1 SAMUELA 3
3
Dai Madu Gaw Samuela Kaw Dan Pru Ai
1Ma Samuela gaw Eli a matsun madun ai hku dai Madu hpe daw jau nga ai dai prat e, dai Madu kaw na mungga ni nau wa n pru, shi kaw na shingran ni mung nau wa n du rai nga ai. 2Lana mi na aten hta, ganoi noi myi n mu wa sai Eli gaw shi a gawk hta yup nga ai; 3Samuela mung chyoi pra ai Ga Shaka Sumpu nga ai chyoi pra ai shara hta yup nga ai. Shaloi jahpawt nhtoi garai n htoi, pyengdin naw chyi nga yang, 4dai Madu gaw Samuela hpe shaga wu ai. Shi gaw, “Rai sa, Madu e!,” ngu nna htan nhtawm, 5Eli hpang de gat wa let, “Nang ngai hpe shaga ndai, ndai yang e ngai nga nga nngai,” ngu nna tsun wu ai.
Rai ti mung, Eli mahtang, “Ngai nang hpe n shaga nngai; yup ra de nhtang wa su,” ngu nna htan wu ai. Dai rai nna Samuela mung yup ra de bai shang mat wa wu ai.
6-7Dai Madu gaw Samuela hpe bai shaga wu ai. Dai Madu mahtang shi hpe galoi mung garai n shaga yu wu ai majaw Madu rai nga ai lam hpe dai ma n chye nga ai. Dai rai nna, shi rawt nhtawm Eli hpang de sa nna, “Nang ngai hpe shaga ndai, ndai yang e ngai nga nga nngai,” ngu nna tsun wu ai.
Rai ti mung, Eli gaw, “Ngai sha e, ngai nang hpe n shaga nngai, yup ra de nhtang wa su,” ngu nna htan wu ai.
8Dai Madu mung masum lang ngu na Samuela hpe shaga wu ai. Shaloi shi rawt let Eli hpang de sa nna, “Nang ngai hpe shaga ndai, ndai yang e ngai nga nga nngai,” ngu nna tsun wu ai.
Dai hpang, Eli gaw ma hpe shaga nga ai wa gaw dai Madu rai nga ai hpe dum chye wa wu ai rai nna; 9shi gaw ma hpe, “Yup ra de nhtang wa su; shi nang hpe bai shaga yang, ‘Madu e, tsun rit, na a shangun ma wa madat nga nngai,’” ngu nna tsun u, ngu wu ai. Dai rai nna Samuela mung yup ra de shang mat wa wu ai.
10Dai Madu gaw sa nna dai yang e tsap let shawng na zawn, “Samuela! Samuela!,” ngu nna shaga wu ai.
Samuela mung, “Tsun rit, na a shangun ma wa madat nga nngai,” ngu nna htan wu ai.
11Dai Madu gaw shi hpe, “Lani mi na aten hta, ngai gaw Israela amyu masha ni hpe lama mi galaw dan na nngai, dai gaw grai hkrit hpa rai nna, de a lam na mana ni sai kajawng mat na mara ai. 12Dai shani e, Eli a dinghku hpe ninghkap na matu, ngai jahkrit shama ai lam yawng nnan hpang ai kaw nna ngut kre ai aten du hkra ngai shapraw dan na we ai. 13Shi a kasha yan ngai hpe n shawp ai ga tsun kau manu ai; dai zawn galaw ai hpe Eli chye nga ti mung shan hpe n hkum kau ai majaw shi a dinghku masha ni hpe htani htana ari jaw na ngu nna ngai shi hpe tsun se ai. 14Dai rai nna, shagu hkungga hte mung, shadung hkungga hte mung ndai hkrit hpa yubak mara hpe galoi mung n shaprai kau lu na sai ngu nna, Eli a dinghku masha ni hpe ngai dagam kau nngai,” ngu nna tsun wu ai.
15Samuela gaw jahpawt du hkra yup ra e nga nga wu ai; dai hpang shi rawt nhtawm dai Madu a nta chyinghka ni hpe hpaw wu ai. Dai shingran Eli hpe tsun dan na shi hkrit nga ai. 16Eli gaw shi hpe, “Ngai sha, Samuela e!,” ngu nna shaga wu ai.
Samuela mung, “Rai sa, Madu e,” ngu nna htan wu ai.
17Eli mahtang, “Dai Madu nang hpe hpa lam tsun a ta? Ngai hpe tsun dan na hpa mung hkum ip da et. Shi tsun matsun nang ngai hpe n tsun dan ai rai yang, Karai Kasang nang hpe laja lana re ai ari jaw na ra ai,” ngu nna san wu ai. 18Dai rai nna, Samuela gaw lama mi mung n ip da ai sha, shi hpe lam magup tsun dan wu ai. Eli chyawm gaw, “Shi gaw dai Madu rai nga ai; shi hta kaja htum ai hku shi galaw na ra ai,” ngu nna tsun ai.
19Samuela kaba wa sai rai nna, dai Madu gaw shi hte rau rai nga ai; Samuela tsun ai lam teng nga ai rai nna lam magup hpe galaw ya wu ai. 20Dai rai nna, Samuela gaw teng teng dai Madu a myihtoi rai nga ai hpe mungdan a jahtum shara mi kaw nna kaga shara mi de du hkra nga nga ai Israela amyu masha ni yawng chye ma ai. 21Samuela kaw dan pru yu nna shi hte ga shaga yu sai Shilo shara hta dai Madu gaw shi hkum nan matut dan pru nga ai. Samuela ga shaga ai shaloi Israela masha nlang ni madat nga ma ai.
Currently Selected:
1 SAMUELA 3: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
