AMO 1
1
1Ndai gaw Yuda mungdan a Hkawhkam Uzia hte Israela Hkawhkam Yosha a kasha Yeroboam a lakhtak e, nnang nawn garai n nawn ai lahkawng ning a shawng e, Tekoa mare na sagu rem wa Amo hpe Israela hte seng nna Karai Kasang kaw na lu la ai mungga ni rai nga ai. #2Hk 15:1-7; 2Hl 26:1-23.
2Amo gaw,
“Dai Madu gaw Ziun Bum kaw na shabam nga ai;
shi a nsen hpe Yerusalem kaw na sharawt dat nga ai.
Udat shara ni hkun hkraw mat nna
Hkarmela Bum ntsa na tsing nyui mat nga ai,” nga nna tsun wu ai. #Yoe 3:16.
Israela A Htingbu Mungdan Ni Hpe Karai Kasang Tara Jeyang Ai
Suri
3Dai Madu gaw, “Damasku masha ni lang hte lang yubak galaw shut nga masai; dai lam a majaw ngai shanhte hpe ari teng teng jaw na nngai. Shanhte gaw Gilead masha ni hpe matse gumshem ai myit hte di kau ma ai. #Esa 17:1-3; Yer 49:23-27; Zeh 9:1. 4Dai rai nna, ngai gaw Hkawhkam Hazaela gap da ai hkawhkam htingnu de wan jahkrat dat nna Hkawhkam Benhadad a hpyen dap ni hpe jahkru kau na nngai. 5Ngai gaw Damasku mare chyinghka htinggrang ni hpe agrawp daw kau nna, Awen kadit e nga ai ni hte Behteden hpe up hkang ai wa hpe yeng seng kau na nngai. Suri masha ni gaw Kira mung de bawng masha ni zawn woi mat wa hkrum na mara ai,” ngu nna tsun wu ai.
Hpilisti
6Dai Madu gaw, “Gaza masha ni gaw lang hte lang yubak galaw shut kau nga masai, dai lam a majaw ngai shanhte hpe teng teng ari jaw na nngai. Shanhte gaw amyu ting hpe rim la nna Edom masha ni a lata de mayam hku dut kau dat ma ai. 7Dai rai nna, ngai gaw Gaza mare bunghku a ntsa e wan jahkrat dat nna dai mare a hpyen dap ni hpe jahkru kau na we ai. 8Ngai gaw Ashdod hte Ashkelon mare ni a mungdu ni hpe tsep kawp la kau na nngai. Ngai gaw Ekron mare hpe ari jaw ai hte ngam nga ai Hpilisti masha ni yawng si mat na mara ai,” ngu nna tsun wu ai.
Turu
9Dai Madu gaw, “Turu masha ni lang hte lang yubak galaw shut kau nga masai, dai lam a majaw, ngai shanhte hpe teng teng ari jaw na we ai. Shanhte gaw amyu baw ting hpe woi mat wa nna Edom mung hta bawng dung shangun ma ai, shanhte galaw da sai manang ga shaka hpe mung n shatup ma ai. #Esa 23:1-18; Eze 26:1-28:19; Yoe 3:4-8; Zeh 9:1-4; Mat 11:21-22; Luk 10:13-14. 10Dai rai nna, ngai gaw Turu mare bunghku ntsa e wan jahkrat dat nna dai mare a hpyen dap ni hpe jahkru kau na we ai,” ngu nna tsun ai.
Edom
11Dai Madu gaw, “Edom masha ni lang hte lang yubak galaw shut nga masai, dai lam a majaw ngai shanhte hpe teng teng ari jaw na we ai. Shanhte gaw shanhte a kahpu kanau ni rai nga ai Israela amyu masha ni hpe matsan dum ai lam n nga ai sha nhtu lang let hkan shachyut ma ai. Shanhte a masin kahtet ai gaw shadaw shadang n nga nga ma ai; shanhte a masin kahtet ai hpe galoi mung n lu shakawp nga masai. #Esa 34:5-17; 63:1-6; Yer 49:7-22; Eze 25:12-14; 35:1-15; Oba 1-14; Mal 1:2-5. 12Dai rai nna, ngai gaw Teman mare a ntsa e wan jahkrat dat nna Bozra a hpyen dap ni hpe jahkru kau na we ai,” ngu nna tsun ai.
Amon
13Dai Madu gaw, “Amon masha ni lang hte lang yubak galaw shut kau nga masai, dai lam a majaw ngai shanhte hpe teng teng ari jaw na we ai. Shanhte gaw lamu ga maden jat la lu na matu majan gasat ai shaloi Gilead mung na na-um nasin re ai num ni hpe pyi kan ga kau ma ai. #Yer 49:1-6; Eze 21:28-32; 25:1-7; Zep 2:8-11. 14Dai rai nna, ngai gaw Raba a mare bunghku ni a ntsa de wan jahkrat dat nhtawm de a hpyen dap ni hpe jahkru kau na we ai. Dai hpang dai yang e hpyen majan shani jahtau garu ai lam nga nna dai gasat gala ai gaw nbung laru zawn n-yun bu na ra ai. 15Shanhte a hkawhkam hte shi a du salang ni bawng dung hkrum mat wa na mara ai,” ngu nna tsun ai.
Currently Selected:
AMO 1: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
