Apoclipsis 17

Jíta ñaꞌan téní xíkó ña maáña

1Saájee ɨɨn rá ni uxáꞌ najiáꞌáꞌ ííꞌ ya̱ ínaꞌá rá ni uxáꞌ ko̱ꞌo̱ꞌ vá nkenta‑a nu̱u̱nꞌ nuꞌuꞌ, Juan, jee nkachiꞌ‑i nu̱u̱nꞌ ni̱ꞌ:

―Neꞌenꞌ, jee stúvi ni̱ꞌ na̱ja teꞌneꞌ kua̱chi kunoꞌo máá ñaꞌan sɨ̱ɨ̱ꞌ iniꞌ ya̱ xíkó ña maáña ya̱ nééꞌ ña nu̱u̱nꞌ íyó víꞌí rá nute. 2Jee rá te̱e nísotíñú ya̱ tátúníꞌ nu̱u̱nꞌ rá ñuunꞌ íyó ñɨ̱vɨ́, kuéntáꞌ nsa̱ꞌá téní ráa jín ñaꞌan vá, jee kuéntáꞌ nsa̱ꞌá téní ña nsi̱jíta ña xi̱ni̱ꞌ rá ñɨvɨ nééꞌ ñɨ̱vɨ́ ne̱ ni̱so̱ꞌ ni̱ñɨ̱ꞌ ráa, kuéntáꞌ njia̱ꞌa ña nixiꞌ vinúꞌ uva niꞌi ráa ne̱ ni̱ni ráa.

3Saájee kua̱na̱ka‑a nuꞌuꞌ ne̱ nu̱u̱nꞌ ñu̱ꞌún saɨn jee yukuán niniꞌ ni̱ꞌ ka̱ꞌ ya̱ nstúvi nijinꞌ kájí Ta̱chi̱ꞌ Ííꞌ nu̱u̱nꞌ nuꞌuꞌ. Jee yukuán niniꞌ ni̱ꞌ ɨɨn ñaꞌan yósóꞌ ña ɨɨn kitɨ xéénꞌ kákini kuéꞌé, jee nɨ́ɨ́nkáꞌnú ti̱ꞌ níso rá súví ya̱ kúvi tu̱ꞌun níváꞌa si̱kɨ̱ꞌ Ndiosíꞌ. Jee u̱xa̱ꞌ xi̱ni̱ꞌ ti̱ꞌ, jee u̱ji̱ꞌ nikɨ ti̱ꞌ yósóꞌ. 4Jee ñaꞌan vá ñúꞌún ña saꞌma yɨ́yáꞌvi líꞌí jín kuéꞌé, jee nsi̱kútú ña maáña jín rá nantíñú oro jín rá yu̱u̱ꞌ xiñúꞌ máá ñunkúún yɨ́yáꞌvi, jín rá perla. Jee ínaꞌá ña ɨɨn ko̱ꞌo̱ꞌ oro, ya̱ iniꞌ ko̱ꞌo̱ꞌ vá ñúꞌún chitú máá tiñu níváꞌa, jín tiñu néꞌí sɨ́ɨ́ꞌ iniꞌ jíka ña sáꞌá ña. 5Jee te̱e̱nꞌ ña níso rá tu̱ꞌun:

Tu̱ꞌun yuꞌuꞌ

Babilonia ya̱ ñáꞌnú ka̱ꞌ,

nánáꞌ nu̱u̱nꞌ ntáká rá tiñu sɨ́ɨ́ꞌ iniꞌ jín nu̱u̱nꞌ rá tiñu néꞌí iniꞌ ñɨ̱vɨ́ yaꞌá.

Káchíꞌ tu̱ꞌun vá.

6Jee niniꞌ ni̱ꞌ ya̱ jíni ñaꞌan vá jín ni̱ñɨ̱ꞌ rá ñɨvɨ ya̱ yɨ́ꞌɨ́ ráa nu̱u̱nꞌ Ndiosíꞌ, jín ni̱ñɨ̱ꞌ rá ñɨvɨ ya̱ nnákani ráa ya̱ nááꞌ jie̱ꞌe̱ꞌ Jesús, ya̱ káchíꞌ‑ó ya̱ ñaꞌniꞌ víꞌí ña ráa. Jee nti̱vɨ́ víꞌí xíniꞌ ni̱ꞌ sáá niniꞌ ni̱ꞌ ña. 7Jee nkachiꞌ najiáꞌáꞌ ííꞌ vá nu̱u̱nꞌ ni̱ꞌ:

―¿Na̱ kuvi chi tívɨ́ xi̱ni̱ꞌ nú, rúsa? Nakachiꞌ ni̱ꞌ nu̱u̱nꞌ nú ná kúníꞌ káchíꞌ rá tu̱ꞌun yuꞌuꞌ jie̱ꞌe̱ꞌ ñaꞌan vá, jín jie̱ꞌe̱ꞌ kitɨ xéénꞌ kákini ya̱ níso ti̱ꞌ ña, ya̱ íyó u̱xa̱ꞌ xi̱ni̱ꞌ ti̱ꞌ, jín u̱ji̱ꞌ nikɨ ti̱ꞌ. 8Jee kitɨ xéénꞌ kákini ya̱ niniꞌ nú, ni̱yo ti̱ꞌ yanaꞌán, soo ntu íyó ti̱ꞌ vitan, chi íyó kene tuku ti̱ꞌ numaꞌ ya̱ ntu jínu nu̱u̱nꞌ kúnú‑u nu̱u̱nꞌ yɨ́ꞌɨ́ ti̱ꞌ, jee íyó kɨ̱ꞌɨ̱nꞌ ti̱ꞌ nu̱u̱nꞌ ji̱ta ti̱ꞌ kunoꞌo ti̱ꞌ. Jee íyó tutuꞌ ya̱ ne̱ ntiáꞌan kiko̱o ñɨ̱vɨ́ níso rá súví rá ñɨvɨ kutekuꞌ nɨ́ɨ́nkání jín Ndiosíꞌ. Jee rá ñɨvɨ nééꞌ ñɨ̱vɨ́ ya̱ ntu níso súví ráa nu̱u̱nꞌ tutuꞌ vá jee ti̱vɨ́ xíniꞌ ráa kuniꞌ ráa kitɨ vá, ya̱ ni̱yo ti̱ꞌ yanaꞌán, soo ntu íyó ti̱ꞌ vitan, jee koo tuku ti̱ꞌ.

9’Íyó kuníchí xi̱ni̱ꞌ ñɨvɨ sáva ki̱ku̱ꞌun va̱ꞌa iniꞌ‑i rává. Rá uxáꞌ xi̱ni̱ꞌ kitɨ xéénꞌ kákini vá kúvi u̱xa̱ꞌ yuku, nu̱u̱nꞌ ña̱kuneeꞌ ñaꞌan vá. Jee suni kúvi ráa u̱xa̱ꞌ te̱e nísotíñú tátúníꞌ nu̱u̱nꞌ rá ñuunꞌ. 10Jee u̱ꞌu̱nꞌ rá ni uxáꞌ rá te̱e tátúníꞌ ya nnaanꞌ ráa ntu ka̱ꞌ tátúníꞌ ráa, jee ɨɨn ráa tátúníꞌ vitan, jee inka ka̱ꞌ chi ntiáꞌan kiji‑i. Jee sáá kiji‑i jee yakuꞌ ni tiempúꞌ íyó kino̱o‑o tátúníꞌ‑i. 11Jee kitɨ xéénꞌ kákini ya̱ ni̱yo ti̱ꞌ yanaꞌán, soo ntu íyó ti̱ꞌ vitan, jee suviti̱ꞌ kúvi te̱e nísotíñú unáꞌ, ɨɨn táꞌán rá ni uxáꞌ te̱e tátúníꞌ vá. Jee kɨ̱ꞌɨ̱nꞌ‑ɨ nu̱u̱nꞌ naanꞌ‑a.

12’Jee ni ujíꞌ rá nikɨ ti̱ꞌ ya̱ niniꞌ nú, kuvi‑i u̱ji̱ꞌ rá te̱e nísotíñú, ya̱ ntiáꞌan ni̱ꞌi̱nꞌ ráa tatúníꞌ ráa. Soo kuíre ni̱ꞌi̱nꞌ ráa ya̱ kunisotíñú nkáá ráa jín kitɨ xéénꞌ vá, jee yakuꞌ ni tiempúꞌ tátúníꞌ ráa. 13Jee ni ujíꞌ rá te̱e tátúníꞌ vá, ɨɨn nuún ni nátúꞌún ráa, jee naku̱ꞌva ráa nɨꞌɨ fuersáꞌ níso ráa jín tiñu níso ráa nu̱u̱nꞌ kitɨ xéénꞌ kákini vá sáva tatúníꞌ ti̱ꞌ. 14Saájee kantáꞌán ráa jín maáréꞌ ya̱ kúvi Lanchi Lúlí Ndiosíꞌ. Jee Lanchi Lúlí vá kuneí re̱ꞌ si̱kɨ̱ꞌ ráa, chi maáréꞌ kúvi I̱toꞌoꞌ nu̱u̱nꞌ ntáká rá i̱toꞌoꞌ jín nísotíñú re̱ꞌ tátúníꞌ re̱ꞌ nu̱u̱nꞌ ntáká ráa ya tátúníꞌ rá nu̱u̱nꞌ rá ñuunꞌ. Jee rá ñɨvɨ ya̱ íñɨ́ jín re̱ꞌ kúvi ráa ya̱ nkana Ndiosíꞌ ráa, jín ya̱ nka̱ji re̱ꞌ ráa, jín ya̱ íñɨ́ ni̱ꞌin ráa síkúnkuvi na̱a̱ꞌ ráa nu̱u̱nꞌ re̱ꞌ ―nkachiꞌ najiáꞌáꞌ ííꞌ vá.

15Jee suni nkachiꞌ‑i nu̱u̱nꞌ ni̱ꞌ:

―Jee rá nute ya̱ niniꞌ nú nu̱u̱nꞌ ña̱kuneeꞌ ñaꞌan sɨ́ɨ́ꞌ iniꞌ vá, yukuán kúvi ñɨvɨ kue̱ꞌe̱ꞌ ñuunꞌ, chi kue̱ꞌe̱ꞌ ñɨvɨ kúvi ráa, jee kúvi ráa kue̱ꞌe̱ꞌ nu̱u̱nꞌ ñɨvɨ, jín rá ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa. 16Jee rá ni ujíꞌ rá nikɨ ya̱ niniꞌ nú jín kitɨ xéénꞌ kákini vá, chi taꞌvi iniꞌ ráa kune̱ꞌyá ráa ñaꞌan sɨ́ɨ́ꞌ iniꞌ vá, jee xinóo saɨn ráa maa, ne̱kua̱ꞌ kuñɨɨ́n‑ɨ, jee kajiꞌ ráa yɨkɨkúñu ña jee teñuꞌunꞌ ráa maa. 17Chi maá Ndiosíꞌ nchuꞌun re̱ꞌ iniꞌ ánímaꞌ ráa ya̱ saꞌá ráa sukuán sáni nkuna̱a̱ꞌ iniꞌ re̱ꞌ, sáva ɨɨn nuún ni nnuvi iniꞌ ráa sáá saꞌá ráa jee naku̱ꞌva ráa tiñu níso ráa nu̱u̱nꞌ kitɨ xéénꞌ kákini vá, sáva tatúníꞌ ti̱ꞌ, ne̱kua̱ꞌ sikúnkuvi ntáká jie̱ꞌe̱ꞌ tu̱ꞌun ya̱ nkachiꞌ Ndiosíꞌ. 18Jee ñaꞌan ya̱ niniꞌ nú, suviña kúvi ñuunꞌ ya̱ maá kúñáꞌnú ka̱ꞌ tátúníꞌ‑i nu̱u̱nꞌ ntáká rá ñɨvɨ nísotíñú ya̱ tátúníꞌ nu̱u̱nꞌ rá ñuunꞌ ñáꞌnú ya̱ íyó ñɨ̱vɨ́ yaꞌá ―nkachiꞌ najiáꞌáꞌ ííꞌ.

Currently Selected:

Apoclipsis 17: meh

Highlight

Copy

Compare