Isaias 30
30
I ka bali pena fiansa na Ejitu
1SIÑOR fala: “Koitadi fijus rebeldi, ku ta forma planus ku ka sedu di mi; e ta fasi kontratu, ma i ka di ña vontadi; e buri pekadu riba di pekadu. 2E ta pega kamiñu pa Ejitu#Kap 31.1 pa buska suguransa na forsa di Faraó, ku fiansa na sombra di Ejitu, sin puntan#Num 27.21; 1 Re 22.7; Jer 21.2 nada, 3ma forsa di Faraó i na tisi bos son#Kap 20.5; Jer 37.7 borgoña; fiansa ku bo ten na sombra di Ejitu na tisi kunfuson. 4Se ŝefis sta na#Kap 19.11 Zoan, se mbaŝaduris e ciga na Anes,#30.4 Anes o Tafnes 5ma e na pudu na borgoña pabia di un pobu ku ka na sirbi elis pa nada, e ka na juda elis nin e ka na ten purbitu pa elis, ma son borgoña ku trosa.”
6Es i rekadu di Deus aserka di limarias di sul di Judá: Mbaŝaduris na pasa na tera di kansera ku kasabi, nunde ki ten lion macu ku femia, tutu ku kobra venenosu ku ta buanta kabesa. E ta leba se rikesas riba di burus, utru kusas di balur riba di kamelus, pa un pobu ku ka na da elis ajuda. 7Ejitu ta juda elis amonton. Pa kila N comal: “Dragon ku ka ta fasi nada.”
8Bai, bu skirbi#Ab 2.2 e palabra na un tagua se dianti, bu pasal na un libru, pa i fika suma tustumuñu pa sempri na tempu ku na bin, 9pabia es i pobu rebeldi, fijus munturus, fijus ku ka ta misti sukuta lei di SIÑOR, 10ku ta fala videntis: “Ka bo oja mas vison;” e fala#1 Re 22.13; Jer 11.21 anunsiaduris: “Ka bo anunsianu kusas ki diritu; bo kontanu son kil ku no gosta del, bo anunsia konformi no imaẑinason. 11Bo sai na kamiñu, ka bo tajanu; bo para#At 13.8 pui Deus Santu di Israel pa i sta no dianti.”
12Ma Deus Santu di Israel fala: “Bo nega e palabra, bo nkuña na violensia ku nganu, bo fiansa nel. 13Pabia di kila e maldadi na sedu pa bos suma paredi altu ku findi di riba, i kukula, pruntu pa kai di repenti. 14I na kebra suma puti ku kebradu sin sinti pena del. I ka na ten nin un padas ku pudi sirbi pa toma brasa di fugu, nin un pa kata yagu ku el na lagua.”
15Asin ku SIÑOR Deus, Deus Santu di Israel, fala: “Bo konverti, bo diskansa; bo ta sedu salbu. Si bo#Kap 7.4 susega, bo fiansa na mi, bo ta ten forsa,” ma bo ka misti#Mat 23.37 kila. 16Bo fala: “Nau, no na monta na kabalu, no kuri.” Asin, bardadi, bo na kuri. Bo fala: “No na monta kabalus ku ta kuri kinti-kinti, no bai.” Asin, kilis ku na bai bo tras, elis tambi e na kuri kinti-kinti. 17Un algin#Sir 26.8; Lei 28.25; Dit 28.1 na ameasa mil; e na kuri. Sinku na ameasa bos, bo na kuri tudu, tok bo fika suma bandera isadu na si po riba di monti o montisiñu. 18Ma SIÑOR misti#2 Ped 3.9 mostra si miserikordia pa bos, i na lanta pa mostra bos amor, pabia SIÑOR i no Deus justu; tudu kilis ku na spera nel e#Dit 16.20; Jer 17.7 sortiadu.
19Pobu di Sion ku mora na Jerusalen, bu ka na cora mas. Ora ku bu coma SIÑOR, i na obi bu vos, i na sinti pena di bo, i kudiu. 20Inda ku SIÑOR da bos pon di kasabi ku yagu di sufrimentu, bu pursoris ka na sukundi mas di bo; bu uju na oja elis. 21Ora ku bu na disvia pa direita#Jos 1.7 o skerda, bu na obi vos di kil ku sta bu tras, ku na fala: “Es ki kamiñu; bo yanda nel.” 22Bu idulus labradu, ku kubridu ku prata, ku bu imaẑens fundidu di uru, bu na tene elis suma kusa nujenti, bu bota elis#Kap 2.20; 31.7; 2 Kron 31.1 fora suma panu susu, bu fala elis: “Bo sai di li!”
23I na mandau#Mat 6.33 cuba riba di simentera ku bu sumia na con; bu na tene bon kebur; tera na pruduzi ciu. Na ki tempu bu limarias na bakiadu na kaus mas largu ku tene bon paja. 24Bakas ku burus ku ta labra e na kume bon kumida ku purparadu, i yabridu ku pá ku garfu pa elis. 25Na ki dia di garandi matansa, ora ku toris kai, korentis di yagu na kuri di riba di tudu monti, kilis ku mas altu ku kilis menus altu. 26Na ki dia ku SIÑOR na liga kebradura di si pobu, i kura se firidas ki pui nelis, lua na lampra suma sol; lus di sol na lampra seti bias mas, suma lus di seti dia.
27Ali Nomi di SIÑOR na bin di lunju,
na si raiba ku na yardi,
ku nuven sukuru di fumansa.
Si boka inci raiba,
si lingua i suma fugu ku ta kema tudu.
28Si folgu i suma korenti di yagu ku na inci dipresa
tok i ciga na garganti.
I ta pineria nasons ku pineria di distruison;
i pui freiu na boka di jinti
ku na fasi elis pa e yara.
29Ma na bo metadi i na ten kantiga,
suma na noti di festival sagradu.
Bo korson na kontenti
suma di kilis ku na sai e na toka flauta
pa bai pa monti di SIÑOR,
pa Deus ku sedu Roca di Israel.
30SIÑOR na pui gloria di si vos pa i obidu,
i na pui jinti oja si mon ku na disi
ku raiba ku na yardi,
lingua#Kap 29.6 di fugu ku ta kema tudu,
ku turbada forti ku relampagu,
ku cuba di pedra.
31Ku si vos SIÑOR na padasa Asiria,
i na molosta elis ku si bingala di renansa.
32Kada suti ku SIÑOR na da ku ki po di kastigu
i na kumpañadu ku tambriñas ku arpas.
SIÑOR na geria ku elis ku pankada riba di pankada.
33Kau di fugu#30.33 Kau di fugu o Tofet sta purparadu disna,
i sta purparadu pa rei.
I fasidu fundu i largu;
Manga di leña sta la.
Supru di SIÑOR na sai suma korenti
di fugu ku nŝofri pa sindil.
Currently Selected:
Isaias 30: povB
Highlight
Copy
Compare
Share
Want to have your highlights saved across all your devices? Sign up or sign in
© 1993-2020, Instituto de Tradução e Alfabetização
