HPAJI NINGLI 3
3
Yawng Mayawng A Matu Aten Ladaw
1Ndai mungkan hta byin ai lam yawng mayawng gaw Karai Kasang lata ai aten ladaw hta byin nga ai.
2Shi gaw shangai aten hte si aten hpe mung,
gat hkai ai aten hte baw kau ai aten hpe mung,
3sat kau ai aten hte shamai shatsai ai aten hpe mung,
run kau ai aten hte gaw gap ai aten hpe mung, masat da ya nga ai.
4Shi gaw yawn hkyen ai aten hte kabu gara ai aten hpe mung,
hkrap ngu hkrap ngoi ai aten hte ka manawt ai aten hpe mung,
5tsaw ra ginshum ai aten hte n ginshum ai aten hpe mung,
pup ai aten hte n pup ai aten hpe mung, masat da ya nga ai.
6Shi gaw mu tam la ai aten hte shamat kau ai aten hpe mung,
mahkawng da ai aten hte kabai kau ai aten hpe mung,
7gang je kau ai aten hte kapa ai aten hpe mung,
atsin sha nga ai aten hte ga tsun na aten hpe mung masat da ya nga ai.
8Shi gaw tsaw ra ai aten hte n dawng ai aten hpe mung,
majan gasat ai aten hte ngwi pyaw sim sa ai aten hpe mung masat da ya nga ai.
9Anhte gaw anhte a amu yawng mayawng kaw na hpa baw lu la na ga ta? 10Karai Kasang anhte a ntsa e mara ya nu ai lit ni li nga ai hpe ngai chye nngai. 11Shi gaw yawng mayawng a matu jaw hkrak ai aten masat ya nu ai. Shi gaw anhte hpe du na ra ai aten hpe chye na lu ai myit jaw da mani ai, rai ti mung, shi galaw ai amu hpe myit dik hkra chye na hkawn hkrang shangun ai nyan anhte hpe galoi mung n jaw nga ai. 12Dai rai nna, anhte galaw lu ai yawng mayawng gaw kabu gara nga na hte anhte asak naw hkrung nga yang anhte dang lu ai kaja htum ai amu galaw lu na lam rai nga ai, ngu ngai dum chye nngai. 13Anhte yawng gaw anhte galaw da sai amu a majaw kabu gara ai hte lu lu sha sha rai ang nga ga ai. Dai gaw Karai Kasang a chyeju kumhpa rai nga ai.
14Karai Kasang galaw ai amu yawng mayawng gaw htani htana agrin nga ai hpe ngai chye nngai. Dai hta hpa mung galaw jat lu ai n rai; dai kaw na hpa mung shayawm kau mai nga ai n rai. Karai Kasang galaw ai lam langai mi chyawm gaw anhte hpe shi hpe hkrit kamyin shangun nga ai. 15Hpa byin ai mung, byin lu ai mung shawng de byin ngut chyalu hkrai rai nga sai. Karai Kasang gaw dai hpe sha bai byin shangun ngun di nga ai.
Mungkan Ga Hta Nga Ai N Teng N Man Lam
16Dai hta kaga, ndai mungkan ga hta teng man rap ra ai tara hte ding man ai lam nga ang ai shara hta n hkru ai amu hpe nanhte mu myit dai gaw ngai mung yu matsing da nga nngai. 17Ngai gaw nye hkum hpe, “Karai Kasang gaw ding man ai hte n hkru ai amu hpe mung jeyang na ra ai, hpa majaw nga yang, amu shagu, arawn alai shagu gaw shi a masat da ai aten hta byin wa na ra ai,” ngu nna tsun nngai. 18Anhte gaw dusat ni hta pyi grau nna n kaja nga ga ai lam anhte hpe madun dan na matu, Karai Kasang anhte hpe chyam dinglik yu nga ai hpe ngai daw dan se ai. 19Hpang jahtum e chyawm gaw shinggyim masha hte dusat ni hta byin ai maka gaw maren sha rai nga ai. Kaga wa si ai zawn si nga ai. Shanhte gaw hkrung kanu ni sha rai ma ai. Shinggyim masha gaw dusat hta grau kaja nga ai n rai, hpa majaw nga yang, asak gaw kade a matu mung lachyum n pru nga ai. 20Shan lahkawng gaw shara langai mi de sha sa mat wa nna ga nhpu tai mat na mara ai. Shan lahkawng yan gaw ga nhpu kaw na pru wa nhtawm ga nhpu de bai shang mat wa nga ma ai. 21Masha a wenyi gaw ntsa de lung wa nna dusat a wenyi gaw ga de yu mat wa ai ngu nna kadai wa hkrak tsun lu nga a ni? 22Dai rai nna, anhte galaw lu sai amu hta kabu gara nga ai gaw anhte galaw lu ai kaja htum ai amu rai nga ai hpe ngai dum chye nngai. Anhte galaw lu ai amu hpa mung n nga nga ai. Anhte si mat ai hpang hpa byin wa na lam hpe anhte a matu chye na na lam hpa n nga nga ai.
Currently Selected:
HPAJI NINGLI 3: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.