ABhaluumi 10
10
1Bhooziwa bhamwetu, ɨnyonywa tee mu mwoyo gwanɨ nɨ mpuuto zyanɨ hwa Ngʉlʉbhɨ huje abhamwetu aBhaizilaeeli bhafyʉlwe nʉ Ngʉlʉbhɨ. 2Ɨsimishizya huliimwɨ huje abhantu ɨbho bhahwanza tee humʼmombele shinza ʉNgʉlʉbhɨ, leelo saga bhamɨɨnye idala ɨlinza ɨlya humʼmombele ʉmwene. 3Abheene saga bhahalondoleziizye idala ɨlyo ʉNgʉlʉbhɨ ahubhabhaazizya abhantu ʉgolosu, ɨpo bhahanza idala lyabho bhɨɨbho. Bhahakhaanile alondolezye idala lya Ngʉlʉbhɨ ɨlya hubhabhaazizye abhantu ʉgolosu. 4Enya, ʉKilisiti ahamalɨzɨɨzye ɨndajizyo zya Moose, huje abhantu bhonti bha bhahumʼmwɨtɨha bhabhanje bhabhaaziwa ʉgolosu.
Abhantu bhonti bhabhajiiye afyʉlwe
5Hu nongwa ɨya huwaaje ʉgolosu hwi‑idala ɨlya‑alondolezye ɨndajizyo, ʉMoose ahasimbile huje, “Ʉmuntu ʉyo ahayikhata gonti ga gahalajiziiwe mu ndajizyo, ahayibha nʉ wʉʉmi hwi‑idala ɨlya‑alondolezye ɨzyo.”#Bhaazya ɨMbombo ɨzya Bhalaawi 18:5. 6Leelo hu nongwa ɨya‑abhaaziwe ʉgolosu hwi‑idala ɨlyɨ lwɨtɨho, ʉMoose ahasimbile ahajile, “Mugandi ahwibhʉzɨɨlɨzye mu mooyo geenyu huje, ‘Weenu abhajiiye azʉbhe afishe hu mwanya?’ ” Hwa huje, hunʼnaabhe ʉKilisiti ayiishe mu nsi. 7“Awe huje, ‘Weenu ʉwa hwishe afishe hu bhafwe?’ ” Hwa huje, hunʼzyʉsye ʉKilisiti. 8Leelo ɨNsimbo ɨMfinjile ziyiga, “Izwi lya Ngʉlʉbhɨ lili mu pɨɨpɨ naawe, lili mwi‑ilomu lyaho na mu mwoyo gwaho.”#Bhaazya ɨNyiizuho 30:12-14. Izwi ɨlyo lya lizwi ɨlya humʼmwɨtɨshe ʉKilisiti ɨlyo tilʉmbɨɨlɨla. 9Ɨnongwa ɨyo hwa huje, nkashele ʉyanga hwi‑ilomu lyaho weewe huje, “ɄYeesu yʉ Mwɨnɨ,” na hwɨtɨshe mu mwoyo gwaho huje ʉNgʉlʉbhɨ ahanʼzyʉsyɨzye afume hwa bhafwe, aawe ʉnza‑afyʉlwe nʉ Ngʉlʉbhɨ. 10Ʉmuntu nkashele ahwɨtɨha hu mwoyo gwakwe, ɨpo abhaaziwa abhe nʼgolosu pitagaalila lya Ngʉlʉbhɨ. Nantele nkashele ayanje hwi‑ilomu lyakwe yʉʉyo, ɨpo afyʉlwa nʉ Ngʉlʉbhɨ.
11ƗNsimbo ɨMfinjile ziyanga huje, “Ʉmuntu wowonti ʉyo ahumʼmwɨtɨha saga ahayikenyensewa nka lumo.”#Bhaazya Yesaaya 28:16. 12Ɨnsimbo zilolesya huje nawumo ʉsalulwe ʉwa Bhayahuudi awe bha saga Bhayahuudi. ɄMwɨnɨ ali weeka, nantele yʉ Mwɨnɨ wa bhantu bhonti, wope ahubhasaya abhantu bhonti ɨbho bhahunʼnaabha. 13Ɨga gali nanshi ɨNsimbo ɨMfinjile ɨzyo ziyiga, “Ʉmuntu wowonti wa‑ahayihunʼnaabha na hunʼsʉʉbhɨle ʉMwɨnɨ, ahayifyʉlwa.”#Bhaazya Yooweli 2:32.
14Ɨshi, abhantu bhabhajiiye wɨlɨ hunʼnaabhe ʉyo saga bhamʼmwɨtɨɨshe? Nantele bhabhajiiye wɨlɨ humʼmwɨtɨshe nkashele saga bhalɨnjɨle ahwʉmvwe ɨnongwa zyakwe? Nantele bhahwʉmvwa wɨlɨ sinta alʉmbɨɨlɨlwe? 15Nantele bhalʉmbɨɨlɨla wɨlɨ nkashele saga bhasonteleziiwe? Nanshi ɨsho ɨsimbwilwe mu Nsimbo ɨMfinjile huje, “Wa‑aleeta ɨNongwa ɨNyinza ahayibha ahubhakhondeezya abhantu!”#Bhaazya Yesaaya 52:7. 16Hwope ɨsho, saga huje aBhaizilaeeli bhonti bhahɨtɨɨshe ɨNongwa ɨNyinza ɨzyo, abhinji bhahakhaanile. Enya, ʉnʼkuwi ʉYesaaya ahajile, “Wee Mwɨnɨ, weenu ʉyo ayɨtɨɨshe ɨnongwa zyetu?”#Bhaazya Yesaaya 53:1. 17Ɨshi, ʉlwɨtɨho lufumilana na hwʉmvwe izwi, izwi ɨlyo lyɨ Nongwa ɨNyinza ɨzya Kilisiti.
18Leelo ɨbhʉzɨɨlɨzya huje, wɨlɨ, aBhaizilaeeli saga bhalɨnjɨle ahwʉmvwe? Lyoli bhahʉmvwɨzye, pɨpo ɨNsimbo ɨMfinjile ziyiga,
“Ɨnongwa zyabho zyahʉmvwɨshe mu nsi yonti,
gope amazwi gaabho gahafishile hwope hu malishilo wɨ nsi.”#Bhaazya ɨNsalifyo 19:4.
19Nantele ɨbhʉzɨɨlɨzya huje, wɨlɨ, aBhaizilaeeli saga bhahazyagɨɨnye? Ndaali, bhahazyagɨɨnye, pɨpo hu habhaazyo ha Moose ʉNgʉlʉbhɨ ahajile,
“Ɨnza hubhabhombe amwɨ huje mubhalolele ɨjɨɨla
abhantu ɨbho saga Bhaizilaeeli,
bhope abhantu ɨbho saga bhahuzyaganya,
ɨnza hubhabhombe bhabhanje bhahubhaviitilwa amwɨ tee.”#Bhaazya ɨNyiizuho 32:21.
20Nantele, ʉnʼkuwi ʉYesaaya ayanga hu dandamazu amazwi ga Ngʉlʉbhɨ huje,
“Abhantu ɨbho saga bhahananzile,
bha bhɨɨbho bhandolile.
Abhantu ɨbho saga bhabhʉzɨɨlɨzya ɨnongwa zyanɨ,
ɨhwilolesiizye hwa bheene.”#Bhaazya Yesaaya 65:1.
21Hwope ɨsho, ɨnongwa ɨzya Bhaizilaeeli, ʉNgʉlʉbhɨ ayiga,
“Ʉsanya wonti nahanzaga akʉndane na bhantu bhaanɨ ɨbho saga bhatinisu,
nantele bhi‑idali.”#Bhaazya Yesaaya 65:2.
Currently Selected:
ABhaluumi 10: SBK
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
