Mareke 8
8
Jezu abunuŋa ankama mpwomo ba abalaga
(Lekese se Matye 15.32-39)
1Ma ecugu bya, lembuuru leenini le vuri kugi. Baari kiigi kiila ka baaja kali, Jezu cwoli alwoni a nde ŋa aduga bo ndi: 2«Mi emono obi ma lembuuru li, kabila mono ecugu etari eli bo ali bila mi ŋa bo kiila ka baaja kali. 3Aka mi evuta bo mpila bo mwo kiila kali, bo ba amono obi ma njila, ŋa ake nca bo lala baawa.» 4Alwoni a nde a kaali ŋa nde ndi: «Kuni lebaga bege lempembe eli bo aja ayurugi, nca li biri eli kiila kali?» 5Jezu pizi bo ndi: «Be mpembe kpe?» Bo adugi ndi: «Ncaami.» 6Nde tumi lembuuru ma kaka ma ncye. Amana nde yagi mpembe ncaami, mpi Njyami leve, ka kabi yo ŋa nde mpi alwoni a nde ma ka kaba bo aso. Bo asi bwa. 7Bo kiigi akini ŋa ancu ba akyege. Jezu bwoni ma ancu ŋa dugi ŋa alwoni a nde ma ka kaba jo se. 8Aso aji mva kajii bo. Atoli angara ncaami ma aluuli ma etini beesiili. 9Okorogo kaŋa kiigi ŋa enkuumu ba ankama mpwomo (4.000) ba abalaga. Amana Jezu vuti bo, 10parabu ŋa nde kumi nca vaari bila alwoni a nde, ŋa yeni nca bungu le Dalamanuta.
AFarizi ba apiza mpiri ya ye wa yulu
(Lekese se Matye 16.1-4)
11AFarizi atoyi ŋa abaani ma kawobo bila Jezu ma kayia nde tanga. Bo ba kasaga kamono mpiri ya ye wa yulu. 12Jezu ti nya ŋa kadugi ndi: «Meema leca li lepiza mpiri? Mi eduga be, jaajaa: se kaliimi kamon ba kampa ŋa leca li ŋi!» 13Amana nde cyegi, kumi nca vaari ŋa yeni ma kacu ka lengulu le okeri.
Anganga ma aFarizi bila Erode
(Lekese se Matye 16.5-12)
14Alwoni kiigi amalumuŋa ma kabira mpembe, bo kiigi lempembe lemo bila bo kanca vaari. 15Jezu dugi bo jaa li ndi: «Lesa oyeri! Leka pa ma anganga#8.15 Le levain kamaka anganga ma maalula lempeembe. ma aFarizi bila Erode.» 16Ŋaa alwoni ba kawobo kanca mpanaŋa bo ma bo ba akaami mpembe. 17Jezu kamono bwa ŋa pizi bo ndi: «Meema be lewobo ma be ba lekaami mpembe? Be lekini yuga ŋi? Be leka mono ŋi? Be njala kayuga kali? 18Be ŋa miizi, be leka mono ŋi? Be ŋa acu, be le kayuga ŋi? Be leka ma baraga ŋi? 19Ntini ye mi ka ekabi mpembe taani ma ankama kuumu (5.000) ba abalaga, be angara maaluuli ma etini kpe lebiri?» Ŋa bo akaali ndi: «Kuumu ŋa jwele.» 20«Ŋa ntini ye mi ka ekabi mpembe ncaami ma ankama mpwomo (4.000) ba abalaga,» Jezu pizi bo ndi: «Be angara maaluuli ma etini e mpembe kpe ba lebiri?» Ŋa bo akaali ndi: «Ncaami.» 21Ŋaa Jezu aduga bo ndi: «Ŋa be lekini kayuga ŋi?»
Jezu asalaga wo abiza kamono ka Betezayida
22Bo ato Betezayida, baari ayi bila Jezu mbuuru wo abiza kamono ŋa bo ampi nde akolokolo ma kaciila nde. 23Jezu yagi mbuuru wo abiza kamono ma kwogo ŋa biri nde ngula mpugu. Nde legi nde antayi yila miizi, kalegi njyala yila nde. Nde pizi nde ndi: «We amono kiila?» 24Mbuuru wo abiza kamono tesi miizi ŋa dugi ndi: «Mi emono baari, bo mva eti eli mi emono beeje.» 25Jezu vuri legi njyala yila miizi ba balaga, wua kiigi amono yemiŋi: nde kiigi mi wuuma, nde kiigi yiga amono eso taata. 26Ŋaa Jezu vuti nde nca njo ŋa nde dugi nde ndi: «Biza se kanyunuŋa nca mpugu.»
Pyere ayalaga ni Jezu kamaka Kirisite
(Lekese se Matye 16.13-20; Luke 9.18-21)
27Jezu ŋa alwoni a nde amana ayeni mpila ampugu atuga ŋa Sezare ye Filipe. Ma njila, nde pizi bo ndi: «Ma baari, Mi na?» 28Bo akaali nde ndi: «Ake ba aduga ni we Jan Batise, baamo ndi we Elie, ŋa akima ba avura duga ndi we omo nca antuma-Njyami.» 29Jezu pizi bo ndi: «Ma be, mi na?» Pyere kaali nde ndi: «We Kirisite#8.29 mbuuru eli Njyami mpi ndagi ma katuma.!» 30Ŋaa, Jezu wobi bo bila otori ma kabiza kawobo ŋa lembuuru.
Jezu awobo ma leku le nde ŋa enyuzigi e nde
(Lekese se Matye 16.21-23; Luke 9.22)
31Jezu baani kayiziga bo ni ave kiigi Mwana Mbuuru moni bege lempasi. Akuuru, ampi ambwoŋi bila ayizigi angiri ave kiigi abizi nde. Ŋa ave kiigi abuma nde, ŋa amana ecugu etari, nde nyuzigi. 32Nde kiigi dugi mbari yia taata. Ŋaa Pyere yagi nde katege ŋa kabama nde. 33Ŋaa Jezu kaligi, kesi alwoni a nde ŋa bami Pyere ndi: «Cyege, yira ngula mi Sata! Kabila ecimiŋi e we ka ba Njyami ŋi ŋaa ba baari ba omwo.»
34Jezu cwoli lembuuru bila ŋa alwoni a nde ŋa nde dugi bo ndi: «Aka mbuuru asaga mi kalwono, nde ki ma cimiŋa ma eki nde ŋi, nde yagi lemaanji le ndeankulu ŋa nde lwoni mi. 35Okorogo mbuuru wo jii kavuzuga omwo o nde akama, ŋaa wooli akama omwo o nde ma mi ŋa ma Ncya Yeemve aje avuzuga. 36Aka mbuuru abaga esolo eso ba okiri, ŋaa aka nde akaama omwo o nde, jo ema be sa nde? 37Jo kiigi ema baampa ma biri le omwo o nde? 38Wooli ŋa okuru ma mi ŋa ma ambari a mi kanca kari baari a lubu, baali ka tele ŋi bila baali ŋa ocu onono ŋa Njyami, ŋaa Mwana Mbuuru se abaga okuru ma nde, ntini ye ya vuruga nde nca lekuma le Taara nde bila antuma-yulu acece.»
Currently Selected:
Mareke 8: teg
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
