TARA JAHPRANG 25
25
1“Israela masha lahkawng shada da ga law hkat ai majaw tara rung de amu sa shawk ma ai rai yang, langai mi hpe mara n kap ai wa ngu nna mung, bai kaga wa hpe mara lu ai wa ngu nna mung tsun na rai myit dai. 2Mara lu ai wa mahtang shingna kayat hkam na matu daw dan hkrum wu ai rai yang, tara agyi wa gaw dai wa hpe shagum tawn nna shi shut ai mara hte ging dan ai made kayat na rai wu ai. 3Shi hpe mali shi lang hta n jan ai sha dam hkawn jaw mai nga ai; dai hta jan kayat ai rai yang, shi hpe yawng a man e manu n shadan ai hku tai nga ai. #2Ko 11:24.
4“Mam kabye ai dumsu n-gup pat ya lu na n rai. #1Ko 9:9; 1Tm 5:18.
Si Sai Kahpu Wa A Shara Hta Gun Hpai Na Lit
5“Dinghku sut gan langai hta jawm shanu ai hpu nau lahkawng hta na langai wa mi, matu mara n nga ai si mat yang, shi a gaida jan hpe dinghku kaga na masha wa hte hkungran lu na n rai; si mat sai wa a kanau wa mahtang hkungran la na lit nga nga ai. #Mat 22:24; Mrk 12:19; Luk 20:28. 6Israela amyu hta kahpu a amyu matu matut grin nga hkra, shawng shangai ai shadang sha gaw si mat sai wa a kasha rai nga ai ngu nna myit nawn la na rai nga ai. 7Rai ti mung si mat sai wa a kanau mahtang karat hpe n hkungran hkraw ai rai yang, dai numsha gaw mare ningbaw ni a man de sa nhtawm, ‘Nye a madu wa a kahpu kanau gaw Israela amyu masha ni hta shi kahpu kanau a matu mara matut ya na lit hpe ningdang kau nga ai,’ ngu nna sa tsun dan na rai wu ai. 8Dai hpang mare ningbaw ni gaw dai wa hpe shaga la nna tsun dan na rai ma ai; shi mung karat hte hkungran na matu naw ningdang nga ai rai yang gaw, 9shi a karat jan mahtang mare ningbaw ni a man e shi kaw sit sa nhtawm shi a kyepdin maga mi raw kau ya nna, shi a myi man hta mayen mahtaw bun ya let, ‘Tinang a kahpu kanau a matu mara matut ya na n hkraw ai wa hpe ning di ga ai,’ ngu nna tsun na rai wu ai. 10Shi a dinghku hpe mung Israela amyu ting hta, ‘Kyepdin raw hkrum ai wa a dinghku,’ ngu nna shamying na rai ma ai.
Kaga Tara Ni
11“Lasha lahkawng anut hkat nga yang, langai mi a madu jan mahtang madu wa hpe karum la na nga, kaga la wa a la hkrang sa manat da ya ai rai yang, 12shi hpe matsan n yu dum ai sha shi a lata daw kau ya na rai ndai.
13-14Nanhte gaw joi jang hte shadawn shadang ni lang ai shaloi mawp sha na hkum maw myit. #Jaw 19:35-36. 15Dai Madu nanhte a Karai Kasang nanhte hpe jaw ai mungdan hta asak galu nga myit ga, teng man ai joi si hte ding man ai shadawn shadang hpe lang na rai myit dai. 16Dai zawn mawp lu mawp sha ai masha ni hpe dai Madu n dawng nga ai. #Jaw 19:35-36.
Amalek Ni Hpe Sat Kau Na Hkang Da Ai Ga
17“Nanhte Egutu mung na pru wa myit dai shaloi, Amalek masha ni nanhte hpe kaning rai hkap galaw kau nga ai hpe adum nga mu. #Pru 17:8-14; 1Sa 15:2-9. 18Shanhte gaw Karai Kasang hpe mung n chye hkrit ma ai. Nanhte n-gun kya nhtawm ba kalawp nga myit yang, hpang kaw na htim gasat ma ai rai nna hpang hkrat ai ni yawng hpe hkap sat kau ma ai. 19Dai re ai majaw dai Madu nanhte a Karai Kasang nanhte hpe jaw ai mungdan hta nanhte a grup yin hkan nga ai gumlau hpyen ni yawng a lata kaw na nanhte hpe sim sa shangun myit dai shaloi, Amalek masha ni yawng hpe teng teng sat kau lu na rai myit dai; Shanhte hpe kadai mung loi mi pyi dum lu sana n rai; dai hpe malap kau lu na myit dai n rai.
Currently Selected:
TARA JAHPRANG 25: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
