nna shi hpe san mu ai.
29Yesu gaw, “Karai Kasang a myit ra ai lam ngu ai gaw, shi shangun dat ai wa hpe kam sham ai lam, ngu ai rai nga ai,” ngu nna shanhte hpe htan mu ai.
30Shanhte gaw, “Anhte mu lu nna kam sham na matu nang hpa lamik kumla madun na n ta? Nang hpa magam bungli galaw na n ta? 31Chyum laika hta Madu gaw, ‘Shanhte sha na matu sumsing lamu de nna muk jahkrat jaw mu,’ nga nna ka da nga ai hte maren, anhte a Jiwa ni gaw nam mali hkan e manna muk lu sha ma ai,” ngu nna shi hpe tsun mu ai.#Pru 16:15; Shk 78:24-25. 32Shaloi Yesu gaw, “Ngai nanhte hpe kaja wa teng teng tsun made ga, nanhte hpe sumsing lamu de na muk jaw ai gaw Mawshe n rai, Nye Wa she sumsing lamu de na teng man ai muk nanhte hpe jaw myit dai. 33Hpa majaw nga yang, Karai Kasang jaw ai muk ngu ai gaw, sumsing lamu na yu wa nna mungkan ga hpe asak jaw ai wa hpe ngu ai rai nga ai,” ngu nna shanhte hpe tsun mu ai.
34Dai rai nna shanhte gaw, “Madu e, muk dai anhte hpe galoi mung ajaw nga mi,” ngu mu ai.
35Yesu gaw, “Asak muk gaw ngai rai nga nngai, ngai hpang de sa ai wa gaw kawsi hkrum na n rai, ngai hpe kam sham ai wa mung, galoi mung hpang gara hkrum na n rai. 36Rai ti mung, nanhte gaw ngai hpe mu da ninglen n kam myit dai, ngu nna ngai nanhte hpe tsun ma sade ai. 37Nye Wa ngai hpe ap ya ai yawng mayawng hte gaw ngai hpang de du na mara ai, Ngai hpang de du sa ai wa hpe mung, kaja wa ngai n kanawng kau na nngai. 38Hpa majaw nga yang, sumsing lamu nna ngai yu sa ai gaw, nye a myit ra ai hku hkan galaw na matu yu sa nngai n rai; ngai hpe shangun dat ai wa a myit ra ai hku hkan galaw na she, yu sa ai rai nngai. 39Ngai hpe shangun dat ai wa a myit ra ai lam gaw, shi ngai hpe ap ya da sai yawng mayawng hte hta na langai mi mung n yet n mat ai sha, hpang jahtum na nhtoi hta si ai kaw na jahkrung sharawt la na lam nan rai nga ai. 40Hpa majaw nga yang, nye Wa a myit ra ai lam gaw, Kasha wa hpe mu nna kam sham ai ni yawng mayawng htani htana asak lu la shangun na lam rai nga ai. Ngai mung hpang jahtum na nhtoi hta shanhte hpe ngai sharawt la na mawe ai,” ngu nna shanhte hpe tsun mu ai.
41Yesu shi nan, “Ngai gaw sumsing lamu de nna yu wa ai muk rai nngai,” nga nna tsun ai majaw, Yuda masha ni shi a lam aput angun nga ma ai. 42Dai rai nna shanhte gaw, “Ndai wa gaw Yosep a kasha Yesu n rai nga a ni? Shi a kanu yan kawa hpe anhte chye gaw ai n rai ni? Dai re ai mi, ya shi, ‘Ngai gaw sumsing lamu de nna yu wa nngai,’ nga nna kaning rai tsun lu a ta?,” nga ma ai.
43Shaloi Yesu gaw, “Nanhte shada da hkum tsun angun nga myit, 44ngai hpe shangun dat ai nye Wa e shi hpe ngai hpang de lau la ai wa sha n rai yang gaw, kadai mung ngai hpang de sa lu na n rai, du sa ai wa hpe mung, hpang jahtum na nhtoi hta ngai sharawt la na we ai. 45Myihtoi laika ni hta, ‘Masha shagu gaw Karai Kasang a sharin achyin ai lu la na mara ai,’ ngu nna ka da nga ai. Dai rai nna, nye Wa tsun ai ga hpe na la nna shi kaw na sharin achyin hkam la ai wa kadai mung ngai hpang de du sa ai.#Esa 54:13. 46Shing nga ai rai ti mung, shinggyim masha langai ngai nye Wa hpe mu yu sai ngu nna tsun mayu ai n rai. Karai Kasang kaw nna du sa ai wa shi langai chyu sha Wa hpe mu yu nu ai. 47Nanhte hpe ngai kaja wa teng teng tsun made ga, kam sham ai wa gaw htani htana asak lu la lu ai. 48Ngai gaw asak muk rai nga nngai. 49Nanhte a nji nwa ni gaw nam mali hkan e Manna muk sha nna si wa masai. 50Rai ti mung ya ndai muk gaw sumsing lamu de nna yu wa ai muk rai nna, dai hpe sha ai wa kadai mung si lu na n rai. 51Ngai gaw sumsing lamu de nna yu wa ai, hkrung ai muk rai nga nngai, muk ndai hpe sha ai wa kadai mung, htani htana ahkrung nga na ra ai. Ngai jaw na muk gaw mungkan ga na masha ni asak hkrung nga lu na matu ngai jaw ai nye a ashan rai nga li ai,” ngu nna shanhte hpe htan mu ai.
52Dai shaloi Yuda masha ni gaw, “Ndai wa kaning di nna anhte hpe shi a ashan jaw sha lu na a ta?,” nga nna shanhte kata e pawt let tsun dangrang, san hkat nga ma ai.
53Yesu gaw, “Ngai nanhte hpe kaja wa teng teng tsun made ga, Masha Kasha a ashan nanhte n sha, shi a asai hpe mung n lu myit yang gaw, nanhte hta asak n rawng lu ai. 54Nye a ashan sha nna, nye a asai lu ai wa kadai mung, htani htana asak lu la nu ai. Ngai mung dai wa hpe hpang jahtum na nhtoi hta sharawt la na we ai. 55Hpa majaw nga yang, nye a shan gaw teng man ai shahpa majing rai li ai, nye a asai mung teng man ai luhpa rai li ai. 56Nye a ashan sha nna, nye a asai lu ai wa kadai mung ngai hta rawng nga ai rai nna, ngai mung dai wa hta rawng nga nngai. 57Ahkrung nga ai nye Wa gaw, ngai hpe shangun dat ai rai nna, ngai gaw Wa a majaw hkrung nga nngai. Dai hte maren, ngai hpe sha ai wa mung, nye a majaw hkrung nga na ra ai. 58Da ndai gaw, sumsing lamu de nna yu wa ai muk rai nga ai; nji nwa ni sha nna si wa ai muk zawn n rai nga ai. Ndai muk sha ai wa gaw, htani htana asak hkrung nga na ra ai,” ngu nna shanhte hpe tsun mu ai.
59Ndai gaw Kaperna-um mare na tara jawng hta, shi sharin shaga nga yang tsun ai ga rai lu ai.
Htani Htana Asak Hte Seng Nna Sharin Shaga Ai Ga Ni
60Dai re ai majaw shi a sape ni law law wa dai ga na jang, “Ndai sharin shaga ai ga gaw yak la nga ai rai nna, kadai wa dai hpe madat lu na i?,” nga ma ai.
61Ndai zawn sape ni angun nga ma ai hpe shi dai shi myit hta chye wu ai majaw, shi shanhte hpe, “Ga ndai gaw nanhte hpe myit hten asum hkam mayu shangun wa sani? 62Dai Masha Kasha gaw mi shawng de shi nga ai shara de bai lung wa ai hpe nanhte mu myit yang gaw, kaning nga na myit ta? 63Asak jahkrung ya ai gaw Karai Kasang a Wenyi rai nga ai; masha a n-gun atsam gaw hpa lam n la nga ai. Ngai nanhte hpe tsun ai ga ni gaw Karai Kasang a asak jaw ya ai Wenyi rai nga ai. 64Rai ti mung nanhte hta na nkau mi gaw n kam n sham myit dai,” ngu mu ai. (Hpa majaw nga yang, Yesu gaw, kadai ni n kam n sham ma ai hpe mung, shi hpe ap kau na wa kadai re ai mung shawng kaw nna chye da wu ai. 65Dai rai nna shi gaw, “Ndai lam a majaw nan, nye Wa a ahkang hte sha n rai yang gaw, kadai mung ngai hpang de n du n sa lu ai, ngu nna ngai nanhte hpe tsun masa de ai,” ngu mu ai.
66Ndai lam a majaw, shi a sape ni law law wa nhtang mat wa nna shi kaw galoi mung bai n hkan nang mat masai. 67Dai rai nna Yesu gaw shi a sape shi lahkawng hte hpe, “Nanhte mung wa mat mayu myit ni?,” ngu nna san mu ai.
68Shaloi Simun Petru gaw, “Madu e, anhte kadai hpang de wa na rai nga a ta? Nang gaw htani htana asak jaw ya ai mungga lu ndai. 69Nang gaw Karai Kasang kaw na du sa ai chyoi pra ai Wa rai nga ndai hpe anhte kam sham ai hte chye lu saga ai,” ngu nna shi hpe htan wu ai.
70Bai Yesu gaw, “Nanhte shi lahkawng hpe ngai lata la masa de ai n rai ni? Rai ti mung, nanhte hta na langai mi gaw nat matse rai nga ai,” ngu nna shanhte hpe htan mu ai. 71Shing nga tsun ai gaw, Simun Iskarut a kasha Yuda hpe sha-ang nna tsun ai rai nga ai, hpa majaw nga yang, dai wa gaw sape shi lahkawng hta na langai mi rai nga ai, rai ti mung shi hpe ap kau na maw ai wa rai nga ai.
Currently Selected:
YAWHAN 6: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.