1 HKAWHKAM 14
14
Yeroboam A Kasha Si Mat Ai Lam
1Dai aten hta Hkawhkam Yeroboam a kasha Abiya machyi nga ai. 2Yeroboam gaw shi a madu jan hpe, “Kadai mung nang hpe n chye yu matsing hkra, na hkum hpe makoi magap di nna, ngai hpe Israela hkawhkam tai wa na re nga nna tsun ai myihtoi Ahiya shanu nga ai Shilo mare de sa wa su. 3Shi a matu muk tawng shi, muk pa nkau mi hte lagat ntsin namtau ni mung la sa ya u. Shing rai an a kasha hpa byin wa na ra ai lam shi hpe san u, shaloi shi nang hpe tsun dan na ra ai,” ngu nna tsun wu ai.
4Dai rai nna madu jan gaw Shilo mare e nga ai Ahiya a nta de sa wa wu ai. Ahiya gaw asak kaba nna myi amam ai hte n mu lu nga ai. 5Yeroboam a madu jan mahtang machyi nga ai shi kasha a lam hte seng nna sa san na nga, dai Madu shi hpe tsun dan wu ai. Dai Madu gaw Ahiya kaning ngu hkap tsun na lam tsun dan wu ai.
Ya Yeroboam a madu jan du jang kaga masha langai mi zawn nga masu dan wu ai. 6Rai ti mung dai numsha chyinghka lam kata de shang wa nga ai hpe Ahiya na jang, shi gaw, “Shang wa rit. Nang Yeroboam a madu jan rai nga ndai hpe ngai chye nngai. Nang hpa majaw kaga masha langai mi zawn masu dan nga n ta? Ngai gaw na a matu n kaja ai shiga lu nga nngai. 7Yeroboam hpe wa tsun su; ndai gaw dai Madu Israela a Karai Kasang shi hpe tsun ai ga rai nga ai: ‘Nye a amyu masha Israela hpe up hkang na matu amyu masha ni hta na ngai nang hpe lata la ni ai. 8Dawi amyu matu ni a lata kaw na mungdan hpe ngai dawm la nhtawm nang hpe jaw ni ai. Rai ti mung nang chyawm gaw ngai hta tsep kawp sadi dung nna nye a hkang da ai ga ni hpe madat mara let, ngai shagrin da ai amu hpe chyu sha galaw ai nye a shangun ma Dawi zawn n rai nga ndai. 9Na a shawng e up hkang ai ni hta nang shut hpyit kau ai yubak mara gaw grau kaba nga ai. Nang gaw ngai hpe shinggan kau nhtawm nawku na matu hpara sumla ni hte nhprang gawkngu hkrang sumla ni galaw let ngai hpe pawt bu shangun nga ndai. 10Shing re ai amu a majaw, na a hkawhkam dap matu ni a ntsa e ru yak tsin-yam tsindam shapraw dat nna, lasha matu mara hta na kaji kaba yawng hpe sat kau na we ai. Na a dinghku hpe ngai yeng kau na nngai; shing rai shanhte gaw nga hkyi hpe zawn ye kau ai hkrum na mara ai.#1Hk 15:29. 11Na a dinghku masha kadai mung mare kata e si ai rai yang gwi ni e sha kau ai hkrum na mara ai. Pa layang hkan si mat ai ni kadai mung langda e sha kau ai hkrum na rai nga ai. Dai ga hpe ngai Madu nan tsun ni ai,’” ngu nna tsun wu ai.
12Ahiya gaw Yeroboam a madu jan hpe, “Ya chyawm gaw nta de nhtang wa su; mare de nang shang wa ndai shaloi na a kasha si mat na ra ai. 13Israela amyu masha ni yawng shi hpe sharung shayawt ma ai hte makoi mayang na mara ai. Shi chyu sha dai Madu Israela a Karai Kasang a awng sharawng hkrum nga ai wa re majaw Yeroboam a dinghku masha ni hta na shi chyu sha htap htuk ai hku makoi mayang ai hkrum na rai wu ai. 14Yeroboam a hkawhkam dap matu hpe jahtum kau ya nna hkawhkam langai Israela a ntsa e dai Madu shadun da na ra ai. 15Dai Madu gaw Israela hpe ari jaw na ra ai rai nna dai mungdan gaw mai-aw gaw hka shi a ntsa e kanga nga ai zawn ashun mat na ra ai. Shi gaw shanhte a kaji kawa ni hpe jaw da sai dai kaja ai mungdan kaw nna Israela amyu masha ni hpe baw kau nhtawm Uhprat hka nu lai hkra shanhte hpe shabra kau na ra ai; hpa majaw nga yang, shanhte gaw Ashera karai num a hpara sumla ni hpe galaw shapraw let ngai hpe pawt shangun nga ma ai. 16Yeroboam gaw yubak mara shut hpyit nhtawm Israela amyu masha ni hpe yubak lam de woi hkawm sa wa ai majaw dai Madu gaw Israela hpe kau da na ra ai,” ngu nna tsun wu ai.
17Yeroboam a madu jan gaw Tiza mare de nhtang wa wu ai. Shi a nta de shang wa ai hte dai ma si mat sai. 18Dai Madu gaw shi a shangun ma myihtoi Ahiya hpe tsun nu ai hte maren, Israela amyu masha ni yawng shi a matu sharung shayawt ai hte shi hpe lup makoi da mu ai.
Yeroboam Si Mat Ai Lam
19Hkawhkam Yeroboam galaw nu ai lam magup shagu ngu na, shi gasat lai wa sai majan ni a lam hpe mung, mungdan hpe gara hku up hkang ai lam yawng hpe mung, Israela Hkawhkam ni a Labau Laika hta ka matsing da nga ai. 20Yeroboam gaw hkun lahkawng ning tup hkaw dung nna up hkang nga ai. Dai hpang si mat ai hte lup makoi da nga sai. Shi a kasha Nadab mahtang shi a hkang hta hkawhkam tai wa sai.
Yuda Hkawhkam Rehoboam
(2Hl 11:5-12:15)
21Shawlumon a kasha Rehoboam gaw asak mali shi langai ning du jang she, Yuda Hkawhkam tai wa ai rai nna dai Madu hpe nawku na matu Israela mungdan ting hta na shi lata la ai Yerusalem mare hta shi sanit ning tup up hkang nga ai. Rehoboam a kanu gaw Amon mung na Nama rai nga ai.
22Yuda amyu masha ni mung shanhte a kaji kawa ni yawng galaw shut kau ai amu hta grau nna dai Madu hpe shut hpyit kau mu ai hte shi hpe pawt sindawng shangun nga ma ai. 23Shanhte gaw n teng n man ai karai ni a matu nawku shara ni hpe gap nhtawm kawng ntsa hkan na shingnip hpun npu hkan e mung Ashera hkrang sumla ni hpe nawku na matu nlung shadaw ni hpe jung da nga ma ai.#2Hk 17:9-10. 24Yawng hta n kaja htum ai amu gaw ndai tara maigan masha ni a nawku shara ni hta shawa la shawa num ni nga nga ma ai. Yuda amyu masha ni gaw Israela masha ni mungdan kata de rawt shang bang wa ma yang, dai Madu mungdan kata kaw nna gawt shapraw kau hkrum ai masha ni galaw ai kaya kahpa amu ni yawng hpe hkan galaw nga ma ai.#Trj 23:17.
25Rehoboam hkaw dung ai manga ning hta Egutu Hkawhkam Shishak gaw Yerusalem mare hpe sa htim gasat wu ai. 26Shi gaw Hkawhkam Shawlumon galaw da ai ninggang ni lawm mat hkra Nawku Htingnu hte hkawhkam htingnu kata na sut gan ni yawng hpe magawn la mat wa wu ai.#1Hk 10:16-17; 2Hl 9:15-16. 27Dai ni a malai Hkawhkam Rehoboam gaw magri mang ninggang ni hpe galaw nhtawm hkawhkam htingnu chyinghka ni hpe sin na lit lu ai du salang ni a lata de ap ya wu ai. 28Hkawhkam wa Nawku Htingnu de shang ai aten shagu, sin langa ni dai ninggang ni hpe hpai ma ai. Dai hpang shanhte a sin langa gawk de nhtang mat wa wa rai ma ai.
29Hkawhkam Rehoboam galaw nu ai lam magup shagu hpe Yuda Hkawhkam ni a Labau Laika hta ka matsing da nga ai. 30Dai aprat laman hte yang, Rehoboam hte Yeroboam yan gaw shada da majan ayan gasat hkat ma ai. 31Rehoboam si mat sai rai nna, Dawi a Mare na hkawhkam ni hte seng ai lupwa hta lup makoi da mu ai. Shi a kasha Abiya mahtang shi a hkang hta hkaw dung let hkawhkam tai wa sai.
Currently Selected:
1 HKAWHKAM 14: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
