Lukas 5
5
Piska di milagri
(Mat 4.18-25; Mar 1.16-20)
1Un dia Jesus sikidu lungu di lagua di Jenesaré. Multidon na kalkalba pa obi palabra di Deus. 2I oja dus barku nkajadu na praia, ku piskaduris kumsa ria nel, e na lababa ridias. 3I kamba na un delis ku sedu kil di Simon, i pidil pa i lunjusil un bokadu di praia. I sinta na barku, i kontinua na nsina multidon.
4Oca ki kaba papia, i fala Simon: “Bo bai pa kau fundu, bo bota#Jon 21.6 bo ridias pa piska.”
5Simon ruspundil: “Mestre, no tarbaja ciu noti ntidu, no ka paña nada, ma suma ku bu fala asin, N na bota ridia.” 6E bota, e paña manga di pis, tok ridia misti rumpi. 7E sana se kumpañeris ku staba na utru barku pa e bin juda elis. E bai, e inci tudu dus barku, tok i falta pikininu pa e foga. 8Oca ku Simon Pedru oja ke ku kontisi, i mborka dianti di Jesus, i falal: “Siñor, lunjusi di mi, pabia ami i un omi#Jo 42.5-6; Is 6.5 di pekadu!”
9El ku tudu kilis ku staba ku el e fika spantadu pabia di ki manga di pis ke paña, 10suma tambi Tiagu ku Jon, fijus di Zebedeu, ku seduba sos di Simon. Jesus fala Simon: “Ka bu medi; di aos pa dianti bu na sedu piskadur di omi.”
11E leba barkus, e nkajanta elis na praia; e disa#Mat 19.27 tudu, e sigi Jesus.
Kura di un omi ku teneba mpincu
(Mat 8.1-4; Mar 1.40-45)
12Oca ki staba na un di ki prasas, i tenba un omi la ku mpincu toma konta di si kurpu. I oja Jesus, i mborka ku rostu na con, i pidil, i fala: “Siñor, si bu misti, bu pudi limpan.”
13Jesus distindi mon, i tokal, i falal: “N misti; fika limpu!” Na ki ora mpincu pirdi nel. 14Jesus dal ordi pa ka i konta ningin nada, i falal: “Bai, bu mostra saserdoti#Sir 14.3-4,10,21-22 bu kurpu; suma ku bu sta limpu, bu ta da oferta ku Moisés manda pa i sedu tustumuñu pa elis.”
15Si fama#Mat 4.24-25 mas na laga. Manga di jinti ta juntaba pa obil, tambi pa i kura elis se duensas, 16ma el i ta buskaba sempri un lugar dingidu#Mat 14.23 pa bai ora.
Kura di un omi ku ka ta yandaba
(Mat 9.1-8; Mar 2.3-12)
17Un dia, oca ki na nsina jinti, i staba la tambi sintadu fariseus ku pursoris di lei, ku binba di Jerusalen ku tudu tabanka di Galileia ku Judeia. Puder di Siñor staba ku el pa kura. 18Utru omis bin, e tisi un omi na kanape pabia i duensi tok i ka pudi bulbuli si kurpu. E buska manera di lebal dentru, pa ditandal dianti di Jesus. 19Suma ke ka oja manera di yentra ku el pabia di manga di jinti, e subi na kankra, e tira tija, e riantal na kanape na metadi di jinti, dianti di Jesus. 20Oca ki oja fe di ki omis, i fala duenti: “Omi, bu pekadu sta ja purdadu.”
21Pursoris di lei ku fariseus e kumsa na punta na se sintidu: “Es i kin ku na lebsi Deus? Kin ku pudi purda pekadu#Sal 32.5; 51.1-10; Is 43.25 si i ka Deus son?”
22Jesus ntindi se pensamentu, i ruspundi elis, i punta: “Ke ku manda bo na pensa de manera? 23Kal ki mas lestu, pa fala: ‘Bu pekadu sta ja purdadu,’ o pa fala: ‘Lanta, bu yanda’? 24N na mostra bos kuma Fiju di omi ten puder na tera pa purda pekadu.” I rabida, i fala duenti: “Abo ku N na fala, lanta, bu toma bu kanape, bu bai pa bu kasa.”
25Na ki ora i lanta se dianti, i toma kanape ki ditaba nel, i bai pa si kasa, i ngaba Deus. 26Tudu jinti fika dimiradu, e ngaba Deus, e fika ku spantu, e fala: “Aos no oja kusas di dimirason!”
Jesus coma Levi (Mateus)
(Mat 9.9-13; Mar 2.14-17)
27Dipus de kontisimentu, i sai, i oja un kobradur di mpustu ku comadu Levi i sintaba na si kau di kobransa. I falal: “Bin no bai.” 28I lanta, i disa tudu, i bai ku el.
29Levi fasi garandi festa na si kasa pa Jesus. I staba la manga di kobradur di mpustu ku utru jinti ku na kumeba ku elis na mesa. 30Fariseus ku se pursoris di lei e na rui disipulus di Jesus, e punta elis: “Ke ku manda bo ta kume bo bibi ku kobraduris di mpustu, ku jinti di mau nomi?”
31Jesus ruspundi elis: “Jinti san ka pirsisa di mediku, ma son kilis ku duensi. 32N ka bin coma jinti bon, ma N bin coma jinti ku ta peka#Kap 19.10; 1 Tim 1.15 pa e ripindi.”
Jinti punta kusa di junjun
(Mat 9.14-17; Mar 2.18-22)
33E falal: “Disipulus di Jon ta junjuŋa manga di bias, e ta fasi orason, suma tambi kilis di fariseus, ma di bo e ta kume, e ta bibi.”
34Jesus punta elis: “Bo pudi fasi kumbidadus di kasamenti pa e junjuŋa nkuantu noivu sta ku elis? 35Tempu na ciga ke na tiradu noivu. Ki ora e na bin junjuŋa.”
36I da elis tambi un komparason, i fala: “Ningin ka ta sapa padas di kamisa nobu pa bota rumbu na kamisa beju. Si i fasi asin, ki kamisa nobu na dana; menda ka ta fila ku ki beju. 37Tambi ningin ka ta pui biñu ku ka fermenta inda na saku di kuru beju, pabia ki biñu nobu ta rumpi kuru beju, biñu ta darma, saku ta dana. 38Biñu nobu dibi di pudu na saku di kuru nobu. 39Kin ku bibi biñu beju i ka ta misti ki ora bibi biñu nobu, pabia i ta fala: ‘Beju i mas bon!’ ”
Currently Selected:
Lukas 5: povB
Highlight
Share
Copy
Want to have your highlights saved across all your devices? Sign up or sign in
© 1993-2020, Instituto de Tradução e Alfabetização