TARA AGYI 3
3
Mungdan Kata Hta Naw Ngam Nga Ai Amyu Baw Ni
1Dai rai nna, Hkanan mung na majan ni hta n shang lawm yu ai Israela amyu masha ni hpe chyawm gaw chyam yu na nga, dai mungdan hta nga ai masha amyu baw nkau mi hpe dai Madu shangam da wu ai. 2Shawng de galoi mung majan amu hta laksan n hkrum kadup yu ai majaw mung, Israela amyu masha ni majan a lam ban hte ban sharin hkam la lu na matu mung, ndai amu hpe shi galaw wu ai. 3Dai mung hta ngam nga ai ni gaw Hpilisti mare manga hte hte, Hkanani amyu ni yawng, Sidon masha ni, bai Bela Hermon Bum kaw nna Hamat mare uhkan du hkra nga ai Lebanon Bum hkan na Hiwi masha ni rai nga ai. 4Mawshe hku nna shanhte a kaji kawa ni hpe dai Madu hkang da nu ai ga ni hpe Israela masha ni hkan sa, n hkan sa chye lu hkra nga, Israela hpe chyam yu na matu shanhte ngam da ai hkrum nga ma ai. 5Dai rai nna Israela amyu masha ni gaw Hkanani, Hiti, Amori, Perizi, Hiwi hte Yebusi amyu ni hte rau nga nga ma ai. 6Shanhte gaw dai ni hte num jaw num ya hkat ai hte dinghku rawn sha nhtawm, dai ni a hpara ni hpe nawku nga ma ai.
Otniela
7Israela amyu masha ni gaw dai Madu shanhte a Karai Kasang hpe yubak galaw shut kau nhtawm malap kau manu ai rai nna Bala hte Ashera hpara sumla ni hpe nawku nga ma ai. 8Dai Madu gaw Israela ni hpe pawt sindawng wu ai rai nna Mesopotamia Hkawhkam Hkushan Rishahtim a lata de shanhte hpe ap ya ma ai; Shi gaw shanhte hpe matsat ning tup up hkang lai wa nu ai. 9Dai hpang Israela amyu masha ni mahtang dai Madu hpe jahtau ma ai rai nna shanhte hpe shalawt dat na masha langai shangun dat ya wu ai. Dai wa gaw Hkaleb a kanau Kena a kasha Otniela rai nga ai. 10Dai Madu a wenyi mung shi a ntsa e dung nga ai rai nna shi gaw Israela a ningbaw tai wa nga sai. Otniela majan rawt wu yang, dai Madu gaw Mesopotamia hkawhkam hpe gasat dang kau lu ai awng padang shi hpe jaw wu ai. 11Dai mung hta shaning mali shi ning tup ngwi pyaw sim sa nga ai, dai hpang Otniela si mat sai.
Ehud
12Israela amyu masha ni gaw dai Madu hpe yubak galaw shut kau manu ai. Dai lam a majaw dai Madu gaw Moba Hkawhkam Eglon hpe Israela ni hta grau n-gun shaja ya wu ai. 13Eglon gaw Amon hte Amalek masha ni hte matut la nhtawm, namhtan hpun mare ngu ai Yerihko mare hpe gasat nna Israela hpe dang kau ma ai. 14Israela amyu masha ni gaw Eglon a up hkang ai npu hta shi matsat ning tup rawng nga ma ai.
15Dai hpang Israela amyu masha ni dai Madu hpe hpyi jahtau ma ai rai nna shanhte hpe shalawt dat na masha shangun dat ya wu ai. Dai wa gaw Benyamin amyu bawsang hta na Gera a kasha, lata lapai ai Ehud rai nga ai. Shaloi Israela amyu masha ni mung Ehud hpe Moba Hkawhkam Eglon hpang de shi a matu kumhpaw kumhpa ni hte hpawn shangun dat mu ai. 16Ehud gaw shi a matu dawng mi galu nna nshan lahkawng maga dai ai nhtu galaw nhtawm, hkra maga na shi a hpun palawng kata hta bang da wu ai. 17Dai hpang grai hpum ai Eglon hpang de kumhpaw kumhpa ni la sa ya wu ai. 18Ehud gaw shi hpe kumhpaw kumhpa sak jaw ngut jang, kumhpaw kumhpa gun sa ai ni hpe nta de nhtang wa na lam shanhte hpe tsun wu ai. 19Rai ti mung, Ehud shi nan chyawm gaw Gilgala makau na nlung tawk ai shara du ai shaloi, Eglon hpang de nhtang sa nhtawm, “Madu hkawhkam wa e, nang hpe lagyim tsun na ga lu nngai,” ngu nna tsun wu ai.
Dai rai nna, hkawhkam wa gaw shi a shangun ma ni hpe, “Nanhte naw pru mat wa masit!,” ngu wu yang shanhte yawng pru mat wa ma ai.
20Dai hpang hkawhkam wa shi chyu nga nga re ai ntsa htap na katsi pyaw ai gawk hta dung nga yang, Ehud gaw shi kaw sit sa nna, “Na a matu Karai Kasang kaw na ga ngai lu nngai,” ngu nna tsun wu ai. Shaloi hkawhkam wa rawt tsap wa wu yang, 21Ehud mung shi a pai lata hte hkra maga de bang da ai nhtu shaw la nhtawm hkawhkam wa a kan galun baw ya wu ai. 22Nhtu dai mung nhku lawm hkra shang mat wa nna nhtu dai hpe sau e galup tawn nga ai. Shi a kan na n shaw la sai majaw shingdu de hkrang mat hkra rai nga ai. 23Shaloi Ehud gaw shinggan de pru mat wa nhtawm chyinghka ni hpe la nna htinggrang kau da wu ai hte 24shi pru mat wa wu ai. Shi a shangun ma ni gaw chyinghka ni htinggrang nga la ai hpe wa mu ma ai; rai ti mung, hkawhkam wa gawk kata e kan sa nga sam ai, nga nna shanhte myit nawn la ma ai. 25Shanhte myit nawn ai hku zawn nawn nna jin hkra la yu ma ti mung shi chyinghka n hpaw ya wu ai majaw zaw la nna hpaw yu mu yang, shanhte a madu gaw dun ntsa e si taw nga ai.
26Shanhte naw la nga ai laman, Ehud mahtang hprawng lawt mat wa nhtawm, tawk ai nlung shadaw lai kau da nna Seira de du mat wa wu ai. 27Shi gaw dai yang na Ehprim bum ga de du wa yang, hpyen majan rawt na Israela amyu masha ni hpe shaga dat na nga, pahke dum dat wu ai. Dai hpang shi gaw shanhte hpe bum ga kaw na woi yu wa wu ai. 28Shi gaw shanhte hpe, “Nye a hpang hkan nang marit! Dai Madu gaw nanhte a gumlau hpyen rai nga ai Moba masha ni hpe gasat dang kau na awng padang nanhte hpe jaw manit dai,” ngu nna tsun wu ai. Shanhte mung Ehud kaw hkan nang yu wa nhtawm Moba masha ni Yawdan hka rap ai uhkan shara hpe hkap madu la ma ai. Shanhte gaw langai mi hpe mung n rap di shangun nga ma ai. 29Shanhte gaw dai shani e kaja htum ai Moba hpyenla mun mi daram hpe sat kau ma ai; shanhte hta na kadai mung hprawng lawt lu ma ai n rai. 30Israela amyu masha ni gaw dai shani e Moba masha ni hpe gasat dang kau ma ai rai nna, matsat shi ning tup mungdan hta ngwi pyaw sim sa mat nga ai.
Shamga
31Hpang na ningbaw wa gaw Anat a kasha Shamga rai nga ai. Shi mung Hpilisti masha marai kru tsa hpe majawn hte sat kau nna Israela masha ni hpe hkye la wu ai.
Currently Selected:
TARA AGYI 3: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.