Actes 16

Timote yende ne Pol ne Silas

1Pol yende gu Derebe negu Lisetere. Gune gube mubingitsi Sesu wanengu re Timote. Nguye andi Sif ivagile Sesu gitu. Taye andi sabange Sif. 2Bane be Nyambi be Lisetere ne be Ikonyume babange ne tangulu yiboti gukyelu andi. 3Pol ronde re ayendi nandi, negumubege, amutabuse pure nziye gukyelu Sif, mbare botsu beyabange re taye andi asabange Sif. 4Gu yadi tsyotsu gubevyolange, bekwene gwambilange bane be Nyambi dibagi dibonge bilumbi ne bivunde bi dibundu di Serisalem. Ne gubambilange re begobise dibagi dine. 5Mebundu medyolange mu gitu, wisi wotsu bane be Nyambi befunange ke gufune.

Gu Torwas Pol kube ne dyeni

6Dinyuni Diboti dikale Pol ne gilonge gi andi gwanze musamu Nyambi gu musyengi Asi, vane bende disimu di misyengi mi Firesi ne Galasi. 7Ve bevudugile gu gyari gi Misi, babe ne pikile yi gwende gu Bitini, tumbe Dinyuni di Sesu dibegandise. 8Bedale Misi, beduke ve gisyeni gi Torwas. 9Dibeti Pol abe ne dyeni, alabe mwisi Masedwan meteli gusemulembige re «Vyogile gu Masedwan gutse dukane!» 10Pol negulabe dyeni dine, vane ne vane, dukebe gwende gu Masedwan, mbare dube ne gitu re Nyambi garondi re dwegwanze musamu boti gune.

Gu Filip, Lidi vagile Fumu gitu

11Dukwine bwatu gu Torwas dwende sungemi gu gyari gi ningi yi Samotaras, mbongwali, duduke ve Napolis. 12Sige vane, dwende gu Filip, yadi yi gu muposi rege Masedwan, yi gu dinyange di Rom. Duvyose mbili tsufu ve yadi yine. 13Wisi gukole, duvuduge gu yadi, dwende gu mbeke mwemambe gu dupikilange ragene mbure yi Sif belebilange. Dutsagene, dwambile ne begetu babe begukeme vane. 14Wumosi, muyugu wasumbisi tsande tsi boti tsi pupu, anengungu re Lidi, aburilu gu Tiyatir, adumange Nyambi Iserayel. Ayulungu mambu mambilange Pol, Fumu tsibule murime andi, amekutise dikengi. 15Neguvagile Fumu gitu, abatisu ne gitsapele gi andi gyotsu. Sige adulembige re «Gere nwapikili re nine gitu ne Fumu, ruganu gu ndagu ami!» Adubakige gusinge.

Pol ne Silas gu nzugu yi yadi yi Filip

16Wisi dwendange gu mbure ndembu, mudyanzitsi mugetu wubange ne dyeni, dibange mudengilu fumu tsi andi, aruge guse dubengusene. 17Abinge Pol ne gilonge gi andi ne gwene gwamugange re «Batu babe, bedyanzitsi be Nyambi yi yulu, banulongi nzile nevu nugugobulilu.» 18Avage nane mu mbili tsufu. Ve disukisilu, Pol ne firi, ageluge gu yandi, negwambile dinyuni «Nyakuvegi dinyange mu dine di Sesu Kirisete, vuduge mu nyuru tsi mugetu wune!» Vane ne vane dinyuni divuduge. 19Fumu tsi mugetu wune negulabe re dinyuni di mudengilu awu doli dyavuduge, begange Pol ne Silas, bebedute ve piti batu ve wusu nzonzi tsi yadi. 20Gumbu nzonzi tsi Rom, bambile re «Batu babe Sif, bavagi kumvu gu yadi etu. 21Banenzi migulu myone. Tumbe yetu bisi Rom du sandi ne dinyange di gumesinge ne gumebinge.»

22Bumongu butibile Pol ne Silas kabu. Nzonzi tsivege dinyange digubevule bidwaru negubedimbise tswale. 23Negumane begube tswale, bebevere gu nzugu, bevege mutu warari nzugu dinyange diguberare dikengi. 24Muraritsi nzugu neguvegu dinyange dine, abevere gu girini gi suke, abegomine bivangu mu byeru. 25Time dibeti, Pol ne Silas belembange, ne gugitse Fumu. Bisi nzugu bemosi bebulungu. 26Vane ne vane, butambe buregeme, bugibitse gibuge gi nzugu. Megugi motsu metsibuge, pange ne bivangu binyanguge. 27Muraritsi nzugu negutsagemuge, alabe re megugi motsu me nzugu meke mwasi, abonge dibambu di andi gu gukweboke, mbare apikilange re bisi nzugu barine. 28Tumbe Pol negwamuge ne ngudu tsyotsu: «Wuyakweboke! Yetu botsu duvave.» 29Muraritsi nzugu negwivule lambi, negwende mbangu gu girini gubange bisi nzugu, ne wome, akwebume ve byeru bi Pol ne Silas. 30Vane, abevuduse, negubivule: «Fumu tsi ami, nivagi tsye gugobuge?» 31Bemwagule «Vagile Fumu Sesu gitu wukwobuge ne gitsapele gi agu gyotsu.» 32Pol ne Silas bemwambile musamu Fumu, yandi ne botsu betsagenange gu ndagu andi. 33Gigumbi gye gyamosi, dibeti, abebege gwebebuge nzungu tsibe nawu. Vane ne vane, abatisu yandi ne gitsapele gi andi gyotsu. 34Abege Pol ne Silas gu ndagu andi. Abelambile biguye. Ne gitsapele gi andi gyotsu, abase ne mugangu wuguvagile Nyambi gitu.

35Wisi negutsamuge, nzonzi tsi Rom berume gori gwegwambile muraritsi nzugu re «Vuduse batu bane.» 36Muraritsi nzugu neguse gwambile Pol re «Nzonzi bavege dinyange di gunuvuduse. Yende anu pembi ne polu.» 37Tumbe Pol negwambile gori re «Betsedudimbise ve piti batu, nesi dugutabulilu bumbanze, yetu du bisi Rom, beduvere gu nzugu, sige nekyawu, barondi duvuduse gu tsyeminine? Vyage, yawu beni berugi gutseduvuduse.» 38Gori bende gwegwambile nzonzi mambu mambile Pol. Vane, beregeme neguyabe re Pol ne Silas bisi Rom. 39Beruge gutsebelembige ne gubevuduse gu nzugu, ne gubelembige gusuge gu yadi. 40Pol ne Silas ve bevudugile gu nzugu, bende gumbu Lidi. Negulabene ne bane be Nyambi ne gubegaremuse, benegwende.

Currently Selected:

Actes 16: SWJ

Highlight

Compare

Copy