Luk 13
13
Dzikayi bɨku bibi
1Ndili mene yayu, va batu baya tanda ne Zezu ati: «Pilati abuuma batu be Ngalilee ye bangu beme dze ne ukaba bisemi bye Nzambi.» 2Zezu akalule ne bangu ati: «Beyi betsimene nati, batu be Ngalilee be beme buuma babu, batakwe boko besi be Ngalilee mesumu? 3Nyee, me tanda beyi, ni beyi ti nde dzika bɨku bibi, ne beyi betse waa si nda bangu. 4Ya batu iku ne ŋwambi, be ndaku ye ndiki ye silowe ye menaŋwe kule ye bangu bawaa, beyi betsimene nati bangu batakwe boko be Zeluzalemi mamvu mebi? 5Nyee, me tanda beyi, ni beyi ti nde dzika mamvu mebi, ne beyi besi betse waa si nda bangu.»
Ngana ye ŋwili ŋwe nde buta
6Zezu ate bangu ngana ati: «Muutu motu edze ne ŋwili ŋwe kumvu figye ŋwedzi ekuna se kʉba, vʉsa votu wangu aya fumba befinge be ŋwili ŋwaŋwu, ni eke bomo.» 7Wangu ne we ibata kʉba ati: «Lolo bisiwu bya ya bisatu, byami ye fumba mbulu ye figye se ŋwili ŋwu, ni ŋwangu nde buta. Kumaka ŋwangu, ŋwe wanda buma ye ngolu, ye ŋwangu wipika wa niyi?» 8Muutu we ibata kʉba nedzi ati: «Kuŋwu, dzika siwu yi ma ke luma ibila, me somoko mbolise se kati. 9Toko ŋwe tse buta siwu yi ya, ni ti ŋwangu ŋwa ke buta, ma kumaka nda we me tanda.»
Zezu asaka ŋwatu wedze ne ikʉlu vʉsa ve idzundu
10Vʉsa ve idzundu, Zezu edze ne ulakɨse se ndaku ye umbondu. 11Se ndaku ye umbondu yayu, yedze ne ŋwatu we umbiti ŋwe dzika dondoo ne ikʉlu bisiwu iku ne ŋwambi nde sikwe. 12Ye Zezu eyene ŋwatu mene, yedzi ebanga wangu, nedzi ati: «Mama wami, Nzambi asaka we leme.» 13Zezu asatse wangu meboko, palikɨse ye ŋwatu mene esikwe telee, yedzi ekʉmise Nzambi. 14Ni kuŋwu we ndaku ye umbondu akamve ne Zezu esaka ŋwatu wayu vʉsa ve idzundu. Kuŋwu we ndaku ye umbondu awowe ne uŋkuka ati: «Yedzi ne masi untuba me bebe bidzanza, yakayi besaka beyi masi mamu, ni kaka vʉsa ve idzundu.» 15Zezu akalule nedzi ati: «Umpyeli ŋwe beyi ŋwaŋwu! Vʉsa ve idzundu, beyi we nde tuka nyangule bodzi yedzi ne ubapa yangu ne utse noto mangu niza? 16Ŋwatu yu, ni we imbisa dze Ablaami we Sata ekutaka se bisiwu iku ne ŋwambi, tadzi bake nyangule wangu medzisa vʉsa ve idzundu!» 17Ndili ye Zezu ekalule vavu, besi bedze ne mbele nedzi bedze se sonyi. Ni batu besi bedze se itsisa ne mamvu meve me Zezu edze ne upika.
Ngana ye ŋwili ŋwe kumvu mutadi
18Yumana vavu, Zezu atanda ati: «Ukani ve Nzambi ve tala niyi? Yami ituka mikise vangu ne yangu niyi? 19Vangu ve tala ni limbulu lite amene, le muutu ikuna se buka, ye limbulu lalu limene, ye langu liyikwe ŋwili uneni, ye benyodzi bitunga mendaku kule bitatsi.»
20Zezu avele tanda ati: «Yami ituka mikise Ukani ve Nzambi ne yangu niyi? 21Vangu ve tala ni yila yi landise pembe, ŋwatu ti avʉkise yila mene se pembe, ye pembe yi landa.» 22Zezu atse Zeluzalemi. Asuta se bingundu ne membuka ne ulakɨse. 23Muutu motu atanda nedzi ati: «Kuŋwu, batu be Nzambi itse lungise si va ba.» Zezu akalule ne bangu ati: 24«Pikayi singa ne unyinzile se dzasa dze lititi, me tanda beyi beyitsi betse fumba nyinzile, ni nde tse tuka.»
25Ndili ye kuŋwu we ndaku itse telime, wangu atse dziba kutse ne bisapi, ye beyi bitse dze ituna, beyi betse banda ne udzumidze kutse. Ne utanda ati: «Kuŋwu, Kuŋwu, dzumvule besu kutse.» Ni wangu atse kalule ne beyi ati: «Me nde yiba beyi!» 26Ye beyi bitse tanda wangu ati: «Bebe bedza bila, ne unoto buma yotu, we dze ne ulakɨse se mepeyi me bingundu bye besu.» 27Wangu atse tanda ne beyi ati: «Me nde yiba beyi, lawayi nami, beyi bipika mamvu mebi.» 28«Ndili ye beyi bitse yene Ablaami, Izaaki, Zaakobi ne Batu be Nzambi besi se Ukani ve Nzambi, ye bitse yisa beyi ituna, ayayu ni ye beyi bitse lila ne ukweke mɨna.» 29«Batu besi betse yinga kwele ye musa wibala ne boko kwele ye itadzi dzi kwa ne boko kwele ye boko ye sangwe ne boko ye ŋwadzi, bangu besi betse pika itsɨnda dzineni buma yotu se Ukani ve Nzambi, 30yayu, ne batu boko be tima ye bangu bidzi limbisa, betse dze lɨbusu, ne boko be tima ye bangu bidzi lɨbusu, betse dze limbisa.»
Zezu awowe ne batu be Zeluzalemi
31Ndili mene yayu, batu be Falizi boko batsindene kone Zezu, bangu nedzi ati: «Teme wa, tseke, utsɨna ne Elodi Atipasi ifumba buuma we.» 32Zezu akalule ne bangu ati: «Tseke tandayi ne muutu we utsengu nda ve mbakwe wayu, velolo ne yana me panza mimbiti, me saka mibedzu, mbisa yana me mana sadzi yami. 33Ni uve lolo ne yana ne mbisa yana ma tse umbukwe ŋwami, nde uve ti muutu we Nzambi awaa ulayi ne Zeluzalemi.»
34«Batu be Zeluzalemi! Batu be Zeluzalemi! Beyi bebuuma Batu be Nzambi, beyi bebuuma be Nzambi eluma beyi ne memanya. Bidzuku kwee byami ifumba kukise beyi nda susu ikuzume kule baana bedzi, ni ka beyi beke tondo vavu. 35Ee, Nzambi atse lewe ngundu ye beyi. Me tanda beyi, beyi nde tse vele yene me, nzii ne vʉsa ve beyi bitse tanda ati: “Nzambi akaba meve ne muutu we iya ne kumvu ye Kuŋwu.”»
Currently Selected:
Luk 13: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
