TARA JAHPRANG 14
14
Hkum Pat Da Ai Sharung Shayawt Lai
1“Nanhte gaw dai Madu nanhte a Karai Kasang a amyu masha ni rai nga myit dai. Si ai wa a matu sharung shayawt myit yang, kaga masha ni zawn tinang hkum hpe hkum gadoi jahpye nga myit. Nanhte a kahtan kara hpe mung hkum doi kau myit. #Jaw 19:28; 21:5. 2Ga ntsa hta nga nga ai masha amyu ni yawng hta na shi a amyu masha ni tai nga na matu shi nanhte hpe lata la nu ai majaw dai Madu nanhte a Karai Kasang gaw nanhte hpe madu da nga ai. #Pru 19:5-6; Trj 4:20; 7:6; 26:18; Tit 2:14; 1Pe 2:9.
San Seng Ai Hte N San N Seng Ai Dusat Ni
(Jaw 11:1-47)
3“Dai Madu tsun sai n san n seng ai baw hpe hkum sha myit; 4Nanhte sha mai ai dusat ni gaw dumsu, sagu, bainam, chyahkyi, 5nam sagu, aya hte zau nyi ni zawn re ai lahkru ga nna 6shat lai lai ai shan amyu ni rai nga ai. 7Rai ti mung lahkru n ga, shat lai n lai ai shan amyu hpe chyawm gaw sha mai na myit dai n rai. Dai rai nna gawla-uk, prangtai hte lunghkrung shahpan ni hpe nanhte sha mai na myit dai n rai; dai ni gaw lahkru ga ti mung, shat lai n lai nga ai majaw n san n seng ai baw rai nga ai ngu myit la lu na rai myit dai. 8Wa shan hkum sha myit, dai gaw n san n seng ai baw rai nga ai ngu nna myit la lu na rai myit dai; dai gaw lahkru ga ti mung shat lai n lai nga ai. Dai dusat baw a shan hkum sha myit; de a si mang ni hpe pyi hkum sa hkra nga myit.
9“Singgung hte asep tu ai nga amyu baw hpe nanhte sha mai nga ti mung, 10hka hta rawng nna singgung hte asep n tu ai hpe chyawm gaw sha mai na myit dai n rai; dai gaw n san n seng nga ai ngu nna myit la lu na rai myit dai.
11“Nanhte gaw san seng ai ntsa malen u sha mai nga myit dai. 12-18Rai ti mung ndai u amyu ni hpe sha mai na n rai nga myit dai; dai ni gaw galang u, uhku ni, langji, langda, uhka, u gawla-uk, panglai hkrudu, u kawp, u gaw amyu myu, hka u, wunpu u, hka uhka, mu u hte patsip re ai ni rai nga ai.
19“Singkaw tu ai shingtai ni yawng mung n san n seng nga ai majaw dai baw hpe sha lu na myit dai n rai. 20Nanhte gaw san seng ai shingtai sha mai nga myit dai.
21“Shi hkrai si ai dusat ashan hpe hkum sha myit. Nanhte hta hkan nga ai maigan masha ni hpe jaw sha na rai myit dai; shing n rai kaga maigan masha ni hpe dut ya na mai nga ai. Rai ti mung dai Madu nanhte a Karai Kasang nanhte hpe madu da nga ai majaw nanhte gaw shi a amyu masha ni rai nga myit dai.
“Sagu bainam kasha hpe kanu a chyu hte hkum shapyaw myit. #Pru 23:19; 34:26.
Htam Shi Hta Na Htam Mi Hte Seng Ai Tara
22“Shaning shagu nanhte a yi hkauna hta na pru ai nsi naisi yawng a htam shi hta na htam mi hpe karan jahka da na rai myit dai. #Jaw 27:30-33; Bhk 18:21. 23Dai Madu nanhte a Karai Kasang shi hpe nawku na matu san da ya ai shara de sa nhtawm nai mam, sabyi ntsin, tsanlun sau hte sagu dumsu ni hta na shawng hkrat ai yam nga alat re ai htam shi hta na htam mi hpe shi a man e sha lu na rai myit dai. Ndai amu hpe galaw ai a majaw dai Madu nanhte a Karai Kasang hpe tut nawng shagrau sha-a nga na lam sharin la mai na rai myit dai. 24Dai Madu nanhte hpe shaman ya nna hkam la lu ai htam shi hta na htam mi hpe san da ai nawku shara de gun sa na matu nanhte nga ai dum nta kaw na nau tsan ai rai yang, 25nanhte galaw shapraw ai arai hpe dut la nna nawku ai shara de gumhpraw la sa na rai myit dai. 26Dumsu shan, sagu shan, sabyi ntsin hte chyaru re ai ra mara arai ni hpe mari la nhtawm dai Madu nanhte a Karai Kasang a man e nanhte hte nanhte a dinghku masha ni hte rau lu rau sha let kabu gara nga na rai myit dai.
27“Nanhte a mare ni hta nga ai Lewi masha ni hpe n dum hkum rai myit; shanhte a matu ngu na sut gan sali wunli hpa mung shanhte hta n lu nga ma ai. 28Masum ning du shagu nanhte lu la ai nai mam yawng a htam shi hta na htam mi hpe la nna nanhte a mare ni hta mahkawng da na rai myit dai. 29Dai malu masha gaw sut gan sali wunli n lu ai Lewi masha ni a matu mung, nanhte a mare ni hta nga ai maigan masha ni, jahkrai nmai hte gaida gaina ni a matu rai nga ai. Dai rai nna shanhte hta ra ai made sa la na rai ma ai. Shing rai jang, nanhte galaw ai lam magup hta dai Madu nanhte a Karai Kasang gaw nanhte galaw ai lam magup hpe shaman ya na ra ai.
Currently Selected:
TARA JAHPRANG 14: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
