Luka 6:27-49

“Miya biza ka nyi, nyi se nyi ya rakara akan, ebarse ne ano binyarna bonyi, awe ano ageme se nga ze ma barsa o nǝrǝ ka nyi ni tolo. E sangarra Ogomo Asharri ma we ano tinza akanyi, osana, ekuri awe ano nya ka nyi uwahalla beroromo. Innga woi, woi ware opuwa ogina, owangarra o repo me gaze, innga woi kai udi osaru a ngo, uzuzu owa yimmi ogora ma nu. Zal ono gome se ma sanngarra eyabo a ngo onya me. Ono gome se ma yete eyabo ekei, togo ogo ama akursi neng no ne. Wuza ano nane se nyi neng barsa guna nga ta awuze nyi. “Ingase nyi ya barsa anagemese nga barsa nyi ze base, yaze nyi ya morra me Ogomo Asharri? Baka se ano masharra ma nga barsa ano ageme se nga barsa nye ze! Ingase nyi ya wuza ano wuza akanyi tolo toze tolo yaze nyi ya morra me Ogomo Asharri? Ano masharra ma nga wuza nane. Ingase ana geme se nga morra nga kursu nyi anuzi nga ze nyi ya nyakanye oduru base, yaze nyi ya morra me Ogomo Asharri? Baka ano masharra nga nyiza oduru a nye topana doguna nga kursu na nem me. A nyi, barse ne ano nyamine akǝnyi. Ewuza nye tolo. Nyizane oduru tego wuza adodonzo ogona a ya kursa ka nyi anumi. In ge owoza nane ze eya morra tolo to chebete, eya chǝkǝnǝ sakama Ogomo Asharri ono saru, baka me ono wuza ma rreze maze, ano se nga man ogodiyane nye gaze ane evira. Chǝkǝnǝ ne ane jai, sakama ashuo okunyi se ma zen ejai. “Tego e nya woi esharra ne, nane ze Ogomo Asharri ze ma nya ka nyi esharra ne, tego wucu woi tomono ne azema wuca akanyi tomono ne tego mantǝ woi abiruwa ne azema manta ka nyi ne. Nyiza ne, a ya nyiza ka nyi, ukuyange obinja, a ya nokeme, azuku ukungkuzu, a ya wangarra o dangara me oware udi. Baka nane ze ukuyange ogome se nyi na gose neng no, oze a ya gose ka nyi neng no.” Nze Yeso kuru gonnye ayimi takara beleng ma go, “Uru neng wongku uru yeko? Nye zalle nga ma garra ayewo ne? Oye vana omasa ozemanu se ma neng kera oneyemasanga me ne, inga se vana me mana jamu omasa me zal maya chǝkǝnǝ sakama oneyemasanga rrome. “Baka yaze ngona ngona a ji kovezo ayi rreji yo wanomo okoi, a ngo den nǝri yekutu a ngo a rriji ya rroi ne? In ni zi, ngo ya bukuma owanoye, ‘Ngo, owanong, deken zuzui kovezo kogeme se koya ngo ayi rreji,’ a ngo den nǝri yekutu ye geme se eya ngo ayi rreji ne? Ngo ne evira! Bura zuzu yekutu ye geme se ye za ngo a rriji yarroi doguna onari dede nane se ngonang zuzu kovizo ayi rreji yo wanoye. “Otiti orreze, ota yoso eburu esharro ne, otiti osharro, ota yoso eburu e ngoma ne. Aro koye otiti neng eburu me ata taza akwafu otiti bikanane, ne aneng taza innabi otiti bikana. Ono ngoma ma wuzaza to gogorro to ngoma togeme se tuya ma abiruwa, baka onevira ma wuzaza togogorro tusharro togeme se tuya ma abiruwa, eme geme se eya yimi biruwa e ze asusu anu. “Baka eyaze nyi gosan mi, ‘Achakura, Achakura,’ a nyi ma wuza epegeme se mina buku ne? Zal ono geme se ma rauwami ma rakarrong, ama kunan maya wuza eme geme se miya narra me, deken beze nyi nanese ono meze. Maze sakama, ono gome se maya siya atitauwa me, nze ma gǝsǝ anyanga gwerrep nze ma shiti bigun ba tau bi me ataro opo. Nze orawa kabinja nze manyi maka suru ma terre ataumi nze ata zukuni baka mase bigun beme ataro opo. Ono gome se ma kuna beleng nga bon mata ngona epegeme se, mina guna ama we ne maze gagare ung ono gome se mata siya bigun be ngoma ne, Ma siya anyanga ze base ingase manyi mo rawa ma binja ma terre ataumi a dorra arizi. Urizi atitǝu wa agemme asharro dede.”