2 HKAWHKAM 24
24
1Yehoiakim hkawhkam tai nga yang, Babelon Hkawhkam Nebuhkadneza gaw Yuda mung hpe shang gasat wu ai rai nna shi a up hkang ai npu hta masum ning taw shangun wu ai; dai hpang shi bai gumlau rawt wu ai. #Yer 25:1-38; Dan 1:1-2. 2Dai Madu gaw shi a shangun ma myihtoi ni a n-gup aga hte tsun sai hte maren, Yehoiakim hpe ninghkap nna Yuda mung hpe shamyit kau na matu Babelon hpyen hpung mi, Suri masha hpyen hpung mi, Moba masha hpyen hpung mi hte Amon masha hpyen hpung ni hpe dai Madu shangun dat wu ai. 3-4Hkawhkam Manashe galaw shut kau ai yubak mara yawng a majaw mung, grau nna mara n kap ai amyu masha ni yawng hpe shi sat kau wu ai rai nna Yuda amyu masha ni hpe shi a man kaw nna gawt shapraw kau na matu dai Madu hkang da ai ga hte maren ndai lam byin pru wa sai. Dai Madu gaw shing re ai amu galaw ai a jaw e shi hpe mara n dat ya lu ai lam rai nga ai.
5Yehoiakim galaw nu ai amu magup shagu hte a lam hpe Yuda Hkawhkam ni a Labau Laika hta ka matsing da nga ai. 6Yehoiakim si mat sai rai nna shi a kasha Yehoiahkin gaw shi a hkang hta hkaw dung let hkawhkam tai wa sai.
7Uhprat hka kaw nna Egutu mung a dingdung maga na lamu ga jarit du hkra dam ai dai Egutu hkawhkam madu da sai lamu ga yawng hpe Babelon hkawhkam wa up kau ya nu ai majaw Egutu hkawhkam gaw shi a hpyen luksuk hte Egutu mung kaw nna galoi mung bai n pru hkawm yu sanu ai.
Yuda Hkawhkam Yehoiahkin
(2Hl 36:9-10)
8Yehoiahkin Yuda hkawhkam tai wa ai shaloi shi a asak shi matsat ning du nga sai rai nna Yerusalem mare hta shata masum up nga ai. Shi a kanu gaw Yerusalem mare na Elnahtan a shayi sha Nehuhta rai nga ai. 9Shi gaw shi kawa a kasi hta hkan nga ai rai nna Yehoiahkin mung dai Madu hpe shut hpyit kau wu ai.
10Shi hkaw dung nga ai aten hta Babelon luksuk hpe up hkang ai Hkawhkam Nebuhkadneza a du salang ni gaw Yerusalem mare de rawt sa wa nhtawm sa wang da mu ai. 11Mare hpe wang da nga ai laman, Nebuhkadneza shi nan Yerusalem mare de shang wa yang, 12Hkawhkam Yehoiahkin hte rau shi a kanu, shi a shadang sha ni, du salang ni, hkawhkam wang na rap daw salang ni gaw, Babelon masha ni hpe asum hkap jaw kau mu ai. Nebuhkadneza hkaw dung ai matsat ning hta shi gaw Yehoiahkin hpe bawng masha hku rim la nhtawm, #Yer 22:24-30; 24:1-10; 29:1-2. 13Nawku Htingnu hte hkawhkam htingnu kata na sut rai yawng mayawng hte hpe Babelon mung de htawm mat wa wu ai. Dai Madu hkang da sai hte maren, Nawku Htingnu hta lang na matu Hkawhkam Shawlumon e ja hte galaw da ai arung arai hkinghku ni yawng hpe Nebuhkadneza agrawp jahten kau wu ai. 14Nebuhkadneza gaw Yerusalem mare na amyu masha ni yawng hpe mung, hkawhkam htingnu du salang ni yawng hpe mung, woi awn ai masha ni yawng ngu na yawng hpawn mun mi hpe bawng masha hku rim woi mat wa wu ai. Shi gaw kung kyang ai bungli galaw masha ni yawng ngu na ndup dup ai ni lawm hkra woi mat wa wu ai; Yuda mung e chyawm gaw matsan dik htum ai amyu masha ni hpe sha tawn kau da wu ai.
15Nebuhkadneza gaw Yehoiahkin hte rau shi a kanu, shi a madu jan ni, shi a du salang ni, Yuda mung a ningbaw ningla ni hpe Babelon mung de woi mat wa wu ai. #Eze 17:12. 16Nebuhkadneza gaw ahkyak ai masha ngu na masha hkying sanit hte hpe mung, kung kyang ai masha hkrai hkying mi, ndup chye dup ai ni hte shanhte yawng hte gaw hpyen bungli gunhpai ai hta n-gun lagaw hpring hpring rawng ai ni rai nga ai ni hpe Babelon mung de woi mat wa wu ai.
17Nebuhkadneza gaw Yehoiahkin a kawa toi Matania hpe Yuda hkawhkam shatai la nhtawm shi a amying hpe Zedekia ngu nna galai shamying da ya wu ai. #Yer 37:1; Eze 17:13.
Yuda Hkawhkam Zedekia
(2Hl 36:11-12; Yer 52:1-3a)
18Zedekia gaw Yuda hkawhkam tai wa ai shaloi asak hkun langai ning rai nna Yerusalem mare hta shi langai ning up nga ai. Shi a kanu a mying gaw Hamutala rai nna Libna mare hta nga ai Yeremia a shayi sha rai nga ai. #Yer 27:1-22; 28:1-17. 19Hkawhkam Zedekia gaw Hkawhkam Yehoiakim galaw ai lam hte maren dai Madu hpe n hkru ai amu galaw shut nu ai. 20Dai Madu gaw Yerusalem mare hte Yuda amyu masha ni hpe pawt sindawng wu ai majaw shanhte hpe shi a man kaw nna gawt shapraw kau wu ai. #Eze 17:15.
Currently Selected:
2 HKAWHKAM 24: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
