AMO 8
8
Namsi Ka Shingran
1Ngai gaw Tsaw Htum ai dai Madu kaw na kaga shingran langai lu la nngai. Dai shingran hta ngai gaw namsi ka langai mu nngai. 2Dai Madu gaw, “Amo e, nang hpa mu n ta?,” nga nna san wu ai.
Ngai gaw, “Namsi ka langai,” ngu nna htan we ai.
Dai Madu gaw ngai hpe, “Jahtum ai gaw nye a amyu masha Israela ni a matu du nga sai. Ngai gaw shanhte hpe ari jaw na hte seng nna nye a myit bai galai na n rai. 3Dai shani e, hkawhkam htingnu kata hta mahkawn mangoi ai nsen gaw hkrap shabam ai hte galai mat nna, si mang ni shara shagu hkan e taw nga na mara ai. Shanhte gaw atsin sha kabai kau hkrum na mara ai,” nga nna tsun ai.
Israela Daw Dan Hkrum Na Lam
4Ra kadawn ai ni hpe kabye dip ai hte mungdan na matsan mayan masha ni hpe jahten sharun shakut nga ai nanhte gaw ndai ga madat mu. 5Nanhte gaw tinang hkum hpe, “Anhte a mam dut lu na matu chyoi pra ai nhtoi ni lai mat wa na anhte la nga ga ai. Bansa Nhtoi htum mat ai shaloi, anhte a arai mari la ai ni hpe n man ai joi jang ni lang nna, dang hpe kaji, joi hpe kaba shangun let manu kaba hte dut la lu na rai nga ga ai. 6Anhte gaw hkaulan mam nmyem ni hpe tsaw ai manu hte dut la lu na rai nga ga ai. Anhte gaw tinang a hka ni hpe n wa lu ai matsan mayan masha ni hpe mu tam na rai ga ai, kyepdin man mi a manu daram pyi manu n rawng ai shanhte hpe mayam ni hpe zawn mari lu na ga ai,” nga nna tsun myit dai.
7Dai Madu Israela a Karai Kasang gaw ning ngu dagam nu ai: “Ngai gaw shanhte a n hkru ai arawn alai ni hpe galoi mung malap kau na n rai. 8Dai rai nna ginding aga gaw ashun wa na ra ai, mungdan na masha shagu hte mung tsin-yam tsindam hkrum sha na mara ai. Mungdan ting gari ashun wa nna dai gaw Nila hka nu zawn rawt tung wa nna hkyet mat wa na ra ai. 9Ngai gaw shani chyingtung e ajan hpe jashang kau shangun ai hte ginding aga hpe shani aten e nsin sin shangun ai shaloi dai aten du wa na ra ai. Tsaw Htum ai dai Madu ngai nan tsun ni ai. 10Ngai gaw nanhte a poi ni hpe makoi mayang poi shatai kau nna, nanhte a kabu gara ai mahkawn mangoi ni hpe sharung shayawt ai hte galai kau ya na made ai. Ngai gaw nanhte a baw ni hpe shakrin kau shangun nhtawm lachyit nba hpun shangun na made ai. Nanhte gaw kasha shingtai si mat ai majaw kanu yan kawa yawn hkyen hkrum nga ai zawn tai na myit dai. Dai shani gaw ahkup ahka nga nna htum mat wa na ra ai.
11“Dai mungdan hta hkuwa hpe ngai dat dat ai shaloi dai aten gaw du wa na ra ai. Amyu masha ni gaw kawsi kyet na mara ai, rai ti mung muk a majaw n rai; shanhte gaw hpang gara na mara ai, rai ti mung hka a majaw n rai. Shanhte gaw dai Madu a mungga hpe kawsi ai hte hpang gara na mara ai. Tsaw Htum ai dai Madu ngai nan tsun ni ai. 12Amyu masha ni gaw Jum Nawng kaw nna Ka-ang Panglai du hkra, dingdung kaw nna sinpraw du hkra ningwan hkawm na mara ai. Shanhte gaw dai Madu kaw na mungga hpe shara shagu hkan tam na mara ai, rai ti mung shanhte dai hpe mu tam na ma ai n rai. 13Dai shani e, hkam kaja ai shabrang ni hte numsha ni pyi hpang gara ai hte ba kalawp mat na mara ai. 14Samari a hpara sumla ni hte dagam ai ni gaw, ‘Dan a hpara shing n rai Berasheba a hpara hte ndai amyu masha ni hkrat mat nna bai n rawt wa lu na mara ai,” nga nna tsun ma ai.
Currently Selected:
AMO 8: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.