1 KORINHTU 2
2
Wudang Hta Si Hkam Ai Hkristu Hte Seng Ai Mungga
1Hpu nau ni e, Karai Kasang a makoi magap da ai teng man ai mungga hkaw tsun dan na matu ngai nanhte kaw sa du ai shaloi, reng ai ningtam ga kaba ni hte hpaji byeng-ya hte seng ai ga kaba ni hpe ngai n lang nngai. 2Hpa majaw nga yang, ngai nanhte hte rau nga nga ai ten hta, Yesu Hkristu a lam, grau nna wudang ntsa e Madu si hkam ai lam hta jan nna kaga lam nga manga hpe malap kau na matu ngai myit daw dan da se ai. 3Dai rai nna, ngai nanhte kaw sa du nga ai ten hte ting hta gawng kya ai hte hkrit gari let,#Kas 18:1,6,12; 2Ko 4:7; Gal 4:13. 4nye a tsun sharin shaga ai lam hte hkaw tsun ai mungga ni hpe masha a hpaji byeng-ya ladat hte seng ai ga ni hpe n lang ai sha, Karai Kasang a Wenyi atsam lawm ai ga ni hpe sha lang nngai. 5Dai re ai majaw, Karai Kasang hpe nanhte kam sham ai lam gaw, masha a hpaji byeng-ya hta n shamyet shanat ai sha, Karai Kasang a Wenyi atsam hta shamyet shanat grin nga ai.
Karai Kasang A Hpaji Byeng-Ya
6Rai ti mung ngai gaw, Wenyi makam masham lam hta myit su kunghpan sai ni hpe hpaji byeng-ya hte kapyawn nna tsun dan nngai. Rai ti mung dai gaw ndai mungkan ga hte seng ai hpaji byeng-ya n rai; mungkan ga na du ni a hpaji byeng-ya atsam mung n rai; mungkan du ni a n-gun atsam gaw sum mat wa magang nga ai. 7Ngai hkaw tsun ai hpaji byeng-ya gaw masha amyu ni n mu n chye hkra makoi magap da ai Karai Kasang a sung htum ai hpaji byeng-ya a lam rai nga ai. Dai gaw ginding aga garai n lat kaw nna anhte hpung shingkang hkam la na matu Karai Kasang tawn da ai yaw shada ai lam rai nga ai. 8Mungkan a du hkawhkam ni hta na kadai wa mung ndai hpaji byeng-ya hpe chye ma ai n rai; chye taw gaw, hpung shingkang rawng ai Madu hpe shanhte wudang hta jen da na ma ai n rai.#Yhn 7:47; Kas 13:27; 2Ko 3:14. 9Rai ti mung Chyum Laika hta,
“Kadai n mu n na yu ai lam,
byin na re ai ngu nna kadai n myit hkawn pru ai lam hpe
Karai Kasang gaw shi hpe tsaw ra ai ni a matu mara lajang da nga ai,” nga nna ka da nga ai.#Esa 64:4.
10Karai Kasang chyawm gaw shi a Wenyi hku nna shi a makoi magap da ai lam anhte hpe shapraw shadan dan mi ai. Dai Wenyi gaw arai yawng mayawng hpe sha n rai, Karai Kasang a sung htum ai hte makoi magap da ai shatawng shada ai lam ni hpe pyi manaw sawk yu nga ai. 11Masha langai mi a lam nga manga hpe dai wa a kata hta rawng ai shi nan a wenyi chyu sha chye lu nga ai, dai hte maren Karai Kasang a Wenyi chyu sha Karai Kasang a lam chye lu nga ai. 12Anhte chyawm gaw ndai mungkan hte seng ai wenyi hpe hkam la saga ai n rai, Karai Kasang anhte hpe jaw da ai chyeju nlang hte hpe lu la u ga, Karai Kasang e shangun dat ai Wenyi hpe hkam la saga ai.
13Dai re ai majaw, Wenyi hpe hkam la sai ni hpe Wenyi hte seng ai teng man ai lam ni hpe hkaw tsun htai dan ai shaloi, anhte gaw masha a hpaji ga ni hte n tsun shaga ai sha, Wenyi e sharin shaga ai ga ni hte she tsun shaga ga ai. 14Dai Wenyi hpe n hkap la ai, mi na ta naw re ai shinggyim masha kadai mung, Karai Kasang a Wenyi e jaw ai chyeju kumhpaw kumhpa ni hpe n hkam la lu nga ai. Dai ni gaw shi a matu angawk angak lam rai nga ai rai nna, Wenyi myit e sha dai lam ni a manu hpe daw dan ya lu nga ai majaw, shi gaw dai hte hpe chye na lu ai n rai. 15Wenyi rawng ai wa chyawm gaw arai yawng mayawng a manu rawng ai lam hpe daw dan lu nga ai; shi hpe mahtang gaw kadai e mung daw dan lu ai n rai. 16Dai Chyum Laika hta,
“Kadai wa mi dai Madu a myit hpe chye lu a ni?
Kadai wa mi shi hpe hpaji jaw sharin achyin ya lu a ni?,” nga nna ka da nga ai hte maren rai nga ai.
Anhte chyawm gaw Hkristu a myit hpe lu ai ni rai nga ga ai.#Rom 14:8; 2Ko 10:7; Gal 3:29.
Currently Selected:
1 KORINHTU 2: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.