ABhaluumi 7

Abhooziwa saga bhali pa nsi yɨ ndajizyo zya Moose

1Bhooziwa bhamwetu, ɨyanga namwɨ mubhantu ɨbho muzimɨɨnye shinza ɨndajizyo zya Moose. Wɨlɨ, saga mumɨɨnye huje ɨndajizyo zihunʼnongozya ʉmuntu lwa‑ali mwʉmi lwene? 2Ɨshi, amba ɨniilule ɨnongwa ɨzi, nanshi zili ɨndajizyo hwa bhantu ɨbho bhegɨɨne ɨzyo ziyiga, ʉnʼshɨ saga ɨhwɨtɨshɨlwa hunʼneshe ʉnʼnume waakwe hu habhaazyo lwa‑ali mwʉmi. Lyoli ʉnʼnume nkashele waafwa, ɨpo ʉnʼshɨ ʉyo abha mwawusu. Hwa huje saga anza‑alongozewe nantele nɨ ndajizyo zya bhantu ɨbho bhegɨɨne. 3Leelo, nkashele weegwa nʉ nʼnume ʉwɨnjɨ hu habhaazyo ʉnʼnume waakwe lwa‑ali mwʉmi, abha mwegu. Lyoli ʉnʼnume waakwe nkashele waafwa, ɨndajizyo ɨzyo saga zihumʼpinya nantele, abhajiiye ahwegwe nʉ nʼnume ʉwɨnjɨ, saga abha mwegu.

4Bhooziwa bhamwetu, sha shɨɨsho zili na huliimwɨ. Nanshi ɨsho ʉmuntu nkashele afwiye, ɨndajizyo saga zihunʼnongozya, namwɨ ɨndajizyo zya Moose saga zihubhalongozya, pɨpo muli nanshi huje mufwiye peeka nʉ Kilisiti pa shikhobheehanyo. Ɨshi amwɨ muli bhantu bhaakwe ʉyo ahazyʉshɨle, huje tibhombe ɨmbombo ɨnyinza ɨzyo zihunʼkhondeezya ʉNgʉlʉbhɨ. 5Paala ɨpo ʉwuntu weetu ʉwɨ mandɨ wahali wuhutilongozya atɨ, ɨndajizyo zyahabhombile ɨnsʉngwo ɨmbiibhi zibhe ni‑ikhone tee. Ahantu ɨha ha hɨɨho ha hatibhombile huje tisʉngwe abhombe ɨmbiibhi hu habhaazyo honti. Afumilane nɨ‑ɨlyo, ʉfwe wahafumila. 6Tahali tipinyiilwe nɨ ndajizyo, ɨshi tifwiye peeka nʉ Kilisiti, hwa huje tiguliilwe mu ndajizyo. Hu habhaazyo ɨha saga tihumʼmombela ʉNgʉlʉbhɨ hwi‑idala ɨlyɨ mandɨ ɨlya‑alondolezye ɨndajizyo zya zyahasimbwilwe, lyoli hwi‑idala ipya ɨlya‑alongozewe nʉ Mʼpepo ʉMʼfinjile.

Ɨmbombo yɨ ndajizyo

7Ɨshi tiyanje yeenu? Tije ɨndajizyo mbiibhi? Ndaali, saga lyoli lwonti! Lyoli ɨndajizyo nkashele saga zyabhanga, anɨ saga namanyaga huje ɨmbiibhi hantu heenu. Enya, nanshi saga yabhanga ɨndajizyo ɨyo ɨyiga, “Ʉgandi anyonywe ahantu ha muntu,”#Bhaazya Afume 20:17; ɨNyiizuho 5:21. anɨ saga nɨnzaga‑amanye huje anyonywe ahantu ha muntu shibhiibhi. 8Leelo lwa naamanya ɨndajizyo ɨnɨ, ɨpo yahadaamusya ɨnsʉngwo ɨmbiibhi ɨzyɨ waaji nʉ waaji muuhati yaanɨ. Enya, ɨndajizyo nkashele saga zilɨɨho, ɨmbiibhi saga zibha ni‑ikhone. 9Ɨnsiku ɨzya hwisinda hu habhaazyo ɨho saga nahazimɨɨnye ɨndajizyo zya Ngʉlʉbhɨ, nahali ɨkhala ɨsho shɨ‑ɨhwanza. Leelo lwa naamanya ɨsho zihwanza ɨndajizyo, nahamanya huje anɨ ɨndi nɨ mbiibhi. 10Nahalola huje ɨndajizyo ɨzyo, ɨzyo zyahali zya hundeetele ʉwʉʉmi, zyahandeetela ʉfwe. 11Enya, hwi‑idala ɨlyɨ ndajizyo ɨyo, ɨmbiibhi zyahangobela anɨ na hundeetele ʉfwe. 12Ɨshi ɨndajizyo zili pa pazelu huje zifumile hwa Ngʉlʉbhɨ yʉʉyo. Ɨshi ɨndajizyo mfinjile, nyinza nantele zyɨ lyoli.

13Leelo nkashele sha shɨɨsho, hantu hinza ɨho handetɨɨye ʉfwe? Ndaali nka hashe! Ɨmbiibhi zya zyɨzyo zyahaleetile ʉfwe hwi‑idala ɨlyɨ ndajizyo ɨzyo zili nyinza. Zyahali nsɨɨbho zya Ngʉlʉbhɨ huje ɨndajizyo zibhe zilolesya pa pazelu huje ɨmbiibhi hantu habhiibhi tee.

14Timɨɨnye huje ɨndajizyo zyahafumile hwa Mʼpepo wa Ngʉlʉbhɨ, leelo anɨ ɨndi nɨ nsʉngwo ɨzyɨ mʼbɨlɨ, hwa huje anɨ ɨndi nʼkalwe wɨ mbiibhi. 15Ɨnongwa ɨzyo ɨbhomba, lyoli anɨ nɨɨnɨ saga ɨhwilola. Ɨsʉngwa abhombe ɨnyinza, leelo saga ɨbhomba. Lyoli ɨzyo saga ɨsʉngwa, zya zyɨzyo ɨbhomba. 16Nkashele anɨ ɨbhomba ɨnongwa ɨzyo saga ɨsʉngwa, ɨpo ɨlolesya huje ɨhwɨtɨha huje ɨndajizyo nyinza. 17Ɨpo saga ɨmba nɨɨnɨ ʉyo ɨbhomba ɨlyo saga ɨhwanza, lyoli zibha mbiibhi ɨzyo zili muuhati yaanɨ. 18Ɨmɨɨnye huje muuhati yaanɨ, hwa huje mu wuntu waanɨ, saga halɨɨho ahantu ahinza hohonti. Ɨyanga ɨsho pɨpo ɨhwanza abhombe ɨnyinza, leelo saga ɨbha ɨsho. 19Hwa huje lwɨ‑ɨhwanza abhombe ɨlinza, ɨbhomba ibhiibhi ɨlyo saga ɨhwanza. 20Ɨshi, nkashele ɨbhomba gaala ɨgo saga ɨsʉngwa, ɨpo ɨmba saga nɨɨnɨ ɨbhomba ɨgo, lyoli zya ziila ɨmbiibhi zya zili muuhati yaanɨ.

21Ɨshi ɨmanyiiye ɨsho hu nongwa yɨ ndajizyo, lwɨ‑ɨhwanza huje ɨmbombe ahantu ahinza, ɨkwesangwa abhombe ahantu ahabhiibhi. 22Ɨndajizyo zya Ngʉlʉbhɨ ɨhuzigana hu mwoyo gwanɨ gwonti. 23Leelo, ɨvipelwa ɨvyɨ mʼbɨlɨ gwanɨ vilongozewa ni‑ikhone lyɨ mbiibhi ɨlyo lilwɨlana nɨ nsɨɨbho zyanɨ. Ikhone ɨli lihumbɨɨha ɨmbe nʼkalwe wɨ ndajizyo zyɨ mbiibhi ɨzyo zibhomba ɨmbombo mu mʼbɨlɨ gwanɨ.

24Nasheela anɨ! Weenu ʉyo wa‑anza humfyʉle afume mu nsʉngwo ɨzyɨ mʼbɨlɨ ɨzyo zihundongozya hu fwe? 25Ɨhunʼsalifya ʉNgʉlʉbhɨ ʉyo hwi‑idala ɨlya Mwɨnɨ weetu ʉYeesu ʉKilisiti ahutifyʉla afume hwi‑ikhone lyɨ mbiibhi.

Enya, anɨ nɨɨnɨ ɨlondolezya ɨndajizyo zya Ngʉlʉbhɨ mu nsɨɨbho zyanɨ, leelo ʉwuntu waanɨ ʉwɨ mbiibhi wulondolezya ikhone lyɨ mbiibhi.

Currently Selected:

ABhaluumi 7: SBK

Highlight

Copy