Lukas 7
7
Kura di kriadu di kapiton
(Mat 8.5-13)
1Oca ku Jesus kaba fala ku pobu tudu e kusas, i yentra na prasa di Kafarnaun. 2Un kapiton romanu teneba un kriadu ki kiri ciu; i staba duenti, kuas pa muri. 3Kapiton obi di Jesus, i manda garandis di judeus pa e bai pidil pa i bin kural si kriadu. 4Oca ke ciga nunde Jesus, e pidil ku ngodu, e falal: “E omi mersi pa bu fasil e fabur, 5pabia i ama no nason. I el propi ku kumpunu kasa di juntamentu.”
6Jesus bai ku elis. Oca i pertu ciga kasa, kapiton manda utru si amigus pa falal: “Siñor, ka Ñu kansa ku ciga, pabia N ka mersi pa Ñu yentra na ña kasa, 7nin N ka oja kuma N mersi bai dianti di Ñu. Fala un palabra son; ña kriadu ta san. 8Ami tambi i omi ku sta bas di otridadi, N tene soldadus bas di ña ordi. Si N fala un son: ‘Bai!’ i ta bai. Si N fala utru: ‘Bin!’ i ta bin. Ña kriadu, si N falal: ‘Fasi asin!’ i ta fasil.”
9Oca ku Jesus obi ki palabra, i dimira di ki omi. I rabida, i fala pa multidon ku na sigilba: “N na konta bos kuma, nin na Israel N ka oja fe garandi suma es.”
10Kilis ku mandaduba e riba pa kasa, e oja ki kriadu san ja.
Fiju di viuva di Nain
11Dipus di un bokadu, Jesus bai pa un prasa ku comadu Nain. Manga di si disipulus bai ku el, ku garandi multidon di jinti. 12Oca ki ciga pertu di porton di prasa, i kontra ku jinti ku na leba un difuntu, un fiju son di si mame ku seduba viuva. Manga di jinti di prasa na kumpañal. 13Oca ku Siñor oja ki minjer, i sinti garandi pena#Jon 11.35,38 del, i falal: “Ka bu cora.” 14I ciga, i toka na kaŝon; kilis ku na lebal e para. Jesus fala: “Rapas, abo ku N na fala,#Kap 8.54; Jon 11.43; At 9.40 lanta!” 15Difuntu lanta i sinta, i kumsa na papia. Jesus ntregal pa si mame.
16Medu garandi#Kap 1.65-66 kai riba delis tudu; e da Deus gloria, e fala: “Un garandi#Jon 4.19; 6.14; 9.17 anunsiadur lanta na no metadi.” E fala tambi: “Deus visita si pobu!”
17E noba di Jesus laga pa tudu Judeia, ku tudu ki reẑions pertu.
Jon manda dus disipulu nunde Jesus
(Mat 11.1-6)
18Disipulus di Jon kontal tudu e kusas. 19Jon coma dus delis, i manda elis pa e bai punta Jesus si i el ku tenba ku bin, o si e na pera utru.
20Oca ku ki omis ciga nunde Jesus, e falal: “Jon Batista mandanu pa no puntau si abo i kil ku tenba ku bin, o si no na pera utru.”
21Na ki ora Jesus kura manga di duenti, utrus ku duensa ku ta kamba, utrus ku spiritu mau; i pui manga di segu pa e oja. 22I ruspundi i fala elis: “Bo bai, bo konta Jon ke ku bo oja, ku bo obi: segus#Is 35.5-6 na oja, mankus na yanda, jinti ku tene mpincu na kuradu, surdus na obi, mortus na lanta, Bon Noba#Kap 4.18 na kontadu pa koitadis. 23Sortiadu i kil ku ka pirdi fe na mi.”
Jesus fala di Jon Batista
(Mat 11.7-19)
24Oca ku jinti ku Jon mandaba e riba, Jesus kumsa na fala pa multidon kusa di Jon; i punta: “Ke ku bo sai pa jubi na lala? Un kana ku bentu na bulbuli? 25Ke ku bo bai jubi? Un omi ku bisti ropa bonitu? Kilis ku ta bisti ropa finu, ku ta sta na sabura, na palasiu di rei ke ta sta. 26Ke ku bo sai pa jubi? Un anunsiadur? Bardadi, N na fala bos, i mas di ki#Kap 1.76 anunsiadur. 27Es i kil ku Deus fala del na Skritura: ‘N na manda ña servu#Is 40.3; Mal 3.1 bu dianti, ku na kumpu kamiñu pa bo.’ 28N na konta bos kuma, i ka ten ningin ku padidu ne mundu ki mas Jon, ma kil ki mas pikininu na renu di Deus i mas garandi di ki el.”
29Tudu kilis ku obil, te ku kobraduris#Kap 3.12 di mpustu, e ngaba Deus, pabia e setaba batismu di Jon, 30ma fariseus ku pursoris di lei ku ka seta si batismu e nega#Kap 20.5; 1 Tes 4.8 planu di Deus pa elis.
31Jesus punta mas: “Kin ku N dibi di kompara jinti di gosi ku el? Ku kin ke parsi? 32E parsi suma mininus#Zak 8.5 ku sinta na prasa, e na grita ŋutru: ‘No toka bos#Kum 4.21; Jo 21.12; 30.31 flauta, bo ka baja! No kanta bos kantiga tristi, bo ka cora!’ 33Jon Batista bin, i ka kume pon, nin i ka bibi#Kap 1.15 biñu; bo fala: ‘I tene dimoniu.’ 34Fiju di omi bin, i ta kume, i ta bibi; bo fala: ‘Es i ta kume dimas, kaba i bibidur, amigu di kobraduris#Kap 15.2; Mat 9.11 di mpustu ku jinti di mau nomi!’ 35Ma rusultadu di jiresa di Deus i na mostra kuma i bardadi!”
Jesus na kasa di Simon, fariseu
36Un fariseu kumbida#Mat 26.6-7 Jesus pa i bai kume ku el. I yentra na si kasa, i toma si lugar na mesa. 37Un minjer di ki prasa ku teneba mau vida, oca ki sibi kuma Jesus staba na mesa na kasa di ki fariseu, i tisi un jaru kumpudu di un pedra lebi ku ta comadu alabastru, ku teneba purfumu. 38I fika tras, lungu di pe di Jesus, i na cora, i kumsa na mojal pe ku larma, i na limpal ku si kabelu; i na dal beẑu na pe, i na untal ki purfumu. 39Oca fariseu ku kumbidal oja ki kusa, i fala dentru del: “Si es omi sedu anunsiadur, i na sibiba e minjer i kin, i kal koldadi ku na tokal, pabia i minjer di mau vida.”
40Jesus ruspundi i falal: “Simon, N tene un kusa pa falau.” I falal: “Mestre, kontan.”
41Jesus falal: “I tenba dus omi ku dibi utru omi diñeru. Un dibil kiñentus mueda di prata,#7.41 Un mueda di prata pudiba sedu pagamentu pa un dia di tarbaju. utru sinkuenta. 42Suma e ka tenba manera di paga se dibida, e purdadu, tudu dus. Kontan de, kal delis ku mas na amal?”
43Simon ruspundi i falal: “N kuda i kil ku purdadu mas ciu.” Jesus falal: “Bu kuda diritu.” 44I rabida pa minjer, i fala Simon: “Bu oja e minjer li? N yentra na bu kasa, bu ka dan yagu#Kum 18.4; 19.2; Jon 13.5; 1 Tim 5.10 pa N laba pe, ma el ku si larma i mojan pe, i limpal ku si kabelu. 45Bu ka dan beẑu, ma el, desdi ku N yentra, i ka para dan beẑu na pe. 46Bu ka untan oliu na kabesa, ma el, i unta ña pe ku purfumu. 47Asin N falau kuma, si manga di pekadu#Kap 5.20-21 sta ja purdadu; e ku manda i ama ciu, ma kil ku purdadu puku, i ta ama puku.”
48I fala minjer: “Bu pekadus sta purdadu.” 49Kilis ku staba ku el na mesa kumsa na papia entri elis, e punta: “Es i kin ku, te pekadu i ta purda?” 50Jesus fala minjer: “Bu fe#Kap 8.48; 18.42 salbau. Bai ku pas.”
Currently Selected:
Lukas 7: povB
Highlight
Share
Copy
Want to have your highlights saved across all your devices? Sign up or sign in
© 1993-2020, Instituto de Tradução e Alfabetização