YAWHAN 3
3
Yesu Hte Nikodi A Lam
1Hparishe hpung hta lawm ai Nikodi mying ai Yuda amyu masha ningbaw ningla langai mi nga ai. 2Dai wa gaw shana e Yesu kaw sa nna, “Rabai e, nang gaw Karai Kasang e shangun dat ai sara langai mi rai nga ndai hpe anhte chye ga ai. Nang dan ai lamik kumla ni gaw, Karai Kasang n lawm yang gaw kadai mung n galaw lu ai,” ngu nna shi hpe tsun wu ai.
3Yesu gaw, “Ngai nang hpe kaja wa teng teng tsun de ga, ntsa de nna n shangai ai masha gaw, Karai Kasang a Mungdan mu lu na n rai,” ngu nna shi hpe htan wu ai.
4Nikodi gaw, “Asak kaba sai masha langai mi gaw kaning rai bai shangai lu na a ta? Kanu a hkritung de bai shang nna shangai lu na a ni?,” ngu nna san wu ai.
5Yesu gaw, “Ngai nang hpe kaja wa teng teng tsun de ga, hka hte Wenyi e n shangai ai masha gaw, Karai Kasang a Mungdan hta shang lu na n rai. 6Hkum shan hte shangai ai masha langai mi gaw, hkum shan rai nga ai; Wenyi hte shangai ai wa gaw Wenyi rai nga ai. 7Nanhte yawng ntsa de nna shangai lu na myit dai ngu nna ngai tsun ai hpe hkum mau et. 8Nbung gaw bung wa mayu ai de bung wa nna, gade rai wa ai gaw, nang n chye dat ndai; dai hte maren, Wenyi e shangai ai masha shagu mung shing rai nga ai,” ngu nna htan wu ai.
9Shaloi Nikodi gaw, “Dai gaw kaning rai byin lu na a ta?,” ngu nna bai san wu ai.
10Yesu gaw, “Nang gaw Israela masha ni hta sara kaba langai wa mi ting rai da nhtawm, ndai lam nang n chye n ni? 11Ngai nang hpe kaja wa teng teng tsun de ga, anhte gaw tinang chye ai lam hpe tsun ga ai, rai ti mung nanhte langai mi mung anhte a sakse ga hpe n hkap la myit dai. 12Dinghta ga hte seng ai lam sha ngai tsun yang pyi nanhte n kam lu myit yang gaw, sumsing lamu hte seng ai lam wa, ngai tsun made yang gaw, kaning rai kam lu na myit ta? 13Sumsing lamu de na yu hkrat wa ai Masha Kasha hta kaga kadai mung sumsing lamu de lung wa yu ai n rai.”#Yhn 6:33,38; Kas 2:34; 1Ko 15:47; Ehp 4:9-10.
14Mawshe gaw nam mali e magri mang lapu hpe sharawt da ai zawn, 15Masha Kasha hta kam sham ai ni nlang hte gaw, htani htana asak lu la hkra, Masha Kasha mung sharawt da ai hkrum na ra ai. 16Kaning rai nme law, Karai Kasang a Kasha hpe kam sham ai ni nlang hte gaw, hten bya n hkrum ai sha htani htana asak lu la mu ga nga, Karai Kasang gaw shi a kasha shingtai hpe jaw kau ai kaw du hkra mungkan ga hpe grai tsaw ra wu ai. 17Karai Kasang gaw shi a Kasha hpe mungkan ga de shangun dat ai gaw, mungkan masha ni hpe tara dara na matu n rai, shi a marang e hkye hkrang la ai hkrum na she, shangun dat wu ai.
18Shi hpe kam sham ai wa kadai mung tara dara ai n hkrum lu ai, n kam n sham ai wa chyawm gaw Karai Kasang a Kasha shingtai hpe n kam n sham ai majaw, ya e pyi tara dara ai hkrum nga ai. 19Tara dara ai masa lam ndai hku rai nga ai; nhtoi gaw ndai mungkan ga de du sa sai, rai ti mung masha ni a arawn alai n shawp nga malu ai majaw, shanhte gaw nsin hpe nhtoi hta grau tsaw ma ai. Dai gaw tara dara hkrum ai lam nan rai nga ai. 20Hpa majaw nga yang, n shawp n kap ai amu ni hpe galaw ai wa kadai mung, nhtoi hpe n dawng n wawm nga ai rai nna, tinang a n hkru n shawp ai amu ni dan dawng mat na tsang ai majaw, nhtoi de n sit wa ma ai. 21Rai ti mung teng man ai lam hkan galaw ai kadai mung, tinang galaw ai amu gaw Karai Kasang a myit ra ai lam hte maren madat mara ai lam rai nga ai hpe dan leng shangun u ga, dai nhtoi de sit wa ai, ngu nna shi hpe htan wu ai.
Madu Yesu Hte Yawhan
22Dai hpang Yesu gaw shi a sape ni hte rau Yuda mung hkan e du hkawm ma ai rai nna, dai yang e shanhte hte rau hkring nga nna hkalup jaw wu ai. 23Yawhan mung Salim hte nau wa n tsan ai Enun ngu ai shara e hka n taw ntsang nga nga ai majaw, dai yang e hkalup jaw let nga nga ai. Masha ni mung Yawhan kaw sa nna hkalup hkam la shajang ma ai. 24(Dai ten hta Yawhan gaw htawng hta jahkrat bang kau ai garai n hkrum wu ai.) #Mat 14:3.
25Yawhan a sape nkau mi gaw, nawku htung lai hku kashin kamun ai hte jasan jaseng ai lam hte seng nna Yuda masha langai mi hte ndang kalang hkat ma ai. 26Dai rai nna shanhte gaw Yawhan hpang de sa nhtawm, “Rabai e, Yawdan hka sinpraw hkran maga e nang hte rau nga yu ai, nang sakse hkam ya ai wa hpe nang dum ai n rai i? Rai sa, ya shi hkalup jaw nga ai rai nna, yawng mayawng shi hpang de du sa ma ai!,” ngu nna shi hpe tsun dan mu ai.
27Shaloi Yawhan gaw, “Karai Kasang kaw na jaw ai sha n rai yang gaw masha gaw hpa amu lit hpe mung hkam la lu ai n rai. #1Ko 4:7; Heb 5:4; Yak 1:17. 28‘Ngai gaw Meshia n rai nngai, shi a shawng e shangun dat hkrum ai wa she rai nngai,’ ngu nna ngai tsun ni ai gaw nanhte nan nye a sakse ni rai nga myit dai.#Yhn 1:20; Mal 3:1; Mrk 1:2; Luk 1:17. 29Num nnan lu ai wa gaw la nnan rai nga ai; rai ti mung la nnan a makau e tsap nga nna, shi a ga madat la nga ai, la nnan wa a jinghku wa gaw, la nnan a nsen na la yang, ja ja kabu nga ai. 30Shi gaw jat wa na ra ai, ngai chyawm gaw yawm wa na rai nga nngai,” nga ai.
Sumsing Lamu Kaw Na Du Sa Ai Wa
31Ntsa de nna du sa ai wa gaw, yawng hta grau kaba ai wa rai nga ai. Dinghta ga na rai nga ai wa gaw dinghta ga hte seng nga ai rai nna, dinghta ga a lam sha chye tsun nga ai, rai ti mung sumsing lamu de nna du sa ai wa chyawm gaw yawng mayawng a ntsa na rai nga ai. 32Shi gaw, shi mu la, na la sai lam ni hpe sakse hkam nga ai; rai ti mung shi hkaw tsun sakse hkam ai ga hpe kadai mung n hkap la ma ai.#Rom 3:4; 1Yh 5:10. 33Shi a sakse lam hpe hkap la ai wa chyawm gaw, Karai Kasang gaw teng man nga ai, nga nna shagrin ya nga ai. 34Karai Kasang e shangun dat ai wa gaw Karai Kasang a mungga ni hpe tsun nga ai, hpa majaw nga yang, Karai Kasang gaw shi shangun dat ai wa hpe hkum tsup re ai Wenyi jaw wu ai.#Yhn 1:16; 7:16. 35Kawa gaw Kasha hpe tsaw ra wu ai rai nna ahkang aya yawng mayawng shi a lata hta ap ya nu ai.#Mat 11:27; Luk 10:22; Heb 2:8. 36Kasha wa hpe kam sham ai wa gaw htani htana asak lu la wu ai; Kasha wa a ga hpe n madat ai wa chyawm gaw, asak hkrung ai lam lu la na wu ai n rai; Karai Kasang a sindawng kahtet ai ari hkrum sha na ra ai.
Currently Selected:
YAWHAN 3: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.