ABhaluumi 12

Humʼmombele ʉNgʉlʉbhɨ

1Ɨshi bhooziwa bhamwetu, mumɨɨnye ɨsho ʉNgʉlʉbhɨ ahutilolela ɨnkʉmbʉ. Ɨshi, ɨhubhalaabha hu mwoyo gwanɨ gwonti huje muhwifumye amabɨlɨ geenyu gabhe nanshi ɨnsangu ɨnsangalusu ɨzyɨ vyʉma vya vili vyʉmi, zya zihunʼsʉngwɨzya ʉNgʉlʉbhɨ. Enya, abhombe ɨsho lya lidala lyɨ lyoli ɨlya humʼpuute. 2Ɨshi, muleshe ahwejeshele nantele amiiho ga gabhombwa na bhantu abha mu nsi ɨnɨ. Leelo ʉNgʉlʉbhɨ ya yʉʉyo agalulanya amooyo geenyu abhe nɨ nsɨɨbho ɨnjenu. Ɨpo pa pɨɨpo munza‑amanyile huwaaganye ʉkʉndwe wa Ngʉlʉbhɨ huliimwɨ, hwa huje ahantu haala ahinza, ahatinisu nantele ha hahunʼsʉngwɨzya.

3Ɨshi, ʉKilisiti ampiiye ɨmpyana ɨmbe nʼsontwa waakwe, ɨshi ɨhumʼmʉʉzya shila weeka muuhati yeenyu huje leshi ahwilole mukhondɨɨye ashile sha muli. Leelo ɨnsɨɨbho zyenyu lyoli mubhe muhwilola huje, shila muntu apewiilwe ɨshoolelo shaakwe ɨshɨ lwɨtɨho nʉ Ngʉlʉbhɨ. 4Mumɨɨnye huje ʉmʼbɨlɨ guli gweka, leelo guli nɨ vipelwa vinji, shila shipelwa shili nɨ mbombo yaakwe. 5Sha shɨɨsho guli ʉmʼbɨlɨ gwa Kilisiti. Atɨ tili vipelwa vinji ɨvyɨ mʼbɨlɨ gwakwe gweka. Mu mʼbɨlɨ ʉgu, shila muntu abhombɨɨshe shipelwa sha wamwabho.

6Ɨshi, tili nɨ vikʉnjɨlwa ɨvyɨ waaji nʉ waaji, nanshi ɨsho ʉNgʉlʉbhɨ ahamʼpiiye shila ʉmo hu mpyana yaakwe. Ʉmuntu ʉyo apewiilwe ɨshikʉnjɨlwa ɨsha‑afumye ʉkuwi, abhombele ɨshikʉnjɨlwa ɨsho alɨngaane nʉ lwɨtɨho lwakwe. 7Ʉmuntu ʉyo ʉNgʉlʉbhɨ amʼpiiye ɨshikʉnjɨlwa ɨsha hubhabhombele abhamwabho, abhabhombele hu mwoyo gwonti. Ʉmuntu ʉyo apewiilwe ɨshikʉnjɨlwa ɨsha‑amanyizye, amanyizye shinza. 8Ʉmuntu ʉyo apewiilwe ɨshikʉnjɨlwa ɨsha hubhajinjizye amooyo abhamwabho, abhombe ɨsho. Ʉmuntu ʉyo apewiilwe ɨshikʉnjɨlwa ɨsha hubhaavwe abhantu ɨvintu ɨvyo bhabhuliliilwe, abhanje ahubhapeela ɨvintu hu mwoyo gwonti. Ʉnʼnongozi wope abhombaje hu dandamazu alongozye. Wope wa‑ali nʉ mwoyo ʉgwa hubhaavwe abhamwabho, abhombaje ɨsho hu luseshelo.

Mugananaje

9Mubhaganaje abhamwenyu hu mwoyo ʉnʼzelu. Muleshe lwonti abhombe ɨmbiibhi, lyoli mubhe mubhomba ɨnyinza hu habhaazyo honti. 10Mugananaje mwɨmwɨ hu mwɨmwɨ nanshi abhanakwenyu. Shila muntu abhe nʉ dandamazu tee hunʼtinishe ʉwamwabho. 11Mugandi abhe bhoolo abhombe ɨmbombo ya Ngʉlʉbhɨ, leelo ʉMʼpepo ʉMʼfinjile abhaavwe ajendeelele abhombe ɨmbombo ɨyo hu mwoyo gwonti, mumʼmombele ʉMwɨnɨ ʉYeesu. 12Seshelaji mu gaala aminza ɨgo ʉNgʉlʉbhɨ abhalapiiye amwɨ huje anza hubhabhombele. Jimbililaji, nkashele gabhɨnzɨɨye amayɨmba, nantele jendelelaji hunʼnaabhe ʉNgʉlʉbhɨ. 13Bhavwaji abhooziwa ɨvintu ɨvyo bhabhuliliilwe, nantele mubhanje bhangu hubhambɨɨlɨle shinza abhajenu mu nyumba zyenyu.

14Abhantu ɨbho bhahubhayɨmvya, bhaputilaji huje ʉNgʉlʉbhɨ abhasaye ɨbho, mubhasayaje, mugandi hubhagune. 15Seshelaji peeka nɨ‑ɨbho bhahubhaseshela, lilaji peeka nɨ‑ɨbho bha bhalila. 16Khalaji shinza mwɨmwɨ hu mwɨmwɨ. Mugandi hwibaade, leelo muhwiyisyaje na‑abhe nʉ lwʉmvwano na bhantu bha bhasyonsheliilwe. Mugandi hwilole huje muli nɨ njeele tee.

17Nkashele abhantu bhahubhabhombela ʉbhiibhi, mugandi hubhaweezezye ʉbhiibhi. Lyoli, sɨɨbhaji nasʉʉti na‑abhombe gaala ga galoleha minza hwa bhantu bhonti. 18Mubagaje abhombe lyolyonti ɨlyo mubhajiiye huje mubhe nʉ tengaanu na bhantu bhonti. 19Bhakʉndwe bhaanɨ, mugandi aweezezye iliiga, lyoli mubhe muhunʼneshela ʉNgʉlʉbhɨ abhombaje ɨgo. Ɨyanga ɨsho hu nongwa mu Nsimbo ɨMfinjile ʉMwɨnɨ ʉNgʉlʉbhɨ ayiga, “Aweezezye ʉbhiibhi mbombo yaanɨ, anɨ nɨɨnɨ nahayihumʼmwezezya ʉmuntu ʉbhiibhi.”#Bhaazya ɨNyiizuho 32:35. 20Nantele ɨNsimbo ɨMfinjile ziyiga hu nongwa ɨya‑aweezezye iliiga huje,

“Nkashele ʉnʼnʉgʉ waaho ali nɨ nzala, ʉmʼpeele ɨshalye.

Nantele nkashele ali nɨ nyoota, ʉmʼpeele ɨsha‑amwele.

Nkashele wabhomba ɨsho, ʉnza‑abhe nanshi huje

ʉtwinshile ʉmwoto ʉgwɨ mazimya pi‑itwe lyakwe.”#12:20 ʉnza‑abhe nanshi huje ʉtwinshile ʉmwoto ʉgwɨ mazimya pi‑itwe lyakwe Abhamanyiihanyi abhanjɨ abhi‑Ibhangili bhayiga, ʉnza‑abhe ʉnʼkenyensiizye hu nongwa yɨ bhiibhi waakwe hwi‑idala ɨlyɨ winza waaho. Bhaazya ɨNjango 25:21-22.

21Ʉgandi amenwe nɨ mbiibhi ɨzyo ʉbhombelwa na bhantu, lyoli ʉmene ɨmbiibhi hwi‑idala ɨlya hubhabhombele ɨnyinza.

Currently Selected:

ABhaluumi 12: SBK

Highlight

Copy