Romanos 13

Chiꞌi rán maárán xi̱ntíín rá ñɨvɨ néetiñu

1Ntáká ñɨvɨ íyó chiꞌi ráa maáráa xi̱ntíín rá ñɨvɨ nísotíñú ya̱ tátúníꞌ rává. Chi ntu̱ví ñɨvɨ nísotíñú retánꞌ nsú Ndiosíꞌ nsa̱ꞌá sukuán. Jee rá ñɨvɨ nísotíñú ya̱ íyó, jee maá Ndiosíꞌ ñakɨnꞌ re̱ꞌ tiñu ya̱ kunisotíñú ráa. 2Saáva ɨɨn ñɨvɨ ya̱ núníꞌin‑i nu̱u̱nꞌ rá ñɨvɨ nísotíñú, ya̱ njiáꞌa Ndiosíꞌ ya̱ kunisotíñú ráa jee núníꞌin ñɨvɨ vá nu̱u̱nꞌ ya̱ nta̱túníꞌ Ndiosíꞌ. Jee rá ñɨvɨ ya̱ núníꞌin, jee ni̱ꞌi̱nꞌ ráa ya̱ kunoꞌo ráa. 3Chi rá ñɨvɨ tátúníꞌ, jee nsáꞌ nísotíñú ráa sáva chuyúꞌví ráa iniꞌ rá ñɨvɨ ya̱ sáꞌá tiñu váꞌa, chisaꞌ rá ñɨvɨ ya̱ sáꞌá tiñu niváꞌa. ¿Á kuíni nú ya̱ nsáꞌ kuyu̱ꞌví nú rá ñɨvɨ nísotíñú nu̱u̱nꞌ nú? Jee saꞌá nú ya̱ váꞌa, résa, jee ni̱ꞌi̱nꞌ nú ya̱ nakuetúꞌún ráa noꞌó. 4Chi kúvi ráa musúꞌ nu̱u̱nꞌ Ndiosíꞌ jiátíñú re̱ꞌ ráa, sáva kuvi ya̱ váꞌa nu̱u̱nꞌ nú. Soo retú sáꞌá nú tiñu niváꞌa jee kuyu̱ꞌví nú, chi nsáꞌ ka̱ꞌá vá níso ráa tiñu ya̱ xinóꞌo ráa rá ñɨvɨ. Chi kúvi ráa musúꞌ Ndiosíꞌ ya̱ jiátíñú re̱ꞌ ráa, sava nachunáán ráa xinóꞌo ráa rá ñɨvɨ sáꞌá tiñu niváꞌa. 5Jee saáva íyó chiꞌi‑ó maáó xi̱ntíín ráa, nsú kua̱chi kuitɨꞌ jie̱ꞌe̱ꞌ ya̱ xinóꞌo ráa, chisaꞌ suni jie̱ꞌe̱ꞌ ya̱ jíníꞌ‑ó iniꞌ ánímaꞌ‑ó ya̱ íyó na̱a̱ꞌ sáꞌá‑ó sukuán sáni kuíni Ndiosíꞌ.

6Saáva suni chúnáán‑ó xu̱ꞌún náneeꞌ rá ñɨvɨ nísotíñú, chi suviráa vá jiátíñú Ndiosíꞌ ráa sáꞌá ráa tiñu njia̱ꞌa re̱ꞌ jee yɨ́táꞌán nééꞌ kuéntáꞌ ráa tiñu yaꞌá. 7Jee chunáán rán nu̱u̱nꞌ nta̱ká rá ñɨvɨ ya̱ táyáꞌvi rán. Retú táyáꞌvi rán xu̱ꞌún náneeꞌ vetíñú, jee chunáán rán maa. Jee retú táyáꞌvi rán xu̱ꞌún tetáꞌán, jee chunáán rán maa. Jee nu̱u̱nꞌ ñɨvɨ ya̱ íyó saꞌá ñáꞌnú rán, jee saꞌá ñáꞌnú rán nu̱u̱nꞌ ñɨvɨ vá. Jee nu̱u̱nꞌ ñɨvɨ ya̱ íyó nakuatáꞌví rán, jee nakuatáꞌví rán ráa. 8Koto na̱ kútaya̱ꞌvi rán nu̱u̱nꞌ ni ɨɨn ñɨvɨ, chisaꞌ íyó jie̱ꞌe̱ꞌ ya̱ táyáꞌvi rán ya̱ íyó kunu̱u̱nꞌ rán ɨɨn inka táꞌán rán ya̱ sukuáni íyó chunáán rán maa. Chi ñɨvɨ ya̱ ñúnúunꞌ‑u táꞌán‑a, jee ya̱ nsi̱kúnkuvi‑i ya̱ tátúníꞌ ley Ndiosíꞌ. 9Chi suꞌva tátúníꞌ ley Ndiosíꞌ: “Koto sáꞌá téní nú, koto sáꞌá nú ni̱yɨ, koto sáꞌá kuíꞌná nú, [koto sáꞌá túꞌún nú], koto ñúnúunꞌ nú nantíñú kúmí táꞌán nú.” Jee ntáká rá tu̱ꞌun yaꞌá jín néni ɨɨn inka tu̱ꞌun tátúníꞌ Ndiosíꞌ, jee ɨɨn nuún kéne káꞌánꞌ‑a jín tu̱ꞌun yaꞌá: “Íyó kunu̱u̱nꞌ nú ñanitáꞌán nú kuéntáꞌ ñúnúunꞌ nú maánú.” 10Chi ñɨvɨ ya̱ ñúnúunꞌ‑u táꞌán‑a, jee ntu̱náꞌ niváꞌa sáꞌá‑a nu̱u̱nꞌ táꞌán‑a. Saáva ya̱ ñúnúunꞌ‑ó vá ví ya̱ síkúnkuvi‑ó nu̱u̱nꞌ káchíꞌ ley ya̱ tátúníꞌ Ndiosíꞌ.

11Jee jie̱ꞌe̱ꞌ nta̱ká yaꞌá, jee tɨɨn kuéntáꞌ rán tiempúꞌ vitan ya̱ va̱kuyatin ki̱vɨ̱ꞌ niji Cristo. Koto íyó rán kuéntáꞌ ñɨvɨ kíxíꞌ ya̱ ntu nániꞌvɨꞌ iniꞌ ráa jie̱ꞌe̱ꞌ vá. Yaꞌá íyó maá hora ya̱ íyó kuéntáꞌ nako̱o‑ó ya̱ kíxíꞌ‑ó, chi nku̱yatin ka̱ꞌ tiempúꞌ ya̱ nanitáꞌvíꞌ‑ó nsú káꞌ ne̱ sáá nka̱jiéꞌé nku̱neí iniꞌ‑ó Cristo. 12Chi kúvi kuéntáꞌ ya̱ ya kua̱jia̱ꞌa yakuááꞌ, jee ya̱ va̱ji kunijinꞌ ki̱vɨ̱ꞌ. Jee íyó sukuíta‑ó tiñu niváꞌa nsa̱ꞌá‑ó kuéntáꞌ nu̱u̱nꞌ neenꞌ. Íyó kukutú‑ó kueꞌnu‑ó nu̱u̱nꞌ tiñu na̱a̱ꞌ váꞌa ya̱ xtúúnꞌ ñuꞌunꞌ Ndiosíꞌ ánímaꞌ‑ó, kuéntáꞌ nákúꞌun‑ó saꞌma ka̱a sáva kantáꞌán‑ó kuéntáꞌ soldado. 13Jee kueꞌnu na̱a̱ꞌ‑ó kuéntáꞌ kaka‑ó nuví jee nsú kuéntáꞌ nu̱u̱nꞌ neenꞌ. Jee koto sáꞌá‑ó rá viko néꞌí, jín ya̱ koto jíꞌi‑ó ku̱ni‑ó, jín ya̱ koto kúsíkɨ́ iniꞌ‑ó tiñu téní, jín ya̱ koto sáꞌá néꞌí‑ó, jín ya̱ koto kántáꞌán‑ó, jín ya̱ koto kóo u̱ꞌvi̱ꞌ iniꞌ‑ó. 14Chisaꞌ íyó koo‑ó kuéntáꞌ I̱toꞌoꞌ‑ó Jesús ya̱ kúvi Cristo, jee koto ñúꞌún iniꞌ‑ó ka̱ꞌ saꞌá‑ó máá tiñu niváꞌa ka̱ꞌ ya̱ sáni níyo iniꞌ‑ó jín yɨkɨkúñu kua̱chi‑ó.

Currently Selected:

Romanos 13: meh

Highlight

Copy

Compare