HOSEA 2
2
1Dai rai nna na a kahpu kanau Israela masha ni hpe, “Karai Kasang a amyu masha ni” hte “Madu e tsaw ra la hkrum ai ni,” ngu nna shaga na mara ai.
Sadi N Dung Ai Gome Hte Sadi N Dung Ai Israela
2Nye a ma ni e, nanhte a kanu hpe hpyi nem mu; shi gaw nye a madu jan n rai sanu ai, ngai mung shi a madu wa n rai sangai. Shi a la shaw ai amu hte shawa num galaw ai amu hpe jahkring kau na lam hpyi nem mu. 3Dai amu hpe shi n jahkring ai rai yang, ngai gaw shi a hpun palawng raw kau ya nhtawm shi shangai wa ai shani na zawn singgu krin di da na we ai. Ngai gaw shi hpe hkun hkraw nna akrin ayang re ai lamu ga zawn shatai kau na nngai; shi gaw hpang gara ai hte si mat wa na ra ai. 4-5Ngai gaw shi a ma ni hpe matsan dum ai myit madun na nngai n rai; shanhte gaw kaya n chye ai shawa num a ma ni rai ma ai. Shi hkum nan, “Ngai gaw nye a sumtsaw ni hpang de sa wa na nngai_ shanhte gaw ngai hpe malu masha, ntsin, sagu mun hte lachyit nba, tsanlun sau hte sabyi ntsin jaw ma ai,” nga nna tsun wu ai.
6Dai re ai majaw, ngai gaw shi a lam pat kau lu hkra, ju hpun ni hte shakum kum nhtawm bunghku langai galaw na nngai. 7Shi gaw shi a sumtsaw ni a hpang hkan mat wa na ra ai rai ti mung shanhte hpe hkan dep lu na n rai. Shi gaw shanhte hpe tam na ra ai rai ti mung shanhte hpe mu na ra ai n rai. Dai hpang shi gaw, “Ngai gaw nye a shawng na madu wa hpang de nhtang wa na nngai-dai gaw ya na zawn ngai nga nga ai hta grau kaja nga ai,” ngu nna tsun wu ai.
8Ngai gaw shi hpe nai mam nsi naisi, sabyi ntsin, tsanlun sau, Bala hpara hpe nawku ai hta shi lang ai ja gumhpraw yawng hpe jaw ai wa rai nga nngai hpe shi galoi mung yin la nga ai n rai. 9Dai re ai majaw mam shu la ai aten hta, ngai gaw nye a kumhpa ni rai nga ai nai mam nsi naisi hte sabyi ntsin re ai hpe bai dawm la kau na nngai, shi a bu hpun palawng a matu ngai jaw ai sagu mun hte lachyit nba ni hpe bai la kau ya na nngai. 10Ngai gaw shi a sumtsaw ni a man e shi hpe singgu krin raw sharun da na nngai, kadai mung shi hpe nye a lata kaw nna hkye mawai la lu na n rai. 11Ngai gaw shi a lusha poi yawng ngu na shaning shagu hte shata shagu galaw ai lusha poi ni, Bansa Nhtoi e galaw ai poi ni hte makam masham nawku hpawng ni yawng hpe jahtum kau ya na we ai. 12Ngai gaw shi a sumtsaw ni shanhte hpe daw jau na matu shi hpe jaw da ai re nga nna shi tsun ai sabyi ru ni hte lagum hpun ni hpe jahten kau na we ai. Ngai gaw shi a sabyi sun ni hte namsi namsaw sun ni hpe nam mali shatai kau ya na we ai; nam na matse labye dusat ni shanhte hpe jahten kau na mara ai. 13Ngai gaw shi ngai hpe malap kau nna Bala hpara hpe manam pyaw ai baw nat nawng nna shi hkum hpe ja lung seng ni hte mawn sumli nna shi a sumtsaw ni hpang hkan mat wa ai aten ni a matu ari jaw na nngai.
Shi A Amyu Masha Ni A Matu Dai Madu A Tsaw Ra Myit
14Dai re ai majaw, ngai shi hpe nam mali kata de bai woi shalen shang mat wa nna dai yang e, tsaw ra ai ga tsun let shi hpe bai pyaw shangun na nngai. 15Ngai gaw shi a sabyi sun ni hpe bai jaw nna Tsin-Yam Tsindam Kadit hpe mung myit mada chyinghka shatai na we ai. Shi naw mahkawn nga yang, Egutu mung na pru wa ai shaloi shi galaw ai zawn shi ngai hpe htan ya na ra ai. #Ysh 7:24-26. 16Shaloi shi gaw ngai hpe shi a madu wa ngu nna bai shaga na ra ai; shi gaw ngai hpe shi a Bala #2:16: Bala: Ndai gaw Hkanan masha ni a karai hpe mung tsun ai, kaga ga lachyum langai gaw Madu Wa (Husband) hpe mung tsun ai. ngu nna galoi mung shaga na ra ai n rai. 17Ngai gaw shi hpe Bala a mying hpe galoi mung bai tsun shangun na ni ai n rai.
18Dai aten hta, ngai gaw nam na matse labye dusat ni, ntsa malen u ni hte ga shaka tawn da na nngai; dai ni gaw nye a amyu masha ni hpe zingri na mara ai n rai. Dai mungdan na majan laknak yawng hpe mung, nhtu, ndan yawng hpe mung yeng seng kau na nngai; nye a amyu masha ni hpe ngwi pyaw sim sa ai hte shim lum ai hku nga shangun na nngai.
19Israela e, ngai gaw nang hpe nye a madu jan shatai na nngai;
Ngai gaw teng man ai hte sadi dung nga na nngai;
ngai gaw nang hpe dinggrin tsaw ra myit hte matsan dum ai myit madun nga na nngai
nang hpe nye a matu htani htana shatai da na nngai.
20Ngai gaw nye a ga sadi hpe shatup na nngai, nang hpe nye a matu shatai da na nngai,
nang gaw ngai hpe dai Madu hku yin la na rai ndai.
21-22Dai aten hta ngai gaw nye a amyu masha Israela a akyu hpyi ga ni hpe htan ya na nngai.
Ngai gaw ginding aga ntsa e marang htu shangun ai hte,
ginding aga gaw nai mam nsi naisi, sabyi si hte tsanlun si hpe shapraw ya na ra ai.
23Ngai gaw nye a amyu masha ni hpe ndai lamu ga hta shanu nga shangun nna shanhte hpe ngamu ngamai shangun na nngai.
Ngai gaw “Tsaw ra n hkrum ga ai” ngu tsun hkrum nga ai ni hpe mung,
“Nye a amyu masha ni n re” nga nna tsun hkrum ai ni hpe mung tsaw ra myit madun na we ai.
Ngai gaw, “Nanhte gaw nye a amyu masha ni rai nga myit dai,” ngu nna tsun na we ai,
shanhte gaw, “Nang gaw anhte a Karai Kasang rai nga ndai,” nga nna htan na mara ai.#Rom 9:25; 1Pe 2:10.
Currently Selected:
HOSEA 2: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
