2 TIMOHTI 3
3
Hpang Jahtum Nhtoi Ni A Lam
1Hpang jahtum nhtoi ni hta yak la ai aten ni du na ra ai hpe dum nga mu. 2Masha ni gaw tinang a akyu tam ai, nam mak lawhpa, shakawng shakat ai, myit tsaw myit dap gumrawng ai ni rai na mara ai. Shanhte gaw roi asawng ga tsun ai ni, kanu kawa ni hpe gumlang ai ni, chyeju n chye dum ai ni, nawku makam masham kata ai ni rai na mara ai. 3Shanhte gaw matsan dum n chye ai ni, n ja n hpra myit n rawng nna masin n si n hkru ai ni, masha wa a sari jahpoi na hku shatan n lem ai ni, masha wa a myit hkrum ai lam n tam ai sha kashun kashe hkala nba amu galaw ai ni, matse mazut ai ni rai na mara ai. Dai hta n ga, shanhte gaw mai kaja ai hpe n dawng ai ni, 4mayun gumlau ai ni, sadi n dung nna kam mara re ai ni, myit tsaw myit dap nna gumrawng myit kaba ai ni rai nna, shanhte gaw Karai Kasang hpe tsaw ra na malai tinang a pyaw daw lam hpe grau ra sharawng ai ni rai na mara ai. 5Shanhte gaw anhte a nawku makam masham htung lai ntsa lam hkrang masa hpe hkan sa ma ai rai ti mung de a hpung shingkang atsam majing hpe gaw nyet kau ai ni rai ma ai. Shing re ai masha ni hpe mung koi kau u. 6Shanhte hta na nkau mi gaw masha ni a nta ni hta hkan shang nhtawm mayun de nna machye machyang n law nna gawng kya ai num ni hpe shanhte a lata hta shang hkra galaw ma ai. Dai num ni gaw tinang tawt lai kau ai yubak mara majaw myit lit li nna myit n pyaw let, ngang kayut ai lam amyu myu hta len nang mat wa nna, 7Sharin achyin ai hpe hkam la na tut nawng e ra sharawng let shakut ma ti mung, shanhte gaw dai teng man ai lam hpe chye chyang ai de, galoi mung n du lu ma ai. 8Yanne yan Yambre gaw Mawshe hpe nhtan shai ninghkap ai hku galaw ma ai hte maren, ndai masha ni mung, dai teng man ai lam hpe ninghkap ningdang ma ai. Dai masha ni gaw shanhte a myit sawn sumru ai lam n nga mat sai rai nna makam masham hta hten za sum hkrum ma ai.#Pru 7:11; Rom 1:28; 2Ko 13:5; 1Tm 6:5. 9Rai ti mung shanhte a awng dang ai lam gaw, dai hte hta jan nna na na hkam na n rai, hpa majaw nga yang dai yan hta hpa baw byin wa ai lam dan leng wa ai zawn ndai masha ni kade angawk ai lam mung masha ni a man e dan leng wa na ra ai.
Hpang Jahtum Na Matsun Ga Ni
10Rai ti mung nang chyawm gaw nye a sharin shaga ai lam, nye a lai len hte, nye a asak hkrung lam hta shatawng shada ai lam ni hpe hkan sa nit dai, nye a makam masham nye a myit galu nna hkam sharang ai lam, nye a tsaw ra ai myit, nye a shakut sharang ai lam, 11nye a zingri zingrat hkrum sha ai lam, nye a nni nkri hkam ai lam, re ai ni hpe maram masam mu chye nit dai. Antioki mare, Ikoni mare, Lustra mare hkan e ngai hta byin hkrum hkra ai hkrithpa zingri zingrat lam ni hte ngai hkam sharang lai wa sai lam hpe nang yawng chye nga ndai. Madu chyawm gaw dai lam ni yawng hta na ngai hpe mawai la ni ai.#Kas 13:45-50; 14:2,19; 2Ko 1:10. 12Kaja wa Hkristu Yesu hta asak hkrung nna tara hkungga ai lam hta asak hkrung mayu ai wa kadai mung zingri zingrat ai hkrum na ra ai. 13N hkru n kaja ai masha ni hte masu hkalem sha ai ni chyawm gaw masha hpe hkalem sha nna tinang ni nan hkalem sha ai bai hkrum ai hte n hkru ai lam hta n kaja ai kaw nna n kaja dik ai de grau grau matut shanang sa wa na mara ai. 14Rai ti mung nang chyawm gaw, nang sharin achyin hkam la nna ngang ngang kang kang kam sham nga sai dai teng man ai lam hta matut nna hkan sa nga u. Na a sara ni kadai ni rai ma ai hpe dum chye nga ndai. 15Nang hpe ma kaji prat kaw nna machye machyang jaw nna Hkristu Yesu hpe kam sham ai a marang e hkye hkrang la ai lam lu la na matu lam matsun madun ai, dai chyoi pra ai Chyum Laika hpe atsawm sha chye ai wa rai nga ndai hpe mung adum nga u. 16Dai Chyum Laika shagu hpe Karai Kasang shatsam ai hte ka da ai re ai majaw, teng man ai lam hpe sharin achyin ya na, shut ai lam hpe mara madun nna daru sharin na, shut shai ai lam ni hpe mye shading na hte jaw ai asak hkrung lam a matu matsun madun na akyu rawng nga ai. 17Dai rai nna Karai Kasang a magam gun hpai ai wa gaw mai kaja ai magam bungli shagu hpe galaw na matu atsam hpring nna lang ra ai hking rai ni hte hkrak shajin da sai wa rai nga ai.
Currently Selected:
2 TIMOHTI 3: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
