ƗMbombo ɨzya Bhasontwa 25

ɄPaulo pilongolela lya Feesito

1ɄFeesito lwa waafiha hwi‑ibooma ɨlyɨ Kayisaliiya, ahanda alongozye ʉmukowa ʉgwɨ Yudeeya. Ɨnsiku zitaatu lwa zyashila, ahashʉʉla, ahabhala hwi‑ibooma ɨlyɨ Yelusaleemu. 2Ɨshi hu habhaazyo lwa‑ali ʉhwo, abhalongozi bha bhasayi bha Ngʉlʉbhɨ peeka na bhagoosi bhamo bha Bhayahuudi bhahabhala humʼmʉʉzye gonti ga bhanʼtaakile ʉPaulo. Bhahanʼnambaga haani 3bhahagaga, “Ʉtɨtɨshɨle aje, ʉPaulo atwalwe hwi‑ibooma ɨlyɨ Yelusaleemu.” Bhahanʼnambaga ɨsho, pɨpo abheene bhahɨtɨhɨɨne humʼmwʉbhɨle na hunʼgoje ʉPaulo mwi‑idala. 4Wope ʉFeesito ahabhaamula ahaga, “ɄPaulo ahayijendeelela alɨndɨɨlɨlwe na bhalɨndɨɨlɨli mwi‑ilinga hwi‑ibooma ɨlyɨ Kayisaliiya. Nanɨ ɨmbala‑agalushe ʉhwo shɨɨshi lwene. 5Ɨshi musalule abhalongozi bheenyu bhamo huje, ɨngalushe peeka nabho ʉhwo. Bhafumye ʉsimishizi waabho, nkashele huli ni‑ibhiibhi lyolyonti ɨlyo ʉPaulo lya‑ahabhombile, nkɨ‑ɨmanye.”

6ɄFeesito ʉnʼnongozi ʉwɨ mukowa lwa waakhala hu Yelusaleemu ɨnsiku zya saga zyahashilile naana awe ishʉmi, ahabhala hu Kayisaliiya. Ɨndaabhɨ yaakwe ahakhala pi‑itengo lyakwe ɨlya‑alonjele ɨnongwa. Ɨpo ahabhalajizya abhalwi huje, bhanʼneete ʉPaulo pitagaalila lyakwe. 7ɄPaulo lwa waafiha mwi‑ikoloti muula, ahabhaaga aBhayahuudi bha bhɨnzɨle afume hu Yelusaleemu, bhahanʼzyʉngʉʉla. Bhahanʼtaakaga ɨmbiibhi ɨnyinji, zyope bhahapotwaga huzisimishizye.

8Ɨpo ʉPaulo ahanda ahwiyʉʉmɨle ahaga, “Anɨ saga ɨntulile nka zimo hu nongwa yɨ ndajizyo zyetu tiBhayahuudi, awe hu nongwa yɨ nyumba ɨmfinjile ɨya Ngʉlʉbhɨ, awe hu nongwa ya mwɨnɨ ʉnʼgoosi ʉKayisali.”

9Leelo ʉFeesito ʉmwene ahanzaga hubhasʉngwɨzye aBhayahuudi, ahamʼmʉzɨɨlɨzya ʉPaulo ahaga, “Bhʉlɨ, ʉgɨɨtɨha aje, ʉbhale hu Yelusaleemu alongwe na bhantu ɨbha pitagaalila lyanɨ hu nongwa ɨnɨ?”

10ɄPaulo ahamʼmwamula ahaga, “Ndaadi, anɨ saga ɨhwɨtɨha aje ɨmbale hu Yelusaleemu. Ɨshi, ɨnɨmɨlɨɨye pitagaalila li‑itengo ɨlya witongwa wa‑abhɨhwɨlwe nʉ mwɨnɨ ʉnʼgoosi ʉKayisali. Pɨɨpa pɨ‑ɨhondɨɨye alongwe alɨngaane nɨ ndajizyo ɨzyɨ Shiluumi. Aawe weewe ʉmɨɨnye shinza huje, saga ɨntulile nka zimo hu Bhayahuudi abhamwetu. 11Ɨshi, nkɨ‑ɨntulile lyolyonti na‑aje, ɨhwanziwa huje ɨndongwe afwe, saga ɨngakhaana. Leelo, hu nongwa ya‑aje, aBhayahuudi ɨbha bhahuntaaka ɨnongwa ɨzi‑ilenga lwene, nʉʉmo ʉmuntu wa‑ahwanziwa huhate na huntwale hwa Bhayahuudi ɨbha. Anɨ ɨlaabha huje, ɨnongwa yaanɨ ɨbhale alongwe hwi‑ibooma ɨlyɨ Luumi hwa mwɨnɨ ʉnʼgoosi ʉKayisali!”#25:11 ɨnongwa yaanɨ ɨbhale alongwe hwi‑ibooma ɨlyɨ Luumi hwa mwɨnɨ ʉnʼgoosi ʉKayisali Ʉmuntu wowonti ʉyo ahali Nʼnuumi, ahɨtɨshɨlɨɨlwe atwale ɨnongwa yaakwe hu Luumi pilongolela lya mwɨnɨ ʉnʼgoosi ʉyo bhahagaga Kayisali.

12Ɨpo ʉFeesito ahajeehana na bhaavwi bhaakwe. Pamandɨ ahamʼmwamula ʉPaulo ahaga, “Weewe ʉpiluuye ɨnongwa yaaho huje, ɨbhale alongwe hwa mwɨnɨ ʉnʼgoosi ʉKayisali. Ɨshi, wahayibhala alongwe hwa mwɨnɨ ʉnʼgoosi ʉKayisali!”

ɄFeesito alaabha ajeehane nʉ mwɨnɨ ʉAgilipa

13Lwa zyashila ɨnsiku nyishe, ʉmwɨnɨ ʉAgilipa peeka nʉ yɨlʉmbʉ waakwe ʉBeenike bhahabhala hu Kayisaliiya hunʼnamushe ʉFeesito ʉnʼnongozi ʉwɨ mukowa. 14Bhahakhala ɨpo ɨnsiku ɨnyinji. Mu nsiku ɨzyo, ʉnʼnongozi ʉFeesito ahamʼmamila ʉmwɨnɨ ʉAgilipa ɨnongwa ɨzya Paulo. Ahamʼmʉʉzya ahaga, “Alɨɨho ʉmuntu ʉmo wa‑ahakʉngwɨlwe mu hoobhe nʉ Feeliki, lwa‑asɨɨle asogole. 15Hu habhaazyo ha nahali hu Yelusaleemu, abhalongozi bha bhasayi bha Ngʉlʉbhɨ na bhagoosi bha Bhayahuudi bhahambʉʉzya ɨnongwa zya bhahunʼtaakila ʉPaulo. Bhahandaabha ɨnʼnonje huje ali na malando aga‑agogwe.

16Leelo nahabhabhʉʉzya huje, saga miiho geetu atɨ tiBhaluumi hunʼnonje ʉmuntu, sha‑asɨɨle akhomaane na bhantu bha bhahunʼtaaka na hwiyʉʉmɨle zya bhahunʼtaakila. 17Nahaweela ɨpa peeka na bhaala bha bhahunʼtaaka ʉPaulo. Ɨndaabhɨ yaakwe lwa hwasha, nahakhala pi‑itengo lyanɨ ɨlya‑alonjele ɨnongwa, nahabhalajizya abhalwi huje, bhanʼneete ʉPaulo. 18Lwa bhanʼneeta mwi‑ikoloti, bhaala bha bhahunʼtaaka bhahɨmɨɨlɨla, bhahanda hunʼtaake. Leelo, ɨnongwa zya bhahanʼtakilaga saga zyahali mbiibhi haani, nanshi sha nahasʉbhɨɨye. 19Lyoli bhahadalihanaga nawo hu mabhʉzɨɨlɨzyo agɨ mpuuto zyabho lwene, peeka nɨ nongwa zya muntu ʉmo wa‑ahafwiye. Itaawa lyakwe ʉmuntu ʉyo, bhahagaga yʉ Yeesu. ɄPaulo ahanʼnyangaga ʉmuntu ʉyo huje, ali mwʉmi. 20Anɨ saga nahalolile idala ɨlya‑amanye ɨlyoli hu nongwa ɨnɨ. Ɨpo nahamʼmʉzɨɨlɨzya ʉPaulo, nkashele ahwɨtɨha abhale hu Yelusaleemu, nka‑alongwe ʉhwo. 21Leelo, ʉPaulo ahapilula ɨnongwa ɨyo. Ahalaabha huje, alɨndɨɨlɨlwe mwi‑ilinga afishe ʉmwene nɨ nongwa yaakwe lwa‑ahayitwalwa hwa mwɨnɨ ʉnʼgoosi ʉKayisali. Ɨpo nahalajizya huje, alɨndɨɨlɨlwe mwi‑ilinga afishe lwa nalyaga idala ɨlya hunʼtwale hwa mwɨnɨ ʉnʼgoosi ʉKayisali.”

22Ɨpo ʉAgilipa ahamʼmʉʉzya ʉFeesito ahaga, “Nasʉngwaga aje, ɨmʼmwʉmvwe nɨɨnɨ ʉmuntu ʉyo.” ɄFeesito ahaga, “Wahayihumʼmwʉmvwa ɨndaabhɨ.”

ɄPaulo pitagaalila lya mwɨnɨ ʉAgilipa

23Lwa hwasha, ʉAgilipa peeka nʉ Beenike bhahɨnza hu madiiho amagoosi. Bhahatʉʉha mwi‑ikoloti peeka na bhagoosi bha bhagoosi abha bhalwi, nantele na bhagoosi abhi‑ibooma. ɄFeesito ahanʼnajizya ʉnʼnwi huje, anʼneete ʉPaulo muuhati. 24Ɨpo ʉFeesito ahanda ayanje ahaga, “Mwɨnɨ Agilipa, naamwɨ mwenti mwa mubhʉngɨɨne peeka naatɨ! Ʉmuntu ʉnʉ wa muhunʼnola pitagaalila ɨpa, ya yʉʉyo aBhayahuudi bhonti bhahamʼmunaga huliinɨ lwɨ‑ɨndi hu Yelusaleemu, nɨ‑ɨpa pa Kayisaliiya lwa naweela. Bhahabwagaga ibwago bhahagaga, ‘Ʉmuntu ʉyo akhondɨɨye afwe!’ 25Ɨshi, anɨ saga nahalilolile ibhiibhi lyolyonti lya likhondɨɨye huje, agaagogwa. Leelo, hu nongwa ya‑aje, ʉmwene ahandaabhile huje, ɨnongwa yaakwe ɨbhale alongwe hu Luumi nʉ mwɨnɨ ʉnʼgoosi ʉKayisali, ɨpo nanɨ nahaamula huje, bhahanʼtwale hu Luumi. 26Hwope ɨsho, anɨ saga ɨndi ni‑izwi ɨlya‑asimishizye hu nongwa ya Paulo huje, ɨnganʼsimbila ʉmwɨnɨ weetu ʉnʼgoosi. Sha shɨɨsho ɨnʼneetile pitagaalila lyenyu, haani pitagaalila lyaho aawe mwɨnɨ Agilipa aje, lwa taamala humʼmʉzɨɨlɨzye, ɨpo ɨmbala‑abhe ni‑izwi ɨlya hunʼsimbile ʉmwɨnɨ ʉnʼgoosi ʉKayisali. 27Anɨ saga ɨndolile shinza hunʼtwale ʉnʼkʉngwe hwa mwɨnɨ ʉnʼgoosi ʉKayisali sinta hunʼsimbile ɨnongwa zya bhahunʼtaakila.”

Currently Selected:

ƗMbombo ɨzya Bhasontwa 25: SBK

Highlight

Copy