2 HKAWHKAM 19
19
Hkawhkam Wa Gaw Esaia A Hpaji Jaw Ga Hpe Hpyi Ai
(Esa 37:1-7)
1Hkawhkam Hezekia gaw shanhte tang shawn ai shiga hpe na ai shaloi jang, yawn ai myit hte shi a hpun palawng ni hpe gang je kau nhtawm lachyit nba bu hpun let dai Madu a Nawku Htingnu de sa wa wu ai. 2Shi gaw hkawhkam htingnu hpe hpareng ai du Eliakim, hkawhkam wang na amu madu Shebna hte hkinjawng salang ni hpe Amot a kasha myihtoi Esaia hpang de shangun dat wu ai. Shanhte yawng mung lachyit hpun nba hpun da nga ma ai. 3Da ndai gaw Esaia hpe sa jaw na, shi shanhte hpe tsun dat ai ga rai nga ai: “Dai ni gaw nni nkri hkrum ai shani rai nga ai. Anhte gaw asawng asang hkrum let ari jaw hkrum nga saga ai. Ma shangai na nhtoi gu ti mung shangai lu na matu n-gun grai kya nga ai numsha langai zawn rai nga saga ai. 4Asuri hkawseng gaw ahkrung nga ai Karai Kasang hpe shatan nhkan galaw na nga, shi a du ningbaw wa hpe shangun dat nu ai. Dai Madu na a Karai Kasang gaw dai shatan nhkan ga ni hpe na ya nna shing ngu tsun shatan ai ni hpe ari jaw u ga law. Dai re ai majaw naw hkrung nga ai anhte a amyu masha ni a matu Karai Kasang kaw akyu hpyi ya mi.”
5Esaia gaw Hkawhkam Hezekia kaw na shiga lu la jang, 6ning ngu nna shi bai htang shana dat wu ai: “Nang hpe shi n hkye hkrang la lu ai nga nna tsun ai ga ni hte nang hpe Asuri masha ni n jahkrit kajawng shangun lu mu ga, dai Madu nang hpe tsun ai. 7Dai Madu gaw hkawseng wa hpe ashi langai na shangun na matu galaw dat nhtawm shi a mungdan de nhtang wa shangun na ra ai. Shaloi dai Madu gaw shi hpe dai mung e sat kau na rai wu ai.
Asuri Masha Ni Kalang Mi Bai Jahkrit Shama Dat Ai
(Esa 37:8-20)
8Hkawseng wa gaw Lahkisha kaw nna pru wa nhtawm, Libna mare makau e majan gasat nga ai hpe Asuri hpyen du wa chye wu ai. Shing rai shi gaw shi hte bawng ban na nga pru sa mat wa wu ai. 9Hkusha Hkawhkam Tirhaka gaw Egutu hpyen luksuk ni hpe woi nna shanhte hpe htim gasat na matu lung wa ai shiga Asuri ni kaw hkrang pru wa nga ai. Asuri hkawseng wa dai shiga hpe na ai shaloi shi gaw Yuda Hkawhkam Hezekia hpang de laika langai sa dat wu ai. 10Yuda Hkawhkam Hezekia hpe, “Nang gaw nye a lata de n shang mat na re nga nna, nang kam hpa shamyet nga ai Karai Kasang gaw nang hpe tsun ai rai tim, dai ga gaw nang hpe n hkalem kau nga u ga. 11Asuri hkawseng wa gaw mungdan shagu hpe jahten shaza kau na matu shi daw dan ai hte maren galaw ai hpe nang na yu nit dai. Nang mung dai zawn re ai kaw na lawt lu na re ngu, myit kam nga n ni? 12Nye a kaji kawa ni gaw Gozan, Haran, hte Rezep mare ni hpe shamyit kau nna, Israela mung hta shanu nga ai Behteden amyu masha ni hpe sat kau nga ai; shanhte a karai ni shanhte hpe mawai la lu nga ma ai n rai. 13Hamat, Arpad, Sehparim, Hena hte Iwa mare ni hpe up hkang ai hkawhkam ni kanang nga nga ma ta?,” ngu nna tsun wu ai.
14Hkawhkam Hezekia gaw dai laika hpe kasa wa a lata kaw nna la nhtawm hti yu wu ai. Shaloi shi gaw Nawku Htingnu de sa wa nhtawm dai shara dai Madu a man e laika hpe tawn da nna, 15“O Madu, Israela a Karai Kasang e, singkaw tu ai hkrung kanu ni a ntsa na na a tingnyang ntsa e dung let, nang chyu sha mungkan ga na mungdan yawng mayawng hpe up hkang ai Karai Kasang rai nga ndai. Nang gaw sumsing lamu hte ginding aga hpe hpan da nit dai. #Pru 25:22. 16Ya chyawm gaw Madu e, anhte hta hpa byin nga ai hpe mada yu u. Ahkrung nga ai Karai Kasang e, nang hpe hkawseng Senahkerib tsun ai n kaw n law asawng asang re ai ga mahkra hte hpe madat mara ya e. 17Madu e, Asuri hkawseng ni gaw masha mungdan law law hpe jahten shaza kau nna dai ni a mungdan ni hpe akrin akraw katsi katsang shatai kau manu ai gaw, anhte yawng chye nga ga ai; 18shanhte a karai ni hpe nat kau ya mu ai. Dai ni gaw shinggyim masha a lata hte tawk sama da ai hpun hte nlung hte galaw da ai hpara sumla ni chyu sha rai nga ai; dai ni gaw karai ni n rai ma ai. 19Ya chyawm gaw anhte a Madu Karai Kasang e, anhte hpe Asuri ni a lata kaw nna mawai la mi; shaloi mungkan ga na masha amyu ni yawng hte gaw nang chyu sha Madu Karai Kasang rai nga ai hpe chye wa na mara ai,” ngu nna hpyi wu ai.
Hkawhkam Wa Hpe Tsun Ai Esaia A Mungga
(Esa 37:21-38)
20Esaia gaw hkawhkam wa a akyu hpyi ga hpe htan ai shiga Hkawhkam Hezekia hpang de shana dat wu ai; 21dai Madu gaw, “Senahkerib e, Yerusalem mare gaw nang hpe mani nna jahpoi asawng nga ai. 22Nang hpe n kaw n law di nna asawng asang di kau nit dai gaw kadai rai nga ai zawn nang myit nawn la wu ni? Nang gaw chyoi pra ai Israela a Karai Kasang ngai hpe n gawn n sawn di kau nga nit dai. 23Na a hpyen leng mahkra hte Lebanon a tsaw htum ai bum ni hpe nang gasat dang la nit dai lam ngai hpe shakawng dan na matu na a dat kasa ni hpe ngai hpang de shangun dat nga ndai. Dai shara hkan na galu preng tsawm ai arit hpun ni hte hpu htum nna tsaw htum ai marau hpun ni hpe nang kran daw kau nit dai majaw grang dakat shakawng nga ndai hte dai hpun maling htinggram a maling mala shara de mung nang hkan dep nga nit dai. 24Nang gaw tsasam mung e hka htung ni hpe htu nna lu lu nit dai; na a hpyen la ni a lagaw hte Nila hka hpe kabye jahkraw kau nga ai hpe nang shakawng dan nga ndai.
25“Ndai lam mahkra hpe moi chyaloi nhkoi kaw nna ngai yaw shada maw mawn nga ai hpe nang galoi mung n na yu n ni? Ya mung dai amu ni hpe ngai matut galaw nga nngai. Ngang ai bunghku hte kum da ai mare ni hpe run jahten kau nna nlung sumpum shatai kau na matu ngai nang hpe daru magam n-gun jaw ya de ai. 26Dai shara hta shanu nga ai amyu masha ni gaw n-gun lagaw n rawng ai hte shanhte gaw hkrit gari ai hte sai kajawng nga ma ai. Shanhte gaw pa layang hta tu ai tsingdu tsingman shing n rai nta ntsa e tu nga ai tsing hpe kahtet kang ai sinpraw nbung e hpe ahpawt kau ai zawn rai ma ai.
27“Rai ti mung nang hpa baw galaw nna gara shara de hkawm sa nga ai na a lam yawng mayawng hte hpe ngai chye nga nngai. Nang ngai hpe gara hku n yun bu ai mung ngai chye nga nngai. 28Na a n'yun bu ai hte gumrawng gumtawng ga ni hpe ngai lu la ni ai. Ya chyawm gaw ngai na a ladi hta lashoi shoi ya nna n-gup hta runghtung bang let nang du sa wa ai lam hku bai nhtang wa shangun na de ai.
29Dai hpang Esaia gaw Hkawhkam Hezekia hpe, “Da ndai gaw hpa byin wa na lam a kumla rai nga ai. Dai ning hte htaning du hkra nang gaw nsi nhpan hpe sha sha lu ti mung, dai shaning ni lai mat wa ai hpang shaning kaw nna gaw nsi naisi ni hpe nang hkai lu nna, dai hpe sha lu na rai ndai; sabyi ru ni hpe mung nang hkai nna sabyi si sha lu na rai ndai. 30Yuda mung hta naw ngam nga ai ni mung kata de sung sung ru jung nna asi si kung dam wa ai hpun zawn gumring gumrat wa na mara ai. 31Yerusalem mare hte Ziun Bum ntsa hta e naw ngam nga ai amyu masha ni gaw dai shara hta prawn wa na mara ai. Hpa majaw nga yang, dai Madu gaw ndai lam hpe shabyin na matu daw dan nga sai. 32“Ndai lam gaw Asuri Hkawseng wa hte seng ai dai Madu tsun da sai mungga rai nga ai: ‘Shi gaw dai mare de shang wa lu na n rai: dai mare kata de pala langai mi pyi gap bang lu na ra ai n rai. Dai mare makau hkan e mung, hpyenla ni hpyen ninggang shaw madun lu na n rai, ga sumpum ni hpe gawan da lu na ra ai n rai. 33Ndai mare kata de n shang lu ai sha, mi na shi sa wa ai lam hku bai nhtang mat wa na ra ai, ngu nna dai Madu tsun wu ai. 34Ngai hkum nan a arawng sadang a matu mung, nye a shangun ma Dawi hpe ngai jaw da sai ga shaka a majaw mung, ndai mare hpe ngai bau sin makawp maga nga na we ai!”
35Dai Madu a lamu kasa gaw dai shana jang Asuri hpyen ni but nga ai dap de sa wa nna, hpyenla sen mi mun matsat hkying manga hte hpe sat kau wu ai. Hpang shani jahpawt jau jau aten hta dai shara e shanhte yawng si taw nga ma ai! 36Dai hpang Asuri Hkawseng Senahkerib gaw htingnut mat wa nna Ninewe mare de nhtang mat wa nu ai. 37Lani mi na aten hta shi gaw shi a karai Nisrok a htingnu kata hta nawku nga yang, shi a kasha Adramelek hte Shareze yan gaw shan a nhtu hte shi hpe kahtam sat kau nna Ararat mung de hprawng mat wa wu ai; kaga shi a shadang sha ngu na Esahadon mahtang shi a tingnyang hta hkawseng hku nna hkaw dung nga ai.
Currently Selected:
2 HKAWHKAM 19: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
