Like 2
2
Ekʉlihi e Jesu
1Ntini e Sesare#2.1 Atwoligi ankʉmu me esi e Rome o Sesare. Ogise akihi nkʉmu esi e Rome, nde oti osyami mo osa onteende o baari aso a ma esi e nde. 2Onteende a ncomi jwa asi nde o ntini e Kirinise akihi lepatima o ngaala e Siri. 3Mvuuru na mvuuru oyeni onguundu makʉli nde na asa onteende. 4Jusefe se owi Najarete onguundu o nca ngaala e Ngalili, ma ovuruha Betileyeme onguundu o nca ngaala e Jude. Mpili makʉli nkani Davide. Nde anku se aki ombɨsa o Davide. 5Nde ayeni na asa onteende jwa bɨla Mariya adɨla oka okari a nde, nde aki oya na yimi. 6Ntini e bo ma kihi o Beteliyeme, cuhu okʉla eto. 7Nde okʉli mwana ancomi, mwana a balaha. Oporihi nde mo olembe, ocuusi nde o biri mo ejyaha anyama. Obila nca otini anjya ebiri eki kali.
Obaanji atooso Ncya e Mve na akyeli me endoombo
8Nca enkese bya ekihi na akyeli me endoombo, bo mamoho na mpiibi ma okyele jiimi le bo le endoombo o nca anguunu. 9Obaanji a Nkʉmu omo owasihi na e bo. Lekʉma le Nkʉmu lejeniŋi bo bɨla oyalala. Bo amoni vwoho bo mini. 10Obaanji na bo ndi: «Leka mono vwoho ni, me eduha be ncya e mve empa baari aso oswere bo mini. 11Lobi nca onguundu o Davide amikʉla be Ovusihi nde Krisi#2.11 Krisi omakaaha mpili a Ajife Masiya, mvuuru a Njyami aswoli ma ovusuha baari a nde. Ma le greeke Kristose., nde se Nkʉmu. 12Mono ndiimi e be leje oyaa nde: be leje omono mwana makini mo okʉla, amaporoho nde mo olembe, amacuusa obiri ejyaha anyama.»
13O niŋa, abaanji awi yulu kuna na abasaha obaanji a ncomi, bo mayima aluumu a Njyami ndi:
14«Lekʉma le Njyami leka me ebiri e nkara yulu,
na oduusu se oka o yula ncye o baari a nde amadya.»
Akyeli me endoombo ma aje na Betileyeme
15Ntini abaanji manyili avuruhi yulu, akyeli me endoombo aya maduha o mpaniŋi e bo ndi: «Ŋa lecwe tii Betileyeme na amono maami ma ayiri, a Nkʉmu amalaha saabe.» 16Bo ayeni woowo, abasihi Mariya bɨla Jusefe na mwana makini mo okʉla o tolo, o biri ejyaha anyama. 17Bo amamono nde, bo aduhi maami mo obaanji aduhi na bo o mwana jwa. 18Baari aso mayuhi akyeli me endoombo, akimi maami a bo maduuhi. 19Mariya akyele maami maa aso nca otima, nde aselehe ocimiŋa. 20Emana akyeli me endoombo avurihi. Bo mayima lekʉma bo se masiha aluumu a Njyami, o maami a bo mayuhi na a bo mamoni. Mo aso ayiri mo osuumbu obaanji atoosi bo.
Maluha Jesu nkuumi
21Emana ecuhu ncaami, o mfwomo asi mwana sasi, ampi nde nkuumi e Jesu mo osuumbu obaanji aduhi na Mariya, nde oki kini obira yimi ni.
Malaha Jesu na Njyami
22Emana ŋaa, cuhu e cinda okuumbu eto lemihi na ekele e Njyami ampi Moyise, mo osa bo aka ce ce#2.22 Lev 12. 3-6. Ekele e Moyise emayeese maami mo oka ce ce ntini mamana okʉla mwana.. Mariya bɨla Jusefe abiri mwana Jerusaleme na alaha nde na Nkʉmu. 23Obila amateende nca osaangumu ekele e Nkʉmu ndi: «Ntuba mwo a mwana a balaha, aje oka buhu ma amayeese o Nkʉmu.» 24Ŋa bo ayi se na ampa avwoŋi a cinda okuumbu lemihi na ekele e Nkʉmu: «Eki epebihi jyele si kali baana ma akuumbi vwele.»
Simyon owobi a Njyami
25Ŋa balaha mo ekihi o Jerusaleme nkuumi e nde Simyon. Nde aki mvuuru a tele, anyiima Njyami, adɨla na lila Ovusihi a baari a Isayele. Oduduma Santi aki o nde. 26Oduduma Santi oki omabaana ojyese nde ndi: «We aka sa kwa ni, we asa mono Krisi a Nkʉmu aswoli.» 27Oduduma Santi obiri Simyon nca njo e Njyami. Oduduma Santi aki o nde. 28Simyon oyambi nde o nca jyala e nde, okusi Njyami ndi:
29«O ŋa Nkʉmu,
nyila ojanji a we oje nca oduusu lemihi na andayi a we,
30obila miisi a me amimono Ovusihi,
31a we ama ayeese o baari asiiso:
32Nde oyalala eje olaha we na baari a yulu a ncye.
Nde aje oka lekʉma le baari a we a Isayele.»
Simyon awobo ma lengulu le Njyami
33Taara bɨla nguhu a mwana akimi o maami a Simyon awobihi o nde. 34Simyon ompi bo andosoho. Nde na Mariya ndi: «O mwana a we yu, kuna o nca Isayele ma ava, si kali ma nyusuha. Nde aje oka ndiimi e Njyami, okoroho baari ma aje obele nde. 35Ŋa ma aje oyaa ecimiŋi e baari kuna. Ŋa we Mariya, mpasi eje otiila we otima mva jwo.»
Aane owobi a mbari e Njyami
36O ŋaa se ekihi na okaasi a nkuumi Aane mwana a Panyele amalekaha la Aseere. Nde owobi a mbari e Njyami, aki aya okubu. Nca ongondo o nde, nde osi esibi ncaami bɨla olumi a nde. 37Emana oya okuuli. Nde ekuumi me esibi mfwomo na esibi ena (84). Akihi nca njo e Njyami mo ojanja antini aso, aka na ongerehe, nde se avwono. 38O ntini jya nde se oyi, ompi Njyami leve, owobi o mwana na baari aso ma dilihi Ovusihi a Jerusaleme.
Obusi o Jesu o Najarete
39Bo ama mana osa lemihi na ekele e Nkʉmu apɨsihi, Mariya bɨla Jusefe avurihi onguundu o bo Najarete o nca Ngalili. 40Mwana akʉlihi na mpari eso, na na ncimi yo mini, mpolo e Njyami eki bɨla nde.
Jesu oto esibi kuumi na jyele oyeni njo e Njyami
41Esibi eso, nguhu a nde bɨla taara a nde ayenihi Jerusaleme o cinda a Ajife macwoloho o Paake. 42Jesu omato esibi kuumi na jyele, oyeni bɨla bo mo otiiri a bo. 43Bo amana cinda avurihi. Ŋa mwana a bo, Jesu osiili o Jerusaleme taara bɨla nguhu aka yaa ni. 44Bo aki ndi mwana oli bɨla abuha a bo a njila mo. Asi ojiila okumuu, aya masaha nde nca nkwono na andihi a bo. 45Bo aka mono nde ni. Avurihi na Jerusaleme na osaha nde. 46Cuhu otari bo amoni mwana nca njo e Njyami. O nci, o mpaniŋi ayisihi ma Ajife, nde ayuha bo, nde se alehe bo eduhu. 47Aso ma ayuhi mwana akimi ncimi ekalihi e nde. 48Bo amamono nde, bo akimi. Nguhu na nde ndi: «E mwana a me we jya jaa e we amasa bisi ma? Saa taara we lekihi nca ongwo na lesaha le we.» 49Nde okaali bo ndi: «Be lesaha me mo oma? Be i ya mbɨri ove me esi janja e Taara me ni?» 50O ŋa bo aka yuha maami a nde aduuhi ni.
51Emana Jesu osurihi bɨla bo Najarete. Nde anyiima bo. Nguhu akyele maami maa aso nca otima a nde. 52Jesu akulihi na ncimi eso. Nde aki na mpolo o miisi a Njyami na a baari. Na baari se majuusa nde.
Currently Selected:
Like 2: MDT
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
