Romanos 12

Na̱sa íyó kueꞌnu jiáá‑ó ya̱ yɨ́tíñú‑ó nu̱u̱nꞌ Ndiosíꞌ

1Saáva, ránoꞌó ñanitáꞌán ni̱ꞌ, jie̱ꞌe̱ꞌ ya̱ nníꞌinꞌ yó ya̱ náꞌví iniꞌ Ndiosíꞌ yó, jee saáva náxinániꞌvɨꞌ ni̱ꞌ iniꞌ rán ya̱ nasokoꞌ tékúꞌ rán maárán nu̱u̱nꞌ Ndiosíꞌ sáva kɨtíñú rán nu̱u̱nꞌ re̱ꞌ ya̱ kusɨ́ɨ́n rán kene rán nu̱u̱nꞌ ya̱ niváꞌa, jín ya̱ kueꞌnu rán sáni kúváꞌa iniꞌ re̱ꞌ néꞌyá re̱ꞌ maa. Yukuán kúvi nijia ya̱ néñu̱ꞌun rán re̱ꞌ jín ánímaꞌ rán. 2Jee koto jiáꞌnu rán ka̱ꞌ sáni jiáꞌnu rá ñɨvɨ ñɨ̱vɨ́ yaꞌá vitan, chisaꞌ sama rán iniꞌ maárán nujiáá sáá jiáni antúníꞌ rán, sáva kenta kukáꞌnú iniꞌ rán ná kúvi ya̱ kuíni Ndiosíꞌ, ya̱ kúvi ya̱ váꞌa, ya̱ kúváꞌa iniꞌ re̱ꞌ néꞌyá re̱ꞌ maa, jín kúvi ya̱ naáꞌ.

3Chi, jie̱ꞌe̱ꞌ íyó mániꞌ iniꞌ Ndiosíꞌ vá nsi̱kútaꞌviꞌ re̱ꞌ tiñu kuniso ni̱ꞌ, jee káchíꞌ ni̱ꞌ nu̱u̱nꞌ ntáká ñɨvɨ nteñu rán: Koto jiáni iniꞌ nú ya̱ kúñáꞌnú nú ka̱ꞌ nsú káꞌ kua̱ꞌ sáni íyó nú, chisaꞌ kani kájí iniꞌ ta ɨɨn rán jie̱ꞌe̱ꞌ maánú, sánikua̱ꞌ ya̱ nñu̱ku̱ꞌva ya̱ nta̱sáva Ndiosíꞌ nu̱u̱nꞌ nú ta̱ꞌvi̱ꞌ ya̱ chineí re̱ꞌ noꞌó satíñú nú nu̱u̱nꞌ re̱ꞌ, sáni kúneí iniꞌ nú re̱ꞌ.

4Chi kuéntáꞌ kua̱ꞌ kue̱ꞌe̱ꞌ nu̱u̱nꞌ níso ñunéꞌyúꞌ‑ó soo nsú ɨɨn ni tiñu sáꞌá ráa. 5Jee suni sukuán súnika̱ꞌ kue̱ꞌe̱ꞌ‑ó íyó, soo kuéntáꞌ ɨɨn yɨkɨkúñu kúvi‑ó ya̱ yɨ́ꞌɨ́‑ó nu̱u̱nꞌ Cristo, jee ta ɨɨn‑ó yɨ́ꞌɨ́‑ó nu̱u̱nꞌ ɨɨn inka‑ó.

6Jee suni sukuán íyó sɨ́ɨ́n sɨ́ɨ́n rá ta̱ꞌvi̱ꞌ‑ó sáni nsi̱kútaꞌviꞌ Ndiosíꞌ nu̱u̱nꞌ ta ɨɨn ɨɨn‑ó chíneí re̱ꞌ sáꞌá‑ó tiñu re̱ꞌ. Retú ni̱ꞌi̱nꞌ nú ta̱ꞌvi̱ꞌ ya̱ nakani nú tu̱ꞌun kene yuꞌú Ndiosíꞌ, saꞌá maa sánikua̱ꞌ chúkúꞌva Ndiosíꞌ jiáꞌa re̱ꞌ ya̱ kúneí iniꞌ nú re̱ꞌ. 7Áxí retú nni̱ꞌi̱nꞌ nú ta̱ꞌvi̱ꞌ ya̱ chíneí táꞌán nú inka ñɨvɨ, jee chineí nú maa. Áxí retú nni̱ꞌi̱nꞌ nú ta̱ꞌvi̱ꞌ ya̱ xínéꞌénꞌ nú Tu̱ꞌun Ndiosíꞌ, jee xinéꞌénꞌ nú maa. 8Jee retú nni̱ꞌi̱nꞌ nú ta̱ꞌvi̱ꞌ ya̱ náxiníꞌvɨ́ꞌ nú iniꞌ ñɨvɨ, jee naxiníꞌvɨ́ꞌ nú iniꞌ ráa. Jee retú nni̱ꞌi̱nꞌ nú ta̱ꞌvi̱ꞌ ya̱ ku̱ꞌva nú ya̱ jíniñúꞌún táꞌán nú, jee ne̱ ánímaꞌ nú kuva̱ꞌa iniꞌ nú ku̱ꞌva nú maa. Jee retú nni̱ꞌi̱nꞌ nú ta̱ꞌvi̱ꞌ ya̱ kúvi yósóꞌ nú nu̱u̱nꞌ ñanitáꞌán‑ó, jee kávii ñunkúún saꞌá nú maa. Jee retú nni̱ꞌi̱nꞌ nú ta̱ꞌvi̱ꞌ ya̱ kúnáꞌví iniꞌ nú jíto va̱ꞌa nú rá ñɨvɨ táꞌánꞌ tu̱nóꞌó, jee ne̱ kusɨ̱ɨ̱ꞌ iniꞌ nú saꞌá nú maa.

Na̱sa íyó kueꞌnu ñɨvɨ ya̱ kúneí iniꞌ ráa Jesús

9Ne̱ saɨn kunu̱u̱nꞌ rán táꞌán rán, koto káñunkúún sáꞌá rán nika̱ꞌ. Jee kuniꞌ u̱ꞌvi̱ꞌ rán kune̱ꞌyá rán ya̱ niváꞌa. Jee kunikɨnꞌ rán saꞌá rán tiñu váꞌa. 10Jee kunu̱u̱nꞌ ñúnkúún iniꞌ rán ɨɨn inka táꞌán rán kuéntáꞌ ñúnúunꞌ rán ñaniꞌ maárán ya̱ nkaku jín rán. Jee nukú rán saꞌá ñáꞌnú rán ka̱ꞌ nu̱u̱nꞌ rá táꞌán rán nsú káꞌ maárán. 11Koto kúkúxí rán kuniꞌvɨꞌ iniꞌ rán jee ne̱ ánímaꞌ rán kuꞌun káñá iniꞌ rán kɨtíñú rán saꞌá rán tiñu nu̱u̱nꞌ I̱toꞌoꞌ‑ó. 12Jee kusɨ̱ɨ̱ꞌ iniꞌ ánímaꞌ rán jie̱ꞌe̱ꞌ ya̱ íyó tu̱neí iniꞌ rán ki̱vɨ̱ꞌ nétu rán ya̱ xinánitáꞌvíꞌ Cristo ránoꞌó. Jee keꞌneꞌ iniꞌ rán kuiñɨ ni̱ꞌin rán sáá nóꞌo rán tu̱nóꞌó. Jee kuni̱ꞌin kaꞌanꞌ rán jín Ndiosíꞌ. 13Jee chineí rán ya̱ jíniñúꞌún rá ñɨvɨ nsa̱ꞌá sɨ́ɨ́n Ndiosíꞌ ráa sáva kɨꞌɨ ráa nu̱u̱nꞌ Cristo. Jee koo ma̱ni̱ꞌ iniꞌ rán ku̱ꞌva rán ntíꞌ veꞌi rán kino̱o rá ñɨvɨ yɨ́ꞌɨ́ ráa nu̱u̱nꞌ Cristo ya̱ jíka ráa ichi.

14Ka̱ka̱nꞌ táꞌvíꞌ rán nu̱u̱nꞌ Ndiosíꞌ jie̱ꞌe̱ꞌ rá ñɨvɨ ya̱ jíto u̱ꞌvi̱ꞌ ránoꞌó. Jee koto chísónínu rán ráa nu̱u̱nꞌ ya̱ niváꞌa, chisaꞌ ka̱ka̱nꞌ táꞌvíꞌ rán ya̱ váꞌa jie̱ꞌe̱ꞌ ráa. 15Jee kusɨ̱ɨ̱ꞌ iniꞌ rán jín rá ñɨvɨ ya̱ kúsɨ́ɨꞌ iniꞌ ya̱ va̱ꞌa kua̱ꞌa̱nꞌ jín‑i, jee jiaku iniꞌ rán jín rá ñɨvɨ jiáku iniꞌ. 16Jee nuún koo iniꞌ ɨɨn inka rán jín táꞌán rán, jee koto sáꞌá téyɨ́ɨ́ rán maárán, chisaꞌ ɨɨn nuún saꞌá rán maárán jín rá ñɨvɨ láꞌví jee ɨɨn nuún nutútú rán jín ráa. Jee koto kúkaꞌvi iniꞌ rán ya̱ tu̱ꞌva víꞌí rán ka̱ꞌ nsú káꞌ rá ñanitáꞌán rán.

17Jee koto násaꞌá niva̱ꞌa rán nu̱u̱nꞌ ni ɨɨn ñɨvɨ ya̱ nsa̱ꞌá niva̱ꞌa‑a jín noꞌó. Kuniꞌvɨꞌ iniꞌ rán saꞌá rán tiñu váꞌa ichinúúnꞌ ntáká ñɨvɨ. 18Retú kúvi, na̱sa kua̱ꞌ kenta kúneí rán, kuniꞌvɨꞌ iniꞌ rán kuneeꞌ ñunkúún rán jín ntáká rá ñɨvɨ. 19Ránoꞌó ya̱ ñúnúunꞌ ni̱ꞌ, koto násaꞌá kini i̱i̱ꞌ rán rá ñɨvɨ ya̱ sáꞌá kini ráa ránoꞌó, chisaꞌ ku̱ꞌva rán ya̱ maá Ndiosíꞌ xinóꞌo rá ñɨvɨ vá jie̱ꞌe̱ꞌ kítɨ́ꞌ iniꞌ re̱ꞌ néꞌyá re̱ꞌ ráa. Chi sukuán níso nu̱u̱nꞌ Tutuꞌ Ííꞌ ya̱ káchíꞌ Ndiosíꞌ: “Maáníꞌ vá naxinóꞌo ni̱ꞌ ñɨvɨ sáꞌá niva̱ꞌa. Jee nuꞌuꞌ nachunáán maa, káchíꞌ I̱toꞌoꞌ‑ó.” 20Saáva: “Retú jíníꞌ u̱ꞌvi̱ꞌ ñɨvɨ ránoꞌó, jee retú jíso̱ko‑o, jee ku̱ꞌva rán kajiꞌ‑i. Jee retú jíchíꞌ‑i nute, jee ku̱ꞌva rán nute koꞌo‑o. Chi sukuán ku̱ꞌva rán tu̱nkánuun nu̱u̱nꞌ ráa ne̱ tɨɨn ñuꞌunꞌ nu̱u̱nꞌ ráa.” 21Koto jia̱ꞌa rán ya̱ kuneí ya̱ niváꞌa jín rán, chisaꞌ saꞌá rán ya̱ váꞌa jee suꞌva kuneí nú jín ya̱ niváꞌa vá.

Currently Selected:

Romanos 12: meh

Highlight

Copy

Compare