NINGPAWT NINGHPANG 1
JCLB
1
Hpan Da Ai A Maumwi
1Shawng ningpawt e, Karai Kasang gaw ninggawn tawa hpe hpan da yang, 2ginding aga gaw hkrang kata akrin akraw rai nga ai. Yawng mayawng hpe ka-up da ai dai wu kadu ai nammukdara gaw sin mak ai nsin hta rawng nga ai hte Karai Kasang a Wenyi #1:2: Karai Kasang a Wenyi: Dai gaw Karai Kasang a Daru Magam N-gun, shing n rai Karai Kasang kaw na nbung ngu ai re. mung hka hpung ni a ntsa e shamu hkawm nga ai. 3Shaloi Karai Kasang gaw, “Nhtoi tai u ga” ngu yang, nhtoi pru wa nga ai.#2Ko 4:6. 4Karai Kasang mung dai hpe shi mu nna awng sharawng nga ai. Dai hpang shi gaw nhtoi hpe nsin kaw nna ginhka karan kau wu ai, 5shi gaw nhtoi hpe “Shani” nsin hpe “Shana” ngu nna shamying wu ai. Shana gaw lai mat wa nna jahpawt du nga sai, dai gaw langai ya nhtoi rai nga sai.
6-7Dai hpang Karai Kasang gaw, “Hka hpungnung hpe karan nna hka hte hka lahkawng brang karan na matu lamu madin nga u ga,” ngu nna hkang dat wu yang dai mung byin nga sai. Dai rai nna Karai Kasang gaw lamu madin hpe galaw nna madin kata e nga ai hka hte madin ntsa e nga ai hka hpe karan da wu ai.#2Pe 3:5. 8Shi gaw lamu madin hpe “Sumsing lamu” ngu nna shamying wu ai. Shana gaw lai mat wa nna jahpawt du nga sai, dai gaw lahkawng ya nhtoi rai nga sai.
9Dai hpang Karai Kasang gaw, “Lamu kata e nga ai hka hpung ni shara mi hta shinggyin hpawng nga u ga, shaloi hkarang ga dawng pru wa na ra ai,” ngu nna hkang dat wu yang, dai mung byin nga sai. 10Shi gaw dai hkarang ga hpe “Ginding aga,” ngu nna shamying nhtawm shinggyin hpawng nga ai hka hpung ni hpe “Panglai” ngu nna shamying da wu ai. Karai Kasang gaw dai hpe mu nna awng sharawng nga ai. 11Dai hpang shi gaw, “Nsi naisi li rawng ai nai mam ni hte asi si ai namsi namsaw hpun amyu yawng hte hpe aga hta na shapraw ya u ga,” ngu nna hkang dat wu yang, dai mung byin nga sai. 12Dai rai nna aga gaw hpun amyu hkum sumhpa yawng hte hpe shapraw wu ai; Karai Kasang gaw dai hpe mu nna awng sharawng nga ai. 13Shana gaw lai mat wa nna jahpawt du nga sai, dai gaw masum ya nhtoi rai nga sai.
14Dai hpang Karai Kasang gaw, “Shani hte shana hpe karan ginhka na matu mung, shani nhtoi, shaning nhtoi hte du hkra ladaw a aten ladaw langa hpe madun dan na matu mung, lamu ntsa e nhtoi ni dan pru wa mu ga; 15dai ni gaw ginding aga ntsa e nhtoi jaw ya na matu lamu e htoi ya nga na ra ai,” nga nna hkang da wu ai hte dai mung byin nga sai. 16Dai rai nna Karai Kasang gaw nhtoi hkum kaba lahkawng hpe hpan da nu ai hte ajan gaw shani hpe up nna shata gaw shana hpe up nga ai, shi gaw shagan ni hpe mung galaw da nga ai. 17Shi gaw ga ntsa e htoi tu ya na matu mung, 18shani hte shana hpe up na matu hte nhtoi hte nsin hpe karan ginhka na matu mung tawn da wu ai. Karai Kasang gaw dai amu hpe mu nna awng sharawng nga ai. 19Shana gaw lai mat wa nna jahpawt du nga sai, dai gaw mali ya nhtoi rai nga sai.
20Dai hpang Karai Kasang gaw, “Nsoi nsa rawng nna hkrung nga ai baw wunawng wuwa gaw hka hpung ni hta kanawng nga nna, ntsa malen u ni mung nbung nga ai lamu ntsa hkan hpring nga mu ga,” nga nna hkang da wu ai. 21Dai rai nna, Karai Kasang gaw hka hta rawng nna kanawng hkawm nga ai amyu shagu hpe mung, panglai numraw kaba ni hpe mung, ntsa malen u amyu baw hkum sumhpa ni hpe mung hpan da wu ai. Karai Kasang gaw dai amu hpe mu nna awng sharawng nga ai. 22Shi gaw dai ni yawng hpe shaman ya nhtawm hka hta rawng ai hkrung mahkrung ni mayat maya wa nna panglai hka hta hpring wa mu, ntsa malen u ni mung law htam wa mu, ngu nna tsun wu ai. 23Shana gaw lai mat wa nna jahpawt du nga sai, dai gaw manga ya nhtoi rai nga sai.
24Dai hpang Karai Kasang gaw, “Ginding aga gaw nsoi nsa rawng nna ni ai hte zai ai, kaji ai hte kaba ai dusat amyu hkum sumhpa ni yawng hpe shapraw u ga,” ngu nna hkang dat wu yang, dai mung byin nga sai. 25Dai rai nna Karai Kasang gaw dai yawng mayawng hpe galaw da nu ai hte dai amu hpe shi mu nna awng sharawng nga ai.
26Dai hpang Karai Kasang gaw, “Ya chyawm gaw shinggyim masha ni hpe anhte hpan da na ga ai. Shanhte gaw anhte zawn rai nna anhte hte bung na mara ai, shanhte gaw nga ni hpe mung, ntsa malen u ni hpe mung, ni ai, zai ai, kaji ai, kaba ai n nga dusat dumyeng ni yawng hpe a up nga na mara ai,” ngu nna tsun wu ai. #1Ko 11:7. 27Dai rai nna Karai Kasang gaw shinggyim masha ni hpe hpan da nna shi hte nan bung wa hkra shan hpe galaw da nga ai. Shi gaw numsha hte lasha hpe hpan da let, 28shan hpe shaman ya nna, “Kashu kasha law law shaprat mu, shaloi nan a matu mara ni aga ting hta shanu nga lu nna, dai hpe up hkang lu na mara ai. Ngai gaw nan hpe nga ni hpe mung, ntsa malen u ni hpe mung, dusat nhprang ni hpe mung up hkang na ahkang jaw da nga nngai. 29Nan sha na matu nsi naisi li rawng ai nai mam amyu yawng hte asi si ai hpun amyu yawng ngai jaw da made ai; 30rai ti mung matse labye dusat ni yawng hte ntsa malen u ni yawng a matu lu sha ngu na tsit lali ai tsingdu tsingman hte lap lap ai hpun lawn kasha ni hpe ngai jaw da se ai,” ngu nna tsun yang, dai mung byin nga sai. 31Karai Kasang gaw shi galaw da sai amu yawng mayawng hpe yu yu nna, grai myit sharawng awng nga wu ai. Shana lai mat wa nna jahpawt du nga sai, dai gaw kru ya nhtoi rai nga sai.

Jinghpaw Common Language Bible © Bible Society of Myanmar, 2009.

Learn More About Jinghpaw Common Language Bible 2009