2 HKAWHKAM 13
13
Israela Hkawhkam Yehoahaza
1Yuda Hkawhkam Ahazia a kasha Yosha hkaw dung ai hkun masum ning hta Yehu a kasha Yehoahaza gaw Israela hkawhkam tai wa sai rai nna Samari mare e hkaw dung let shi sanit ning up nga ai. 2Shi a shawng na Hkawhkam Yeroboam zawn Israela masha ni hpe yubak lam de lam woi shadam nna dai Madu hpe shut hpyit kau wu ai. Shi galaw ai n hkru n shawp ai amu hpe galoi mung n lu koi kau lu wu ai. 3Dai rai nna, dai Madu gaw Israela hpe masin pawt wu ai rai nna Suri Hkawhkam Hazaela hte shi a kasha Benhadad a lata hta lang hte lang Israela masha ni hpe gasat dang kau lu na ahkang jaw wu ai. 4Dai hpang Yehoahaza gaw dai Madu kaw akyu hpyi wu ai rai nna Israela masha ni hpe Suri hkawhkam wa laja lana rai gade wa zingri zingrat dip gamyet sha nga ai hpe dai Madu mu jang shi a akyu hpyi ga hpe htan ya wu ai. 5Dai Madu gaw Suri masha ni a lata kaw nna shanhte hpe shalawt dat na ningbaw langai Israela hpang de shangun dat ya wu ai rai nna, shawng de na zawn ngwi pyaw sim sa ai hte shanhte shanu nga lu ma ai. 6Rai ti mung dai Israela masha ni hpe lam woi shadam ai Hkawhkam Yeroboam a yubak hpe shanhte n koi yen lu nga ma ai; dai hta shanhte shut hpyit nga ding yang rai nga ai hta, Samari mung e Ashera karai num a gawkngu sumla hpe mung naw nga nga ai.
7Suri hkawhkam gaw naw ngam nga ai masha ni hpe shamyit kau nhtawm shanhte hpe ga nhpu zawn kabye anut kau mu ai majaw gumra jawn ai masha manga shi, hpyen leng shi hte lagaw dap hpyenla mun mi shangam da ya ai hta kaga Yehoahaza hta laknak hpai ai hpyen dap hpa mung n lu nga wu ai.
8Yehoahaza galaw nu ai amu magup ngu na shi a share shagan ai sat lawat ni a lam hpe Israela Hkawhkam ni a Labau Laika hta ka matsing da nga ai. 9Shi si mat sai rai nna, Samari mare e lup makoi da nga ma ai; shi a kasha Yehoasha gaw shi a hkang hta hkaw dung let hkawhkam tai wa nu ai.
Israela Hkawhkam Yehoasha
10Yuda Hkawhkam Yoasha hkaw dung ai sumshi sanit ning hta Yehoahaza a kasha Yehoasha mung Israela hkawhkam tai wa nhtawm Samari e hkaw dung let shi kru ning up nga ai. 11Shi mung Israela masha ni hpe yubak lam de lam woi shadam ai Hkawhkam Yeroboam a n hkru n shawp ai kasi hta hkan nang let dai Madu hpe yubak grai galaw shut kau nga wu ai. 12Yehoasha galaw nu ai amu magup ngu na Yuda Hkawhkam Amazia hpe hkap gasat yang na shi a share shagan ai magam ni hpe Israela Hkawhkam ni a Labau Laika hta ka matsing da nga ai. 13Yehoasha si mat sai rai nna Samari mare na hkawhkam lupwa hta lup makoi da ma ai; shi a kasha Yeroboam II gaw shi a hkang hta hkaw dung let hkawhkam tai wa sai.
Elisha Si Mat Ai
14Myihtoi Elisha gaw si lu na daram re ai ana ahkya hte machyi hkrum sha nga ai; shi kaleng taw nga yang Israela Hkawhkam Yehoasha shi kaw sa du kawan wu ai. Shaloi shi hkrap let, “Nye wa e, nye wa e, nang gaw Israela a matu chyalai n-gun hte hpring ai dahpran shara rai nga nit dai law,” ngu nna jahtau tsun wu ai. #2Hk 2:12.
15Elisha gaw, “Ndan langai hte pala loi mi la wa rit,” ngu nna hkang dat wu yang, Yehoasha mung dai ni hpe la wa ya wu ai. 16Elisha gaw shi hpe ndan shachyen tawn u ngu yang, hkawhkam wa shachyen da wu ai. Shaloi Elisha gaw shi a lata hpe hkawhkam wa a lata ntsa hta mara da wu ai. 17Myihtoi wa tsun matsun ai hte maren, hkawhkam wa mung Suri mung maga de man yawng ai hkuwawt hku hpe hpaw dat wu yang Elisha gaw pala gap dat u,” ngu nna hkang dat wu ai. Hkawhkam wa pala gap dat ai shaloi jang, myihtoi wa gaw, “Nang gaw dai Madu a pala rai nga ndai; dai hte Suri mung hpe dang kau ai awng padang hkam la lu na ra ai. Shanhte hpe nang dang kau ai aten du hkra Suri masha ni hpe Ahpek mare e nang gasat kau na ndai,” ngu nna tsun wu ai.
18Dai hpang Elisha gaw hkawhkam wa hpe kaga pala ni hpe mung la nhtawm ga hta kayat kau na lam tsun wu ai. Hkawhkam wa mung, ga hta masum lang kayat nna tawn kau wu ai. 19Shing re ai a majaw Elisha masin pawt wu ai rai nna hkawhkam wa hpe, “Nang manga kru lang kayat ang nga ndai law; dai rai yang Suri masha ni hpe tsep kawp dang kau lu na rai nga ndai; rai ti mung ya chyawm gaw nang shanhte hpe masum lang sha dang kau lu na rai ndai,” ngu nna tsun wu ai.
20Elisha si mat sai rai nna lup makoi da mu ai.
Moba masha hpung mi gaw Israela mung hpe shaning shagu shang gasat chye nga ma ai. 21Lani mi na moi mang jahkrat ai aten hta, Moba masha gumlau hpung ni hpe mu ma ai rai nna, masha ni gaw dai mang hpe Elisha a lup kata de kabai bang nna kagat mat wa ma ai. Shaloi dai si mang gaw Elisha a nrut nra ni hte sa hkra ai shaloi jang shi hkrung wa nna rawt tsap nga ai.
Israela Hte Suri A Lapran E Byin Ai Majan
22Suri Hkawhkam Hazaela gaw Yehoahaza hkaw dung ai prat tup, Israela masha ni hpe zingri zingrat di da wu ai. 23Rai ti mung Abraham, Isak, Yaku ni hte tawn da ai ga shaka a majaw dai Madu gaw shanhte hpe matsan yu dum nga wu ai. Shi gaw shanhte hpe n jahten shamyit hkrum shangun mayu nga ai rai nna shanhte hpe karum la mu ai. Shi a amyu masha ni hpe shi galoi mung malap kau nga ai n rai.
24Ya Suri Hkawhkam Hazaela si mat sai rai nna shi a kasha Benhadad hkawhkam tai wa sai. 25Israela Hkawhkam Yehoasha gaw Benhadad hpe masum lang gasat dang kau ai rai nna, Yehoasha a kawa Yehoahaza hkaw dung ai laman Benhadad e gasat dang la kau ya ai mare ni hpe bai dawm la lu wu ai.
Currently Selected:
2 HKAWHKAM 13: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
