Marke 5

Jesu asalaha balaha eki na edidima me ebi o Dekapole

1Bo ato ngula okeri onini a Ngalili, nca osi o Ngeraseni. 2Ntini e Jesu acuuhi nca mbuungu, o ŋiŋa balaha mo eki na edidima me ebi owi ancwo oyi na avuniŋa na nde. 3Nde akiihi nca ancwo, ŋa mvuuru se omo aki i mabuuna okura nde endi ni, se bɨla ankoso. 4Obila aki okura nde nyiili bɨla endi ma ankoso, nde ocebi endi ocali ankoso. Mvuuru aki i buuna okwara nde ni. 5Na na mpiibi na na mwi, nde okaaha nca ancwo na ekuri, nde owʉliha ankɨma nde se ojwasaha nyuru ma akele. 6Nde otaali Jesu o la la, odumi nciini owʉri avwo o ncina Jesu, 7owʉli nkɨma enini ndi: «We na me oma Jesu, we Mwana a Njyami a nkara yulu? Me elaba okesi o Njyami, ka aswesehe me ni!» 8Obila Jesu aduuhi na nde ndi: «Odidime ebi, cuuha o balaha ji!» 9Jesu opɨsi nde ndi nkuumi e we na? Nde okaali ndi: «Nkuumi e me lengyo#5.9 Lengyo omakaaha lenkɨndi la aworo, leki lebuuna oto amile asyami a baari mpili asi Rome., obila bisi leli lenkɨndi.» 10Ŋa nde oselihi opɨsa kolo kolo ndi i tuma bo la na osi ni.

11O ŋaa eki na jiimi leenguu lo mɨni lesaha biila o paani okuri. 12Edidima me ebi epɨsi nde kolo kolo ndi: «Tuma bisi nca enguu bi, bisi lenyuniŋa o jo!» 13Jesu onyili jo ecuuhi enyuniŋi nca enguu. Jiimi leki leto amile me enguu vwele lewi yula okuri, levi nca okeri onini lekwi ma anja. 14Akyeli ma enguu adumi, ayeni na aduha ncya nca onguundu na ampuhu. Baari ayi na amono maami mayiri. 15Bo ayi o paani e Jesu, amoni mvuuru aki na lenkɨndi le edidima me ebi: nde aki o nci omalaasa amfa, oli yemiŋi. Bo amoni vwoho. 16Baari mamoni aduhi bo maami mayiri o balaha eki na edidima me ebi, na mayiri na enguu. 17Ŋa bo apɨsi Jesu kolo kolo mo ocyehe o mpuhu e bo. 18Ntini e Jesu akumihi nca mbuungu, balaha matusihi edidima me ebi opɨsi Jesu ndi: «Kolo kolo e we, me esaha oka bɨla we!» 19Jesu aka yalaha ni, ŋa oduhi nde ndi: «Vuruha njo e we mpili e nkwono e we, we oduha bo jaa le Nkʉmu asi we nca nkerihi e nde o we.» 20Balaha evurihi, oya atooso maami a Jesu asi o nde aso nca Dekapole#5.20 Dekapole mo oduha ndi ngaala enguundu kuumi.. Baari aso aya nca lekemi.

Jesu osalihi okaasi nde se anyuusa mwana a Jayirose

21Jesu oyeni sabi e ngulu. Lemvuuru lo mɨni lekuhi o paani e nde, nde aki mo osyese okeri onini. 22Nkʉmu a njo mavwonoŋo omo a nkuumi Jayirose oyi. Nde omoni Jesu, ovi o ncina nyiili e nde, 23opɨsi kolo kolo na nkomoŋo eso ndi: «Mwana a me okaasi onkere oya tuha na okwa, jya na alehe jyala o yula nde mo bu ndi nde ovuuha, nde se oka mwo.» 24Jesu oyeni bɨla nde, lemvuuru le kuna lelwono Jesu, lepya nde ma angulu aso.

25Okaasi omo aki na ovuvuhu oya esibi kuumi na jyele. 26Nde aki omamono mpasi mo oje mpili asalihi kuna. Nde ocini adoro a nde aki na bo aso, ŋaa nde aka duuna ni, ŋaa ngaa eselehe oje na vusu. 27Okaasi jwa oyuhi mawobo o Jesu, nde oyi na ngula engwo e nde o nca lemvuuru, nde otiili mfa e Jesu. 28Nde aki oduuha ndi: «Yuhu me ebuuna otiila na amfa e nde ŋa me eje owuuma!» 29O ŋiŋa, ovuvuhu a nde owi, ŋa nde omoni nca nyuru e nde ndi nde omiwuuma o ngaa e nde. 30O ŋiŋa se, Jesu omoni ndi mpari emicuuha o nde. Nde okalihi o mpaniŋi lemvuuru opɨsi ndi: «Atiili na amfa a me na?» 31Alwoni a nde akaali nde ndi: «We amono lemvuuru lepya we angulu aso, we avuriha opɨsa mbɨri: “Atiili na me na?”» 32Ŋa Jesu okeesi angulu aso mo omono okaasi asi jaa jya. 33Okaasi oya atriha o vwoho, obila nde ajyabi maami mayiri o nde. Nde oyi na ava o ncina nyiili e Jesu, nde se oduhi asisyele aso. 34Jesu oduhi nde ndi: «Kaasi, oyalihi o we omivusuha we. Je nca oduusu, we owuuma o ngaa e we.»

35Jesu oki okini awobo, baari awasihi ma wa mpili e nkʉmu a njo mavwonoŋo, bo na nde ndi: «Mwana a we okaasi omikwa. Be levuriha oweele Nkʉmu ŋa mo oma?» 36Ŋa Jesu aka yuha a bo maa ni. Nde oduhi na nkʉmu a njo mavwonoŋo ndi: «Ka monoŋo vwoho ni, yalaha oyalaha otu!» 37Nde aka dya ndi mvuuru okɨma oyeni bɨla nde ni, o ngula Pyere, Jake na mwana a nguhu a nde Ja. 38Bo ato njo e nkʉmu a njo mavwonoŋo, Jesu omoni okʉrukusu, baari malila mawʉla ankɨma mo mɨni. 39Nde onyuniŋi, oduhi na bo ndi: «Yu okʉrukusu bɨla elili oma? Mwana okini okwa ni, nde oli tolo.» 40Ŋa bo asebi nde, nde se otusihi bo aso. Nde oyahi taara bɨla nguhu a mwana na alwoni a nde ma atari. Emana nde onyuniŋi nca otini o njo mpili ekihi mwana okaasi. 41Nde okwari mwana okwoho, oduhi na nde ndi: «Talita kume!» Mo oduha ndi: «Mwana okaasi, nyusuha!»

42Mwana okaasi aki esibi kuumi na jyele otemiŋi asisari, emana oya alaana. Bo aso aya o nca lekemi lo mɨni. 43Ŋa Jesu oloongi bo ndi bo i duha na mvuuru ni, nde se oduhi ndi ampa mwana okaasi biila.

Currently Selected:

Marke 5: MDT

Highlight

Copy