Esima 6
6
Aswoli abalaga ncaami ma kayamba antuma
1Ma ntini yia, ŋaa otali wo alwoni kawaa, ayaligi ba baalyele Greke aki yalaga ma kiigi sa arameye ŋi. Bo adugi ndi, cugu ŋa cugu, ntini ye kiigi kaba bo biila bo ba akalumuŋa akuuli a bo. 2Bo akuumu ŋa Bwele acwoli kuna le alwoni, ŋaa bo ndi: «Ove onyaŋa ma kanyura mbari a Njyami, ma kaje kayila ambisa ma biila ka kaba. 3Ŋaa andumu a mi, yia biri eli be le swolo nca be baari ncaami, baali ŋa otemi woove, eli bo ama aluula ma Oduduma Cece bila ncimi, ŋaa eli bizi a be le suuza bo ma lia janja. 4Ŋaa bizi, bizi lempa ntini ye bizi ma kabwono bila ma kampa mbari a Njyami.» 5Ŋaa baari aso ba Okuga asiiŋi ojugu wua. Bo aswoli Etyene balaga leeli ma luula ma lila bila Oduduma Cece, ŋa Filipe, ŋa Perokore, ŋa Nikanore, ŋa Timo, ŋa Paremenase bila Nikolase wo Antiyoce, ma ntini akala kiigi aki kula nde Jife ŋi , ŋaa mi kiriga Jife. 6Bo amvyeri bo ma antuma, ŋaa alegi jiala yila ecu e bo ma kabwono. 7Mbari a Njyami ye kaselege je levuzu ŋa levuzu, otali wo alwoni kaselege waa ka Jeruzaleme, ŋaa bege le ampi ambwoŋi abagi onyiimi ma lila.
Akuari Etyene
8Etyene bila puga leenini ŋa mpari kasa maami ma osizi bila eliimi eluari ka kara baari. 9Ŋaa baari ba njo ye ba abwono ye acwoli ma «Njo ye ayiga ba apisi», bo kiigi ŋaa aJife ba Sirene, ŋa Alesandre ŋa Silisi bila ba bungu le Azi, avi ma otogi bila nde. 10Ŋaa bo kiigi ba aka buna kasuga ncimi ewobi e nde ye kiigi mpa Oduduma a nde. 11Ŋaa bo acogi abalaga ma ayizigi ma kalyele ndi: «Bizi le maayuga nde alyele ambila maabi ma njuru a Moyize ŋa Njyami.» 12Bo alegi baari oncincyezi, ŋa akunji bila asikiribe. Ŋaa bo aciini kapaana Etyene ŋaa ayiniŋi nde, akuari nde ŋaa abiri mpila oju wo amfumu ba aJife. 13Bo ayagi atemi ba oca, bo ndi: «Balaga li bu le selege lyele maami ma oca ma biri ye cece bila ngiri. 14Kabila bizi lema yuga nde alyele ndi: “Kee Jezu wo Nazarete ki acala biri yi, ŋaa nde akaala maami akala maasi Moyize bizi a be.”» 15Aso ba abaka manci nca katini ka njo ka oju wo amfumu ba aJife ama kese Etyene, ŋaa bo amoni ndi kalii ka nde kasi mva ka ntuma yulu.
Currently Selected:
Esima 6: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
