AMO 6
6
Israela A Jahten Sharun Lam
1Nanhte a matu Ziun hta ndai zawn ngwi pyaw ai asak hkrun lam lu la ai hte Samari mung e sim sa shim ai lam hkam sha lu ai, ndai galu kaba ai Israela amyu baw a galu kaba ai ningbaw ni kaw karum la na matu sa du ai masha ni gaw nanhte a matu kade wa hkrit hpa rai na rai nga a hka! 2Hkalna mare hpe sa yu yu mu. Dai hpang Hamat a galu kaba ai mare de matut sa nhtawm Gat a Hpilisti mare de yu sa wa mu. Dai ni gaw Yuda hte Israela mungdan ni hta grau kaja nga a ni? Shanhte a lamu ga gaw nanhte a lamu ga hta grau dam lada nga a ni? 3Nanhte gaw tsin-yam tsindam a nhtoi du wa ra ai hpe yin la na matu ningdang kau nga myit dai, rai ti mung nanhte hkum nan galaw ai amu gaw dai nhtoi hpe grau shani la nga myit dai. 4Zing hkam ai yup ra ntsa hta hkum chyan nna dumsu hkalung hte sagu kasha shan sha ai gaw nanhte a matu kade sha hkrit hpa rai na rai nga a hka! 5Nanhte gaw Dawi galaw sai zawn mahkawn mangoi ka shagawp na hte tingse sumpyi dum na ra sharawng nga myit dai. 6Nanhte gaw sabyi ntsin hpe gawm hta lu nna manam pyaw htum ai sau jet ni lang nga myit dai, rai ti mung nanhte gaw Israela a hten run lam hpe sharung shayawt nga myit dai n rai. 7Dai rai nna, nanhte gaw shawng nnan bawng dung hkrum na myit dai. Nanhte galaw ai poi ni hte hkik hkam lusha poi ni htum mat na ra ai.
8Chyahtum Chyalai N-gun rawng ai Tsaw Htum ai dai Madu gaw ndai dagam sadi jaw ai lam jaw ya nu ai: “Ngai gaw Israela amyu masha ni a gumrawng gumtawng ai hpe n dawng nngai; ngai gaw shanhte a zing hkam ai nta htingnu ni hpe matsat nngai. Ngai gaw shanhte a mare daju hte dai hta nga manga shagu hpe gumlau hpyen a lata de jaw kau na we ai.”
9Lama rai nna, dinghku langai hta marai shi ngam nga ai rai yang, shanhte si na mara ai. 10Si mat sai wa a jinghku, makoi mayang poi hpareng ai wa gaw nta nhku de shang nna moi mang la shapraw na ra ai. Dai jinghku wa gaw nta nhku de naw nga nga ai wa hpe shaga dat nna, “Nang hte rau langai wa mi naw nga a ni?,” ngu nna san dat wu ai.
Dai masha wa gaw, “N nga sai!,” ngu nna htan dat na ra ai.
Dai shaloi jinghku wa gaw, “Nang azim sha nga u! Anhte gaw dai Madu a amying hpe tsun na matu pyi sadi ra nga ga ai.
11Dai Madu hkang dat ai ga jaw dat ai shaloi, nta kaji kaba ni daw agrawp mat na mara ai. 12Gumra ni gaw lunghkrung ntsa hkan e gumlawt hkawm lu nga a ni? Kadai wa panglai hka hpe dumsu hte shawt lu a ni? Ti mung, nanhte gaw teng man rap ra ai tara hpe gung, jaw ai hpe shut ai de kayin kau nga myit dai.
13Nanhte gaw Lodeba mare hpe gasat la lu ai majaw shakawng nga myit dai. Nanhte gaw, “Karnaim hpe lu la na matu n-gun law nga ga ai,” nga nna gumrawng myit dai.
14Chyahtum Chyalai N-gun rawng ai Madu Karai Kasang gaw shi nan, “Israela amyu masha ni e, ngai gaw nanhte a mungdan hpe madu la na matu maigan hpyen hpung hpe shangun dat na nngai. Dai ni gaw nanhte hpe dingdung maga Hamat Uhkan kaw nna dingda maga Araba hka shi du hkra zingri zingrat na myit dai,” ngu nna tsun ai.
Currently Selected:
AMO 6: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
