1 HKAWHKAM LABAU 15
15
Ga Shaka Sumpu Htawt La Na Matu Shajin Ai
1Dawi gaw shi a matu Dawi a Mare hta nta ni gap da wu ai. Karai Kasang a Ga Shaka Sumpu hpe tawn da na shara langai mi hkyen nna dai hta sum langai gap da wu ai. 2Dai rai nna Dawi gaw, “Lewi masha ni gaw Ga Shaka Sumpu hpe hpai na hte shi hpe htani htana daw jau na matu dai Madu lata san da nu ai rai nga ai majaw Lewi masha ni chyu sha dai Sumpu hpe hpai na rai ma ai,” ngu nna tsun wu ai. #Trj 10:8. 3Dai rai nna Dawi gaw Ga Shaka Sumpu hpe de a matu shi hkyen lajang da ai shara de hpai da na nga, Israela amyu masha ni yawng Yerusalem mare de sa hpawng na matu hkang dat wu ai. 4Dai hpang shi gaw Arun a amyu matu ni hte Lewi masha ni hpe mung shaga shangun dat wu ai. 5Lewi amyu Kohat lakung hta na Uriela gaw shi a amyu lakung hta na masha 120 a hpareng rai nga ai. 6Merari lakung hta na Asaia gaw masha 220 hte a hpareng rai nga ai; 7Gershon lakung hta na Yoela gaw masha 130 a hpareng rai nga ai; 8Elizahpan lakung hta na Shemaia gaw masha 200 a hpareng rai nga ai; 9Hebron lakung hta na Eliela gaw masha 80 a hpareng rai nga ai; 10Uziela lakung hta na Aminadab gaw masha 112 a hpareng rai nga ai.
11Dawi gaw hkinjawng ni hta na Zadok hte Abiahta hpe mung, kaga Lewi masha kru rai nga ai Uriela, Asaia, Yoela, Shimea, Eliela hte Aminadab ni hpe shaga la wu ai. 12Shi gaw Lewi masha ni hpe, “Nanhte gaw Lewi amyu lakung lama ni a ningbaw ni rai nga myit dai. Dai Madu Israela a Karai Kasang a Ga Shaka Sumpu hpe de a matu hkyen lajang da ya ai shara de hpai la na matu nanhte hte nanhte a Lewi kahpu kanau ni tinang hkum jasan jaseng da mu. 13Shawng na lang hpai ai shaloi dai yang e nanhte n lawm nga myit dai hte anhte galaw ang ai hte maren, shi hpe n nawku ai majaw dai Madu anhte a Karai Kasang anhte hpe ari jaw mi ai,” ngu nna tsun wu ai.
14Dai hpang hkinjawng ni hte Lewi masha ni gaw dai Madu Israela a Karai Kasang a Ga Shaka Sumpu hpe hpai sit na matu shanhte a hkum ni hpe jasan jaseng nga ma ai. 15Dai Madu gaw Mawshe a ga hku nna hkang da nu ai hte maren, Lewi masha ni gaw kandang hte shanhte a lahpa hta hpai ma ai. #Pru 25:14.
16Dawi gaw kabu gara ai myit hte mahkawn mangoi chye nna sumpyi, doria, tingse, shupsheng chye dum ai Lewi masha ni hpe san da na matu Lewi ningbaw ni hpe hkang da wu ai. 17-21Amyu lakung ni hta na mahkawn mangoi chye ai ni gaw magri htoi shupsheng ni dum na matu, Yoela a kasha Heman hpe mung, shi a jinghku hta na Berehkia a kasha Asap, Merari lakung lama hta na Kushaia a kasha Ehtan ni hpe san da ma ai. Shanhte hpe karum na matu dawraw tingse nsen tsaw chye dum ai Lewi masha ni rai nga ai Zehkaria, Yaziela, Shemiramot, Yehiela, Uni, Eliaba, Masea hte Benaia ni hpe shanhte lata ma ai.
Dawraw tingse nsen nem chye dum ai Lewi masha ni hpe mung lawu de na hte maren lata san da nga ma ai; dai ni gaw Matihtia, Elihpelehu, Miknea, Azazia hte Nawku Htingnu sin ai Obed Edom hte Yeiela hte rai ma ai.
22Mahkawn mangoi lam hta kung kyang ai a majaw Hkenania gaw Lewi mahkawn mangoi masha ni hpe woi awn na matu lata san da hkrum nga ai. 23-24Berehkia hte Elkana yan hte rau Obed Edom hte Yehia hte gaw Ga Shaka Sumpu sin na matu lata san da hkrum nga ma ai. Hkinjawng ni rai nga ai Shebania, Yoshahpat, Nehtanela, Amasai, Zehkaria, Benaia hte Elieza hte gaw Ga Shaka Sumpu a man e pahtau dum na matu lata la ai hkrum ma ai.
Ga Shaka Sumpu Hpe Yerusalem De Htawt Sit Ai
(2Sa 6:12-22)
25Dai rai nna Hkawhkam Dawi, Israela a ningbaw ni hte hpyen dap up hkang ai du ni gaw Ga Shaka Sumpu hpe sa hpai la na nga, shanhte gaw Obed Edom a nta de sa nna poi kaba galaw ma ai. 26Shanhte gaw Ga Shaka Sumpu hpai ai Lewi masha ni hpe Karai Kasang karum na wu ai hpe chye wa lu hkra, usu sanit, sagu sanit nawng ya mu ai. 27Dawi gaw mani tsawm ai lachyit sumpan hte chywi ai ntsa palawng langai hpun wu ai rai nna mahkawn mangoi ai ni mung, mahkawn mangoi woi awn ai ningbaw Hkenania mung, Sumpu hpai ai Lewi masha ni mung hpun ma ai. Dawi gaw lachyit hpahkai lawng hpe mung kahtap hpun da wu ai. 28Dai rai nna Israela masha ni yawng kabu gara jahtau garu let pahke, pahtau hte shupsheng ni dum ai hte tingse, doria ni hpe shangoi nhtawm Ga Shaka Sumpu a hpang hkan gumbawm nang let Yerusalem mare de hpai lung wa ma ai.
29Ya mare kata de dai Sumpu la shang wa nga ma yang, Shawlu a shayi sha Mihkala gaw hkuwawt hku nna mada yu dat wu ai shaloi, Hkawhkam Dawi gaw kabu gara ai hte ka manawt nna gumlawt nga ai hpe mu wu ai majaw, shi hpe hkyet yu rung da wu ai.
Currently Selected:
1 HKAWHKAM LABAU 15: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
