Jacques 4

Bambemanu ne Nyambi

1Mebadi ne mibokunu myarugili gu ve gari enu? Myarugili mu puse tsi enu tsibi tsyagubeni gu gari tsi enu. 2Nune puse ne givave gi nusabenze denge. Vane beli guboke. Nuke ne bungusu nusabenze denge gi nwarondi, vane nwagageni nwagubeni. Nusandi ne gi nwarondi, mbare nusakivuli Nyambi. 3Gere nwagwivuli nusadengi mbare nivu tsi enu tsi sandi tsiboti, nwagwivuli ke gukyelu gunonze puse tsi enu tsibi. 4Nwafudi Nyambi gere mugetu watubi disongi! Nusayabi re guronde bulongu, guvine Nyambi? Awarondi gube mbatsi bulongu ayi mbeni yi Nyambi. 5Nwayabi re gukulegeni direndu re Nyambi sarondi givale gu Dinyuni di aduvege. 6Tumbe gyesi gi Nyambi gaduvegi gi gineni, neve direndu re «Nyambi galimbuli bisi dunangu, tumbe agagwaguli ne gyesi bisi dilembitogu#4.6 Kugu 3.34.» 7Kabe gobise anu Nyambi, gagene anu ne Mbeni agurageme nenu. 8Bambeme anu ne Nyambi, agubambeme nenu. Gunge anu mekake menu, bevagitsi mabi, sungige anu mirime mi enu mine mbili pasi! 9Rangemine anu mukengu enu, lile anu, nyonge anu. Gisyevu gi enu gi kalugi metsange, sige muyangu enu wubi munyongu. 10Kuteme anu ve wusu Fumu, agunurelige!

Nuyabe nzonzi bembatsi

11Bane be Nyambi, nuyagelesene yenu ne yenu. Awageli mbatsi, ne wakwevagi nzonzi andi, agageli ne gukwevage nzonzi mugage Nyambi. Lavane, pasi re wuke nzonzi mugage, wuse gandi mutu wamugobisi. 12Nyambi vike re gavegi mugage. Yandi re nzonzi. Yandi re benze gobule negubuse gobule. Tumbe ndyayu, wu nye gube nzonzi mbatsi agu?

Nubandekene yenu miyugu

13Sige yenu nwagwambili re «Pasi re sandi nemuni mugese dugwende gu yadi gyagi, dugumane mupume, duguvage mukite, dugudenge doli.» 14Lavane nusayabi neve nugubile mugese. Nugere mwe dimungi dyavudugi mwe gigumbi sige dyatsyemugi kwe. 15Labe anu, mbere nwagwambili re «Gere Fumu tsesinge, duguvage nane, duguvage didi.» 16Tumbe, negu ngenze nune dunangu ne pedi. Dunangu du munongu wune du sandi duboti. 17Wotsu wayabi vage diboti, wusa divagi, agavagi dibi.

Currently Selected:

Jacques 4: SWJ

Highlight

Copy

Compare