1 SAMUELA 8
8
Amyu Masha Ni Hkawhkam Hpyi Ai
1Samuela dingla wa ai shaloi, shi a kasha yan hpe Israela mung hta tara agyi dang da wu ai. 2Kasha alat a mying gaw Yoela rai nga ai; kaji ai wa a mying gaw Abiya rai nga ai; shan lahkawng gaw Berasheba shara e tara agyi tai nga ma ai. 3Rai ti mung shan gaw kawa a kasi hta n hkan ai sha, gumhpraw marin ai amu hta chyu sha myit lawm shajang ma ai; mayun kumhpa ni hpe shan hkap la ma ai majaw amu ni hpe teng man ai hku n daw dan ya lu ma ai.
4Dai hpang, Israela ningbaw ni yawng jawm hkrum zup nhtawm Rama e nga ai Samuela hpang de sa nna, 5shi hpe, “Yu u, nang dingla wa nga ndai; na a kasha yan mung na a kasi n hkan nga ma ai. Dai rai nna, kaga mungdan ni lu ai zawn anhte hpe up hkang na hkawhkam langai mi ra ga ai majaw hkawhkam san da ya mi,” ngu nna tsun ma ai. #Trj 17:14. 6Hkawhkam langai ra ga ai nga nna shanhte hpyi ai ga hpe Samuela n ra sharawng wu ai majaw dai Madu kaw shi akyu hpyi wu ai, 7dai Madu gaw, “Amyu masha ni nang hpe tsun ai lam magup hpe madat u, shanhte nang hpe kau ai n rai; shanhte a hkawhkam n tai na hku shanhte kau ai gaw ngai mahtang she rai nga nngai. 8Ngai shanhte hpe Egutu mung kaw nna woi shapraw wa ai shani kaw na shanhte ngai kaw na kayin mat wa nhtawm kaga hpara ni hpe nawku ma ai; ngai hpe galoi mung shanhte dai hku galaw ma ai zawn ya mung nang hpe dai hku galaw nga ma ai. 9Dai rai nna, shanhte a ga hpe madat ya u, rai ti mung shanhte a hkawhkam ni shanhte hpe kaning di wa na lam hpe chyawm gaw atsawm sha sang lang dan nna shanhte hpe ja ja sadi jaw u,” ngu nna tsun wu ai.
10Samuela gaw hkawhkam langai hpyi nga ai amyu masha ni hpe dai Madu shi hpe tsun dan nu ai lam magup tsun dan wu ai. 11Samuela gaw, “Ndai gaw nanhte a hkawhkam wa nanhte hpe kaning rai galaw na sat rai nga ai. Shi gaw nanhte a shadang sha ni hpe hpyenla galaw shangun na ra ai; shanhte hta na nkau mi gaw shi a hpyen leng ni hta shang galaw nhtawm, kaga ni gaw gumra dap hta shang na rai ma ai; kaga ni mung gumra leng ni a shawng e kagat na rai ma ai. 12Shi gaw shanhte hta na nkau mi hpe masha hkying mi up na du salang ni, masha manga shi up na du salang ni, shatai na rai wu ai. Nanhte a shadang sha nkau mi gaw shi a yi hkauna galau, shi a nai mam nsi naisi shu na hte shi a gumra leng ni a matu hkinghku shachyaw ai hte hpyen laknak ni hpe galaw shangun na rai wu ai. 13Nanhte a shayi sha ni hpe chyawm gaw shi a matu manam pyaw ai baw lajang shangun na rai wu ai; bai shat shadu ai ni, muk kabaw ai ni shatai na ra ai. 14Nanhte kaw na kaja htum ai yi hkauna, sabyi sun hte tsanlun sun ni hpe shi la nhtawm shi a du salang ni hpe jaw na rai wu ai. 15Nanhte a nsi naisi hte sabyi htam shi hta na htam mi hpe shi a tara rung na du salang ni hte kaga du salang ni a matu hta la na rai wu ai. 16Shi gaw nanhte a shangun ma ni hte kaja htum ai nanhte a yam nga dumsu ni hte lawze ni la nhtawm shi a matu amu galaw shangun na ra ai. 17Shi gaw nanhte a yam nga hpung ni hta na htam shi hta na htam mi la na ra ai; nanhte nan mung shi a mayam ni tai na marin dai. 18Dai aten du jang nanhte nan lata la manit dai dai nanhte a hkawhkam wa a majaw ahkup ahka nga mat hkra nanhte aput angun na marin dai, rai ti mung dai Madu gaw nanhte a aput angun ai lam ni hpe madat ya na wu ai n rai,” ngu nna tsun shaleng dan wu ai.
19Amyu masha ni chyawm gaw Samuela a ga hpe hpa zawn n nawn ya ai sha, “N rai law! Anhte hkawhkam langai ra ga ai; 20anhte hpe up hkang na mung, majan hta anhte hpe woi awn na mung, anhte hpe majan woi gasat na anhte a hkawhkam hte nan rau rai nga ga yang gaw kaga masha amyu baw ni hte zawn anhte bung wa na ga ai,” ngu nna tsun ma ai. 21Samuela gaw shanhte tsun ai lam magup hte hpe madat la nhtawm dai Madu hpe sa tsun dan wu ai. 22Dai Madu mung, “Shanhte ra ai hku galaw ya u, shanhte hpe hkawhkam langai jaw u,” ngu nna htan wu ai. Dai hpang Samuela gaw Israela amyu masha ni yawng nta de bai wa na matu tsun dat wu ai.
Currently Selected:
1 SAMUELA 8: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
