Janja 22
22
1«Baana ma anguhu a me na ataara a me, leyuha a me eduha be paraabu ŋa ma lengulu le me.» 2Bo ayuha nde oya awobo mo juuyi la asi Ebɨre, bo alomi. Pole oselihi owobo ndi: 3«Me Ojife ma akʉli o Tarse e Silisi. Ŋa akuusi me ŋa onguundu O Jerusaleme. Ngamalyele aki mvuuru ayisihi me ekele ma ankaha a saabe yemiŋi. Me eki ojanji a Njyami onini mva eli be aso se o cuhu e lobi. 4Me swesihi baari tii leku, baari ma lwoniŋi njila e Nkʉmu. Me etumi okwara akaasi bɨla abalaha mo olehe bo mo ongeneŋe. 5Osi avwoŋi onini bɨla okuha akuuru aso, mabuuna osiisa enwa. Mo oma, bo baari ma ampihi me esaangumu ma etumiŋi me okwara baana ma anguhu ma ama yalaha Jesu, o ntini e me eyeni Damase. Ŋa me se eyeni na okwara baari ma amayalaha Nkʉmu ma aki kwa, mo oya na bo o Jerusaleme mo oliisa bo.»
Pole aduha osuumbu a nde ayalihi Jesu
6«Me eki o njila, me eya eciina tuha na Damase. Tari eki o mwa njanga, oyalala enini ekyeme owi yulu, ojeniŋi me. 7Me evi o ncye, me yuhi juuyi leduha na me ndi: “E Sole, Sole, we aswesehe me mo oma?” 8Me pɨsi mbɨri: “We na Nkʉmu?” Juuyi lekaali me ndi: “Me, Jesu a Najarete a we aswesehe.” 9Baari ma aki bɨla me amoni oyalala kya, okoroho bo aka yuha juuyi lewobihi ni. 10Me epɨsi mbɨri: “E Nkʉmu me osa buni?” Nkʉmu okaali na me ndi: “Temeŋe we oje Damase. We oto kwa, aduha we osuumbu a we asa.” 11Ŋa oyalala kya oki omapooro me miisi, baari ma aki bɨla me akwari me o kwoho, abiri me Damase.
12O ŋa eki na balaha macwoloho ma Ananyase. Nde anyiima Njyami bɨla ekele e Moyise. Ajife a Damase aso majuusa nde. 13Ananyase oji ŋa basaha me, oduhi na me ndi: “Mwana nguhu a me Sole, vuriha omono!” O ŋa me miisi anaahi me evurihi emoni, me emoni Ananyase. 14Nde se oduhi na me ndi: “Njyami ankaha a saabe omabaana oswolo we. Mo bu ndi we oyaa ediŋi e nde. Nde omaswolo we ndi we amono mvuuru a Tele, we se oyuha juuyi le nde anku. 15Obila, ove we oki mvuuru asiisa enwa o mwa baari o maami a nde maa aso, we otooso a we amoni, na a we ayuhi. 16Ŋa we oma amadiliha? Jyaha ampa we ateeme acuka ambiini a we se, o ntini a we acwolo nkuumi e nde.”
Atumi pole mpili e baari akɨma
17Emana me evurihi Jerusaleme. Cuhu mo me eki evwono nca njo e Njyami, Oduduma obiri me. 18Me emoni Nkʉmu, nde oduhi me ndi: “Sa asisari mo ocuuha nca Jerusaleme woowo. Obila bo ma aka aje oyalaha enwa e we asiisa o me ni.” 19Me ekaali mbɨri: “E Nkʉmu, bo ajyabi yemiŋi ndi me mvuuru eyirihi ma anjo mavwonoŋo na okwara baari ma amayalaha we. Malebeere le bo, na lelehe le bo mo ongeneŋe. 20Ŋa na o ntini mabumi Etyene mvuuru asiisihi enwa e ma maami a we, me se eki o ŋa. Me ekihi jaa mo bɨla baari mabumiŋi nde, me se ekyele hi amfa a bo.” 21Ŋa Nkʉmu na me ndi: “Jyehe me etuma we lala, mpili baari ma ali ka Ajife ni!”»
Pole bɨla nkʉmu aworo a Rome
22Baari ayuhi Pole tii ngo o nde amani. Bo aso awʉli ankɨma ndi: «Lebuma balaha ji, nde i buuna oka mwo ni!» 23Bo aya maselehe owʉla ankɨma, atʉni amfa a bo o yulu. Bo asaari owʉru na yulu. 24Nkʉmu aworo a Rome oduhi ndi: «Lenyuniŋa na Pole nca njo aworo, be lebeere nde ekaci, mo otuma nde owobo! Me esaha ojyaba o bila o bo mayukula nde o co.» 25Ŋa akura Pole endi mo obeere nde, nde na nkʉmu aworo aki ŋa ndi: «Be lesaha obeere osi Rome a be lekini opama se opama ni? Be lebuuna osa vwa?» 26Nkʉmu aworo jwa oyuha vwa, oyeni amono nkʉmu avʉli nde ndi: «We oma asaha osa? Balaha ji osi Rome!» 27Ŋa nkʉmu aworo onini oyi ŋa abasaha Pole, opɨsi nde ndi: «Ma duha me, we ŋa jaa jaa osi Rome?» Pole okaali ndi: «Ee.» 28Nkʉmu aworo onini ovurihi oyahi mbari, na nde ndi: «Me ema cina adoro a kuna mo okiriha osi Rome.» Pole na nde ndi: «Me osi Rome ma asi kuluha me.» 29O nci na nci ŋa, baari masahi obeere Pole mo otuma nde owobo, anyili nde. Nkʉmu aworo onini nde anku omoni vwoho, mo osuumbu a nde ajyabi ndi Pole osi Rome, nde se aki omatuma okura nde ma ankoso.
Pole o mwa okuha akuuru ma Ajife
30Eto na encyere, nkʉmu aworo onini osahi oyaa o bila o simi simi ankʉmu ma Ajife ma baniŋi Pole. Nde otumi ocyese nde ankoso ma kuri nde o mo. Nde oduhi na ankʉmu ma asi ma vwoŋi bɨla ankʉmu mo okuha Ajife, mo ovunuŋa. Ayi na Pole acuusi o mwa bo.
Currently Selected:
Janja 22: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
