PRU MAT WA AI 7
7
1Dai Madu gaw, “Ngai gaw nang hpe hkawhkam wa a ntsa e Karai Kasang zawn san da nna, na a nhpu Arun mung na a myihtoi zawn shi hpe tsun na ra ai. 2Ngai nang hpe hkang da mada mahkra Arun hpe tsun dan u. Shi gaw Israela amyu masha ni Egutu mung kaw na pru wa shangun lu na lam hkawhkam wa hpe tsun dan na ra ai. 3-4Rai ti mung hkawhkam wa a myit masin hpe ngai shaja ya na nngai; ngai gaw Egutu mung hta hkrit hpa kumla law law hpe kade mi galaw tim, na a ga hpe madat na n rai. Shaloi ngai gaw Egutu mung hta grai sawng ai ari kaba shabyin dat nhtawm nye a amyu masha ni a amyu bawsang ni hpe dai mung kaw nna woi shapraw la na nngai.#Kas 7:36. 5Shanhte a ntsa e nye a lata ladawn da nna, dai Israela amyu masha ni hpe shanhte a mung kaw nna woi shapraw wa ai shaloi, Ngai nan dai Madu rai nga nngai hpe Egutu masha ni chye na mara ai,” ngu nna tsun wu ai. 6Mawshe yan Arun mung dai Madu hkang da ai hte maren galaw ma ai. 7Shan hkawhkam wa kaw shang tsun ai aten hta, Mawshe gaw asak matsat shi ning rai nna, Arun a asak mahtang matsat shi masum ning rai nga salu ai.
Arun A Dawhkrawng
8Dai Madu gaw Mawshe yan Arun hpe, 9“Hkawhkam wa nan hpe mauhpa lamik kumla langai madun ya mi, ngu nna hpyi yang, dawhkrawng la nna hkawhkam wa a man e kabai tawn u ngu Arun hpe tsun u, dai gaw lapu tai na ra ai,” ngu nna tsun wu ai. 10Dai rai nna Mawshe yan Arun mung hkawhkam wa kaw shang nna, dai Madu hkang dat ai hte maren galaw ma ai. Arun gaw shi a dawhkrawng hpe hkawhkam wa hte shi a du salang ni a man e kabai tawn ai rai nna dai gaw lapu tai nga ai. 11Dai hpang hkawhkam wa gaw shi a hpaji chye ai masha ni hte mandan bau ai ni hpe shaga la nna shanhte a mandan lakle hpaji hte dai hte maren galaw ma ai. 12Shanhte gaw langai hte langai a dawhkrawng ni hpe kabai tawn da ma ai rai nna dai ni mung lapu tai nga malu ai. Rai ti mung Arun a dawhkrawng mahtang shanhte a dawhkrawng ni hpe mayu kau ya wu ai. 13Dai Madu tsun ai hte maren, hkawhkam wa a myit masin ja nga lu ai rai nna hkawhkam wa gaw Mawshe yan Arun a ga hpe n madat ya wu ai.
Egutu Hpe Adup Hkra Ai Tsin-yam Tsindam Ni
Asai
14Dai Madu gaw Mawshe hpe, “Dai hkawhkam wa gaw masin grai ja nga ai rai nna amyu masha ni hpe dat dat ya na matu shi n hkraw nga ai. 15Dai rai nna, shi Nila hka nu de yu sa ai jahpawt manap aten hta shi hpe sa hkrum mu. Nan hte yep lapu tai ai dawhkrawng hpe mung la lang nna dai hka hkin-gau e shi hpe la nga mu. 16Dai hpang hkawhkam wa hpe, ‘Hebre masha ni a Madu Karai Kasang gaw shi a amyu masha ni hpe dat ya na matu, nang hpe tsun na, ngai hpe shangun dat ni ai, shaloi shanhte gaw shi hpe nam mali e nawku lu na mara ai. Rai ti mung, ya du hkra nang ga madat ya nga ndai n rai. 17Ya chyawm gaw madu hkawhkam e, shi hpa galaw wa na lam hpe nang mu lu na rin dai, ngu nna dai Madu tsun nga ai. Yu u, Ngai gaw ndai dawhkrawng hte hka nu hka man hpe kayat dat na nngai; Hka dai gaw asai tai mat na ra ai. #Shr 16:4. 18Hka na nga ni si mat na mara ai, hka nu gaw grai manam hkying mat ai hte Egutu masha ni mung dai kaw na hka n lu kam mat na mara ai,’” ngu nna tsun wu ai.
19Dai Madu gaw Mawshe hpe, “Arun gaw shi a dawhkrawng la nna Egutu mung na hka nu, hka hkawng, hka lawng, hka nawng ni yawng a ntsa e ladawn u, ngu nna tsun u; shaloi mungdan ting na hka ni asai tai mat nhtawm hpun lawtawk hte nlung yam ni kaw rawng ai hka du hkra pyi, asai tai mat na ra ai,” ngu nna tsun wu ai.
20Dai hpang Mawshe yan Arun gaw dai Madu hkang da ai hte maren galaw ma ai. Arun mung shi a dawhkrawng sharawt nna hkawhkam wa hte shi a du salang ni a man e, hka nu a hka man hpe kayat dat wu yang, hka nu hka ni yawng asai tai mat nga ai. 21Dai hka nu hta rawng ai nga ni mung si mat ma ai rai nna dai hka ni manam hkying nga ai majaw Egutu masha ni hka dai hpe n lu lu ma ai. Egutu mung shara shagu hkan e asai hkrai pri rai nga sai. 22Dai hpang hkawhkam wa a mandan lakle sara ni mung shanhte a lakle hpaji hte dai hte maren galaw ma ai. Dai Madu tsun ai hte maren hkawhkam wa mahtang shawoi na zawn myit ja nga lu ai rai nna Mawshe yan Arun a ga hpe n madat ya wu ai. 23Shing rai ga madat na malai, ndai lam hpe pyi shi myit n lawm ai sha, shi a hkawhkam htingnu de nhtang mat wa wu ai. 24Egutu masha ni yawng hte mung dai hka nu hka hpe n lu lu manu ai majaw lu hka a matu hka nu hka kau mayan hku htu shajang ma ai.
25Dai Madu hka nu kayat ai hpang nhtoi sanit ya lai nga sai.
Currently Selected:
PRU MAT WA AI 7: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
