Romanos 7

Tu̱ꞌun kúnkunuún jie̱ꞌe̱ꞌ ñɨvɨ nta̱na̱ꞌá ya̱ xínéꞌénꞌ‑e na̱sa nákuíñɨꞌ núne ñɨvɨ nkɨ́ꞌɨ ráa ka̱ꞌ nu̱u̱nꞌ ley nta̱túníꞌ Ndiosíꞌ

1Ránoꞌó ñanitáꞌán, káꞌánꞌ ni̱ꞌ jín ñɨvɨ ya̱ jíníꞌ tu̱ꞌun káchíꞌ ley nta̱túníꞌ Ndiosíꞌ. ¿Á ntu jíníꞌ rán ya̱ ley tátúníꞌ nu̱u̱nꞌ ñɨvɨ ni tékúꞌ ñɨvɨ vá? 2Chi ɨɨn ñaꞌan ya̱ nta̱na̱ꞌá jee sáꞌá ley ya̱ yɨ́ꞌɨ́ ña nu̱u̱nꞌ yɨɨ́ ña ni tékúꞌ re̱ꞌ. Soo retú ni̱ꞌi̱ꞌ yɨɨ́ ña, nákuíñɨꞌ núne ña nu̱u̱nꞌ tu̱ꞌun tátúníꞌ ley vá ya̱ yɨ́ꞌɨ́ ña nu̱u̱nꞌ yɨɨ́ ña. 3Saáva retú tana̱ꞌá ñaꞌan vá jín inka te̱e ni tékúꞌ yɨɨ́ ña jee káchíꞌ‑ó ya̱ kúvi ña ñaꞌan téní. Soo retú ni̱ꞌi̱ꞌ yɨɨ́ ña, jee nákuíñɨꞌ núne ña nu̱u̱nꞌ ley vá, jee retú natana̱ꞌa ña jín inka te̱e ntu ñasɨ́ꞌɨ́, jee nsáꞌ kuvi ña ñaꞌan téní.

4Jee suni sukuán vá, ránoꞌó ñaniꞌ ni̱ꞌ jín ku̱ꞌva ni̱ꞌ, nkɨ́ꞌɨ rán ka̱ꞌ xi̱ntíín tu̱ꞌun ley nta̱túníꞌ Ndiosíꞌ yanaꞌán chi kuéntáꞌ ni̱ꞌi̱ꞌ rán nu̱u̱nꞌ ley vá chi jíꞌín rán ni̱ꞌi̱ꞌ rán jín Cristo sáá ni̱ꞌi̱ꞌ re̱ꞌ jín yɨkɨkúñu re̱ꞌ, sáva kɨꞌɨ rán nu̱u̱nꞌ inka ka̱ꞌ. Chi yɨ́ꞌɨ́ rán nu̱u̱nꞌ Cristo ya̱ nnako̱o re̱ꞌ jee nna̱tekuꞌ i̱i̱ꞌ re̱ꞌ nkene re̱ꞌ nteñu rá ni̱yɨ. Yɨ́ꞌɨ́ rán nu̱u̱nꞌ re̱ꞌ sáva kueꞌnu na̱a̱ꞌ‑ó kɨtíñú‑ó nu̱u̱nꞌ Ndiosíꞌ. #7:4 Kuéntáꞌ kúun ɨɨn yutun rá vixíꞌ váꞌa. 5Chi sáá ntu yɨ́ꞌɨ́‑ó xi̱ntíín Ndiosíꞌ jee ñaꞌnu‑ó sánikua̱ꞌ níyo iniꞌ‑ó, jee jie̱ꞌe̱ꞌ tátúníꞌ ley Ndiosíꞌ ya̱ koto sáꞌá kua̱chi, jee xínóto‑o iniꞌ‑ó ya̱ níyo iniꞌ‑ó saꞌá‑ó kua̱chi. Jee sukuán nsa̱tíñú‑u iniꞌ ñunéꞌyúꞌ kua̱chi‑ó sáva saꞌá‑ó tiñu niváꞌa, saáva kenta‑ó kuéntáꞌ kuviꞌ‑ó nu̱u̱nꞌ Ndiosíꞌ. 6Jee nyɨ̱ꞌɨ‑ó xi̱ntíín ley vá nékúvi, soo kuéntáꞌ ya̱ ni̱ꞌi̱ꞌ‑ó nu̱u̱nꞌ ley vá saáva vitan nákuíñɨꞌ núne‑ó nu̱u̱nꞌ ley vá. Sáva kɨtíñú‑ó nu̱u̱nꞌ Ndiosíꞌ sáni sáꞌá Ta̱chi̱ꞌ Ííꞌ ya̱ nakueꞌnu‑ó ichi jiáá, jee nsú ichi túꞌú jiáꞌnu‑ó sáni ñaꞌnu‑ó chi̱ji xi̱ntíín ley sáni ntee Moisés nu̱u̱nꞌ tutuꞌ yanaꞌán.

Kua̱chi ya̱ yɨ́ꞌɨ́ ánímaꞌ ni̱ꞌ

7Saájee, ¿ná kúvi ya̱ kachiꞌ‑ó résa? ¿Á kúvi ley kua̱chi résa? ¡Ntu̱ví kuitɨꞌ! Soo ni nsáꞌ kukáꞌnú iniꞌ ni̱ꞌ ná kúvi kua̱chi retánꞌ nsú ley káchíꞌ maa. Chi suni ni nku̱níꞌ ni̱ꞌ ná kúvi ya̱ nééꞌ uꞌvi iniꞌ, retánꞌ ntu káchíꞌ ley: “Koto nééꞌ uꞌvi iniꞌ nú rá nantíñú inka ñɨvɨ.” 8Soo jie̱ꞌe̱ꞌ tu̱ꞌun tátúníꞌ Ndiosíꞌ, jee nku̱neí kua̱chi ntɨɨn‑ɨ nuꞌuꞌ, jee nsa̱ꞌá‑a ya̱ ntáká nu̱u̱nꞌ ya̱ nééꞌ uꞌvi iniꞌ ni̱ꞌ. Chi retánꞌ ntu̱ví ley nta̱túníꞌ Ndiosíꞌ jee kuéntáꞌ níꞌiꞌ kua̱chi ya̱ ntu ka̱ꞌ fesáꞌ‑a kúneí víꞌí kosoꞌ nu̱u̱nꞌ ni̱ꞌ. 9Jee ni̱yo ɨɨn tiempúꞌ ya̱ ñaꞌnu ni̱ꞌ, sáá ntiáꞌan kuniꞌ ni̱ꞌ ná tátúníꞌ ley Moisés, nékúvi. Soo sáá nkenta nku̱káꞌnú iniꞌ ni̱ꞌ ná káchíꞌ tu̱ꞌun tátúníꞌ Ndiosíꞌ, jee kuéntáꞌ nna̱tekuꞌ kua̱chi ni̱ꞌ sáva kuneí‑i jín ni̱ꞌ, jee kuéntáꞌ naanꞌ ni̱ꞌ. 10Jee kuéntáꞌ ni̱ꞌi̱ꞌ ni̱ꞌ nu̱u̱nꞌ Ndiosíꞌ, chi nna̱niꞌinꞌ ni̱ꞌ ya̱ tu̱ꞌun tátúníꞌ Ndiosíꞌ yaꞌá ya̱ njia̱ꞌa re̱ꞌ sáva kutekuꞌ va̱ꞌa ni̱ꞌ, nékúvi, soo nsa̱ꞌá ley vá ya̱ kuéntáꞌ ni̱ꞌi̱ꞌ ni̱ꞌ nu̱u̱nꞌ re̱ꞌ. 11Chi jie̱ꞌe̱ꞌ tu̱ꞌun tátúníꞌ Ndiosíꞌ, jee kúneí kua̱chi tɨ́ɨn nuꞌuꞌ, jee nxi̱náꞌví‑i nuꞌuꞌ, jee suni jie̱ꞌe̱ꞌ tu̱ꞌun vá ñaꞌniꞌ kua̱chi vá nuꞌuꞌ. 12Saáva i̱i̱ꞌ tu̱ꞌun ley njia̱ꞌa Ndiosíꞌ nu̱u̱nꞌ Moisés, jee i̱i̱ꞌ tu̱ꞌun vá ya̱ tátúníꞌ Ndiosíꞌ, jee na̱a̱ꞌ kúvi‑i, jee va̱ꞌa kúvi‑i.

13Saájee, ya̱ tu̱ꞌun váꞌa vá, ¿á nkenta nsa̱ꞌá‑a ya̱ kuviꞌ ni̱ꞌ? ¡Ntu kúvi kuitɨꞌ! Chisaꞌ máá kua̱chi ña̱tíñú‑u ley va̱ꞌa vá, sáva saꞌá‑a kuviꞌ ni̱ꞌ nu̱u̱nꞌ Ndiosíꞌ, sáva stúvi ya̱ kúvi‑i kua̱chi. Chi sukuán stúvi tu̱ꞌun tátúníꞌ Ndiosíꞌ ya̱ níváꞌa nasɨ́kuitɨꞌ kúvi kua̱chi.

14Chi jíníꞌ‑ó ya̱ va̱ji ley nu̱u̱nꞌ Ta̱chi̱ꞌ Ííꞌ, jee nuꞌuꞌ kúvi ni̱ꞌ ñɨvɨ ñunéꞌyúꞌ, ya̱ yɨ́ꞌɨ́ ni̱ꞌ xi̱ntíín kua̱chi kuéntáꞌ kúvi ni̱ꞌ musúꞌ ya̱ nkuya̱ꞌvi. 15Chi ntu jiáku̱ꞌun iniꞌ ni̱ꞌ ya̱ sáꞌá ni̱ꞌ. Chi tiñu ya̱ kuíni ni̱ꞌ saꞌá ni̱ꞌ, jee yaꞌá ntu sáꞌá ni̱ꞌ. Chisaꞌ tiñu táꞌvi iniꞌ ni̱ꞌ, jee yaꞌá sáꞌá ni̱ꞌ. 16Soo retú sáꞌá ni̱ꞌ ya̱ ntu kuíni ni̱ꞌ saꞌá ni̱ꞌ, jee kúnáaꞌ iniꞌ ni̱ꞌ ya̱ váꞌa kúvi ley. 17Saáva nsú nuꞌuꞌ sáꞌá ni̱ꞌ maa, chisaꞌ kua̱chi ya̱ yɨ́ꞌɨ́ iniꞌ ni̱ꞌ kúvi ya̱ sáꞌá maa. 18Chi jíníꞌ ni̱ꞌ ya̱ ntu yɨ́ꞌɨ́ ya̱ váꞌa iniꞌ ni̱ꞌ, ya̱ kúvi ya̱ níyo iniꞌ ni̱ꞌ jín ñunéꞌyúꞌ kua̱chi ni̱ꞌ. Chi ñúꞌún iniꞌ ni̱ꞌ ya̱ kuíni ni̱ꞌ saꞌá ni̱ꞌ ya̱ váꞌa, soo ntu íyó iniꞌ ni̱ꞌ ya̱ saꞌá ni̱ꞌ ya̱ váꞌa. 19Chi ntu sáꞌá ni̱ꞌ ya̱ váꞌa ya̱ kuíni ni̱ꞌ, chisaꞌ ya̱ niváꞌa ya̱ ntu kuíni ni̱ꞌ saꞌá ni̱ꞌ, yaꞌá sáꞌá ni̱ꞌ. 20Jee retú ya̱ ntu kuíni ni̱ꞌ saꞌá ni̱ꞌ, jee yaꞌá sáꞌá ni̱ꞌ, jee nsú káꞌ nuꞌuꞌ sáꞌá maa, soo kua̱chi ya̱ yɨ́ꞌɨ́ iniꞌ ni̱ꞌ kúvi ya̱ sáꞌá maa.

21Saáva nániꞌinꞌ ni̱ꞌ ya̱ suꞌva sáꞌá‑a jín ni̱ꞌ: sáá kuíni ni̱ꞌ saꞌá ni̱ꞌ ya̱ váꞌa, soo ya̱ niváꞌa yɨ́ꞌɨ́‑ɨ iniꞌ ni̱ꞌ. 22Chi ne̱ ánímaꞌ ni̱ꞌ kúsɨ́ɨꞌ iniꞌ ni̱ꞌ néꞌyá ni̱ꞌ ley tátúníꞌ Ndiosíꞌ. 23Soo jíníꞌ ni̱ꞌ ya̱ iniꞌ yɨkɨkúñu ni̱ꞌ íyó inka ka̱ꞌ tu̱ꞌun níyo néꞌén iniꞌ ni̱ꞌ saꞌá ni̱ꞌ, jín ya̱ kuíni ni̱ꞌ saꞌá ni̱ꞌ sáni káchíꞌ tu̱ꞌun tátúníꞌ Ndiosíꞌ, jee súkúnꞌ táꞌán ráa iniꞌ antúníꞌ ni̱ꞌ. Jee kúneí vá tɨ́ɨn‑ɨ nuꞌuꞌ yɨ́ꞌɨ́ ni̱ꞌ nu̱u̱nꞌ ya̱ tátúníꞌ kua̱chi ya̱ sátíñú vá iniꞌ yɨkɨkúñu ni̱ꞌ. 24¡Na̱ ka̱ꞌ náꞌví ni̱ꞌ ka̱ꞌ! ¿Né ɨɨn sikáku nuꞌuꞌ nu̱u̱nꞌ yɨ́ꞌɨ́ ni̱ꞌ xi̱ntíín kua̱chi ya̱ sátíñú iniꞌ ñunéꞌyúꞌ ni̱ꞌ jín ya̱ xináánꞌ‑a nuꞌuꞌ? 25¡Nkútaꞌviꞌ‑ó nu̱u̱nꞌ Ndiosíꞌ!, jie̱ꞌe̱ꞌ ya̱ nsa̱ꞌá I̱toꞌoꞌ‑ó Jesús ya̱ kúvi Cristo.

Saáva jín antúníꞌ ni̱ꞌ yɨ́tíñú ni̱ꞌ nu̱u̱nꞌ ley tátúníꞌ Ndiosíꞌ, jee jín máá maá fuersáꞌ ni̱ꞌ ntu kúvi, chi jín ya̱ níyo iniꞌ ni̱ꞌ jín yɨkɨkúñu kua̱chi ni̱ꞌ yɨ́tíñú ni̱ꞌ nu̱u̱nꞌ ya̱ tátúníꞌ kua̱chi.

Currently Selected:

Romanos 7: meh

Highlight

Copy

Compare