Esima 18
18
Poole ka Korete
1Amana bwa, Poole cyegi Atene, ŋa yeni kangundu ka Korete. 2Ka kwa nde bagi Jife omo nkuumu Akilase osi Pon. Nde bya kiigi kini ewi e Itali bila okari a nde Prisile, kabila mfumu woonini Kelode kiigi ma alyele ŋa aJife aso ma kacyege Arome. Ŋaa Poole yeni mono bo. 3Poole kiigi kaka mpila bo, bo kajanja biri mon ma bo baakiigi janja lemo. Bo baabwo emangi ma katege. 4Cugu ŋa cugu le kayinga Poole kaje njo aJife ye baabwono, ŋa nde kasaga ndi aJife bila anGereke ayalaga ambari ma. 5Ŋaa ntini ye Silase bila Timote ye awi kasi ka Masedoyine, Poole mpi otuma nde oso kanca mbari a Njyami, ma kamvyere yemiŋi ŋa aJife ndi, Jezu kamaka Masiya. 6Ŋaa aJife asarigi kayila nde ŋa atugi nde. Poole kubugi amfa a nde, ŋa nde ndi: «Togi le beankulu leva yila ecu e be! Eki wuana mi ŋi. Ŋaa yiga mi eje mpila baari baali ka aJife ŋi.» 7Ŋaa ecuugi e nde kaŋaa, nde yeni mpila balaga lemo nkuumu Titiyuse Zisetise, balaga le lenyima Njyami. Ŋaa njo nde kiigi mpaana njo ye baabwono. 8Ŋaa Kirisepise wo mfumu njo ye baabwono, yaligi Mfumu Jezu bila njo nde ywori. Ŋa kuna le baari a Korete ayugi mbari a Poole baa se ayaligi, ŋa ayagi ateemi. 9Mfumu dugi ŋa Poole ma lworo nca lempiibi ndi: «Ndaga kabaga obwogo! Ŋaa lyele, ŋa we bizi onyua ka binda. 10Kabila mi ndi bila we, ŋa se mbuuru we aciila we kali, kabila baari ami ali kuna nca kangundu kya.» 11Poole ki ka Korete kasibi kamo bila angondo asyami, ma kayiziga mbari a Njyami.
12Ma ntini ye ekiigi Ngaliyone nguverenere a bungu le Akayi, aJife akuru ojugu omo ma kakwara Poole, ŋa abiri nde yila mbara ye ba apama. 13Bo adugi ndi: «Balaga li lesaga ni baari ayalaga kabwono Njyami ma lemigi eli ngiri eki lyele ŋi.» 14Poole sagi kayaga mbari, ma ntini yoankulu yia Ngaliyone kaali ndi: «Aka be lekata mbuuru ma nde wo omisa jaa leebi le levuli sikali lekyege, mi eyuga be bila otuma mi, be aJife. 15Ŋaa eli be lesoso ejugu kayila jaa le ambila, yila maami ma ankuumu bila maami ma ngiri be-ankulu, ewuani be. Mi, mi embiza ma kampama yi sila maami.» 16Ŋa nde curi bo ma biri ye ba apama. 17Ŋaa lembuuru le lekiigi ŋaa akuari Sosetene mfumu a njo aJife ye baabwono, ŋa yiga aberi nde kavuzu lebiri ye baapama. Ŋaa kiigi ka jaa le Ngaliyone ŋi.
Poole avuruga Antiyoce ma Syri
18Poole vuri ki ntini mon ka Korete. Ŋa nde nyini andumu, ŋa kumi nca vaari ma kaje Syri, nde bila Prisile ŋa Akilase. Ka eciege nde biri ye eka avaari ka Sankere, Poole wuuni ocu kabila nde kiigi ma laba okezi ma nkuumu a Njyami. 19Bo atoyi Efeze ka biri ye nyini Poole Prisile bila Akilase. Nde yeni njo aJife ye baabwono ma kasa ntigi bila bo. 20AJife ŋa nde ndi, nde kavura ka kaŋaa ma lebigi, ŋaa nde ki jya ŋi. 21Nde ciegi nca bo ma kalyele ndi: «Mi eyavuruga mpila be, ma lemigi le jii Njyami.» Ŋa ciegi Efeze ma vaari. 22Ntini ye nde kaka surigi ka Sezare, nde yeni Jeruzaleme ma kaje biga Okuga, ŋa nde yeni Antiyoce. 23Nde ki ntini mon, ŋa nde kaselege taaŋa Ngalasi bila Feriji, ma kampa mpari ma lila yila alwoni aso.
Apolose ka Efeze ŋa ka Korete
24Jife omo nkuumu Apolose wo akuli ka Alesandri kiigi ma aya Efeze. Nde kiigi kalyele bila ncimi ŋa kiigi yayi eteendi e tata. 25Nde kiigi ama amvyere Njila Mfumu, ŋa nde ayiziga ove ove bila otuma nde oso wo mawuana Jezu. Ŋaa nde kiigi yayi ateemi ma Jan. 26Nde yiga alyele bila tari nca njo aJife ye baabwono. Bo amana yuga nde Prisile bila Akilase abiri nde mpila bo ma kaselege mvyere nde tata Njila Njyami. 27Amana Apolose sagi kaje bungu le Akayi. Andumu ba Efeze ampi nde kawasi, ŋa ateendi kasangumu ma alwoni ba Akayi ni bo ayaga nde yemiŋi. Ntini ye toyi nde, nde yamiŋi alwoni kuna kabila puga le Njyami kiigi yila nde. 28Okorogo, Apolose kiigi sa lebila leenini bila aJife ka miizi a baari aso. Ŋa mvyeri tata ma eteendi ni Jezu kamaka Masiya.
Currently Selected:
Esima 18: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
