Actes 8

1Sol abe dimosi ne batu be boke Etyene.

Sol gakwani dibundu di Fumu

Wisi wune re wupakile dikwanu di dibundu di Serisalem. Bane botsu be Nyambi, vengu ka bilumbi bi Sesu, bepanzige mu binange bi Sudé ne Samari. 2Batu bagobisi Nyambi betsige Etyene negumulile veveni. 3Tumbe Sol rondange ke panze dibundu. Ayendange mu ndagu tsyotsu, gwene vuduse bane be Nyambi, bebagele ne begetu, negubevere gu nzugu.

Filip ganenzi musamu boti gu Samari

4Bane be Nyambi bepanzegene bendange ke pagere mbure, gwe ne gwanze musamu boti. 5Filip yende gu yadi fimbe yi Samari, gwenegwanze Kirisete mwobutsi. 6Bumongu di awu dimosi, bekutisange me Filip yambilange. Mbare bagulu ne gulabe mambu me range megavagi. 7Menyuni mabi mavudugi mu mbili batu ne myamu mineni, mbili membogelotu ne bipitsu bebeluge. 8Vane gube muyangu neni gu yadi yine.

9Mutu wanengu re Simu tsagenange gu yadi yine. Avagange ngalu-ngalu amamisange mbili batu gu Samari. Ayambilange re ayi mutu didume. 10Bane begegi ne binunu byotsu, bemukutisange. Bambilange re «Mutu wuwu, ndure Nyambi, yanengu re “Ndure Neni!”» 11Veke gigumbi, Simu gamamisi mbili batu ne ngalu-ngalu andi, re dibandu bamulilu dikengi. 12Tumbe ve Filip benenzile musamu boti wu Sesu Kirisete ne wu bulongu bu Nyambi. Botsu bene gitu, bebagele ne begetu, bebatisu. 13Simu yandi beni akube ne gitu, akubatisu sige asekunde pasugange ne Filip. Negulabe bimage ne mambu meneni, yandi gwandi akamami!

14Gu Serisalem, bilumbi bi Sesu negulu re batu be Samari badile musamu Nyambi, bekuberumine Pyere ne San. 15Ve vudugile bilumbi bya beye gu Samari, belembe nonge botsu be ne gitu bekudili Dinyuni Diboti. 16Mbare Dinyuni Diboti mbere disebetsi sunde mu kepagere mutu vegari awu. Betsibatisu ke mu dine di Fumu Sesu. 17Vane Pyere ne San be betsabige mekake, sige bedile Dinyuni Diboti. 18Simu negulabe re botsu bene gitu badile Dinyuni Diboti negutsabigu mekake ne bilumbi. Re dibandu avegile Pyere ne San doli 19negubambile re «Pegyanu menu gwami ndure yine. Nonge wotsu wu nigutsabige mekake, adili Dinyuni Diboti.» 20Tumbe Pyere negumwagule re «Doli tsi agu tsi bungeni, ne ndya beni gwandi! Wapikili re wu benze sumbe ne doli gi Nyambi gavegi mwenzegeli. 21A dya vyogi gugu sa di agu wusa ne dinyange digube vane! Ve wusu Nyambi, pikile agu yisa yiboti. 22Yabe re di wutsevage disa diboti kalule pikile, lembe Fumu, mandi agunyese pikile tsibi tsine. 23Yi, nyalabi re wubase ne migangu, wugu nzugu mabi!» 24Simu ne gwagule Pyere ne San «Lembanu Fumu yenu beni gukyelu ami, nonge motsu me nutsegwambile me tsatse tugile.» 25Bilumbi bya beyi ne gwambile me belabe, ne gwegwanze musamu Fumu, sige begabuge gu Serisalem. Mu nzile, benenenzange musamu boti mu mimbu me Samari.

Gibengunu gi Filip ne mundumbe Gityopi

26Yanze Fumu ne gwambile Filip: «Yende gu gyari gi bande, gu nzile ya gwendi gu Serisalem kuange Gasa. Gigumbi gigi gu sandi mutu munzile.» 27Vane ne vane Filip negwende. Munzile, negubengune ne dibagele di vangulu gere tabe, mwisi Gityopi, mundube neni. Yandi re gabandekeni menive motsu me Kandase, kanangu mugetu yi Gityopi. Aruge gu Serisalem gutse lembe Nyambi. 28Negumane lembe, ve gugabuge gumbu gi andi, metsagene gu gari gyendilu gi andi gya dutu ne kalebe, atangunange gisangumu gi mubigitsi Esayi. 29Dinyuni Diboti ne gwambile Filip: «Dute, yende kwange ve gyendilu gine!» 30Filip yende mbangu negulu mwisi Gityopi gatanguni gisangumu gi mubigitsi Esayi. Filip negumwivule: «Ke wagulu me watanguni?» 31Mutu wune ne gwagule: «A nigulilu tsye gusa mutu wanenzi?» Arombe Filip gu gunangeme mu gyendilu negutsagene ve mbeke andi. 32Atangunange gisangumu gi Esayi ve rendu re

«Ayi gere didombi dyabegu gweboku,

gere mwane didombi wusarapi ve gatsakilu minyoni.

33Agarangu gu kulegeni, nesi miranu asevegu.

Nye benze gwambile di bane bandi?

Gusa mutu, mbare adumbu monyu andi gutsi nesi agube ne bane#8.33 Esayi 53.7-8.»

34Gityopi negwivule Filip: «Kokolu tsi agu, nyambili mubigitsi gagwambilili nye? Yandi beni vo mutu nzusu?» 35Vane Filip negwambile. Pakile ve mirendu mi gisangumu gi Esayi, negumunenze musamu boti wu Sesu. 36Munzile bevuduge ve mwemambe. Gityopi negwambile Filip: «Labe mambe, gye gya kali re nibatisu?» 37[Filip mwambile re, «Gere wune gitu gu murime agu, wubenze batisu.» Gityopi re «Yi, nine gitu re Sesu Kirisete mwane Nyambi#8.37 Girini gigi ([37]) giserendu mu mbili bisangumu bi gulu bi Girek..»] 38Asikige gyendilu, Filip ne Gityopi besunde gu gari mambe, Filip mubatise. 39Ve bekatugile gu mambe, Dinyuni di Fumu dyusele Filip. Gityopi se kunde mwene, tumbe abinge nzile andi ne mugangu. 40Filip ake gu Asote, sige ayende gu Sesaré. Mu nzile, akwe ne gwanzange musamu boti mu yadi tsyotsu tsi yandi vyogilange.

Currently Selected:

Actes 8: SWJ

Highlight

Compare

Copy