Apoclipsis 16

Jie̱ꞌe̱ꞌ ni uxáꞌ rá ko̱ꞌo̱ꞌ ya̱ ñúꞌún rá tu̱nóꞌó

1Saájee nteso̱ꞌo ni̱ꞌ ɨɨn nusuyuꞌú ya̱ káꞌánꞌ ni̱ꞌin‑i ne̱ iniꞌ veꞌi ííꞌ veñu̱ꞌun káꞌnú vá, jee káchíꞌ‑i nu̱u̱nꞌ ni uxáꞌ rá najiáꞌáꞌ ííꞌ vá:

―Kuáꞌán rán kɨ̱sikúténuun rán nu̱u̱nꞌ ñɨ̱vɨ́ rá tu̱nóꞌó ñúꞌún iniꞌ rá ni uxáꞌ ko̱ꞌo̱ꞌ ínaꞌá rán, chi maá Ndiosíꞌ nchu̱ichí tu̱nóꞌó vá chi kítɨ́ꞌ iniꞌ re̱ꞌ jie̱ꞌe̱ꞌ rá ñɨvɨ kua̱chi ―nkachiꞌ‑i.

2Saájee kua̱ꞌa̱nꞌ xíꞌna najiáꞌáꞌ ííꞌ, jee nsi̱kúténuun‑u tu̱nóꞌó ñúꞌún iniꞌ ko̱ꞌo̱ꞌ‑o nu̱u̱nꞌ ñɨ̱vɨ́, saájee ntáká rá ñɨvɨ ya̱ néñu̱ꞌun ráa santúꞌ ñunéꞌyúꞌ kitɨ xéénꞌ kákini vá, jín ya̱ níso ráa seña ti̱ꞌ, jee nki̱vɨ kue̱ꞌi̱ꞌ ni̱ꞌyɨ xki̱yɨ́ máá kini máá uꞌviꞌ yɨkɨkúñu ráa.

3Jee ya̱ uvíꞌ najiáꞌáꞌ ííꞌ nsi̱kúténuun‑u tu̱nóꞌó ñúꞌún iniꞌ ko̱ꞌo̱ꞌ‑o nu̱u̱nꞌ nteñúꞌún, jee nnuvi nute vá ni̱ñɨ̱ꞌ kuéntáꞌ íyó ni̱ñɨ̱ꞌ ni̱yɨ. Jee ni̱ꞌi̱ꞌ kua̱íyó rá tékúꞌ ñúꞌún nu̱u̱nꞌ nute vá.

4Jee ya̱ uníꞌ najiáꞌáꞌ ííꞌ nsi̱kúténuun‑u tu̱nóꞌó ñúꞌún iniꞌ ko̱ꞌo̱ꞌ‑o nu̱u̱nꞌ rá ntekáꞌnú, jín nu̱u̱nꞌ kéne rá nute, jee nnuvi rá nute vá ni̱ñɨ̱ꞌ. 5Jee nteso̱ꞌo ni̱ꞌ ya̱ nkachiꞌ najiáꞌáꞌ ííꞌ ya̱ nísotíñú nu̱u̱nꞌ nute:

Na̱a̱ꞌ kúvi nú, Ndiosíꞌ i̱i̱ꞌ,

jee maánú vá íyó nɨ́ɨ́nkání, jee nóꞌo vá ni̱yo nɨ́ɨ́nkání,

chi na̱a̱ꞌ ñeꞌneꞌ nú kua̱chi si̱kɨ̱ꞌ rá ñɨvɨ.

6Chi ñaꞌniꞌ ráa rá ñɨvɨ nsa̱ꞌá sɨ́ɨ́n nú kɨꞌɨ rává nu̱u̱nꞌ nú,

jín rá ñɨvɨ ya̱ nna̱kani ráa tu̱ꞌun nkene yuꞌú nú, jee ñatɨ ni̱ñɨ̱ꞌ rává.

Saájee nna̱ku̱ꞌva nú ni̱ñɨ̱ꞌ koꞌo ráa,

ya̱ íyó níꞌínꞌ ráa tu̱nóꞌó vá,

nkachiꞌ‑i.

7Yukuán jee nteso̱ꞌo ni̱ꞌ ya̱ káꞌánꞌ inka ka̱ꞌ nusuyuꞌú ne̱ nu̱u̱nꞌ altar, jee káchíꞌ‑i:

Va̱tu̱ꞌ nijia I̱toꞌoꞌ‑ó Ndiosíꞌ ya̱ níso nú fesáꞌ ííꞌ ni̱ꞌin ya̱ kúñáꞌnú nasɨ́kuitɨꞌ nú nu̱u̱nꞌ kua̱íyó,

chi na̱a̱ꞌ jiéꞌnéꞌ nú tiñu si̱kɨ̱ꞌ rá ñɨvɨ jee na̱a̱ꞌ sáꞌá nú,

nkachiꞌ‑i.

8Saájee ya̱ kúmíꞌ najiáꞌáꞌ ííꞌ nsi̱kúténuun‑u tu̱nóꞌó ñúꞌún iniꞌ ko̱ꞌo̱ꞌ‑o nu̱u̱nꞌ nka̱niiꞌ, yukuán jee nsa̱ꞌá Ndiosíꞌ ya̱ xe̱e̱nꞌ sa̱a̱ꞌ ñuꞌunꞌ nka̱niiꞌ, sáva teñuꞌunꞌ‑u rá ñɨvɨ jín ñuꞌunꞌ‑u. 9Jee nka̱yu̱ꞌ víꞌí rá ñɨvɨ ya̱ sááꞌ nasɨ́kuitɨꞌ. Soo nkakuíyuꞌú ráa si̱kɨ̱ꞌ súví Ndiosíꞌ, maáréꞌ ya̱ nísotíñú‑u nu̱u̱nꞌ rá tu̱nóꞌó yaꞌá nóꞌo ráa jee ntu nna̱kani iniꞌ ráa jie̱ꞌe̱ꞌ kua̱chi ráa, jee ni ntu nnákuetúꞌún ráa Ndiosíꞌ ya̱ kúñáꞌnú víꞌí ka̱ꞌ.

10Saájee ya̱ úꞌúnꞌ najiáꞌáꞌ ííꞌ nsi̱kúténuun‑u tu̱nóꞌó ñuꞌun iniꞌ ko̱ꞌo̱ꞌ‑o nu̱u̱nꞌ nééꞌ kitɨ xéénꞌ kákini vá tátúníꞌ ti̱ꞌ. Jee nnu̱neenꞌ nu̱u̱nꞌ tátúníꞌ ti̱ꞌ, jee ne̱ nákayɨꞌɨ́ rá ñɨvɨ ti̱ꞌ yáá ráa ya̱ máá yájíꞌ víꞌí ñunéꞌyúꞌ ráa. 11Soo nkakuíyuꞌú ráa si̱kɨ̱ꞌ Ndiosíꞌ ya̱ nééꞌ antivɨ́ súkún, chi yájíꞌ víꞌí ñunéꞌyúꞌ ráa jie̱ꞌe̱ꞌ rá ni̱ꞌyɨ xki̱yɨ́ ráa, jee ntu nna̱kani iniꞌ ráa jie̱ꞌe̱ꞌ tiñu niva̱ꞌa sáꞌá ráa.

12Saájee ya̱ íñúꞌ najiáꞌáꞌ ííꞌ nsi̱kúténuun‑u tu̱nóꞌó ñúꞌún iniꞌ ko̱ꞌo̱ꞌ‑o nu̱u̱nꞌ ntekáꞌnú káꞌnú naní Éufrates. Jee ni̱chi̱ꞌ nute ntekáꞌnú vá, sáva nine ichi nu̱u̱nꞌ jia̱ꞌa rá te̱e nísotíñú ya̱ tátúníꞌ ráa nu̱u̱nꞌ rá ñuunꞌ káá ichi nu̱u̱nꞌ kénta nka̱niiꞌ jee va̱ji ráa jín rá soldado ráa.

13Saájee niniꞌ ni̱ꞌ ya̱ nkene u̱ni̱ꞌ ya̱ kíni néꞌí ya̱ íyó kuéntáꞌ saꞌvaꞌ, ne̱ yuꞌú koo mánasɨ́ vá ya̱ kúvi dragón, jín ne̱ yuꞌú kitɨ xéénꞌ kákini vá, jín ne̱ yuꞌú ya̱ uvíꞌ kitɨ xéénꞌ kákini vá ya̱ ya káchítu̱ꞌún re̱ꞌ tu̱ꞌun túꞌún ya̱ kéne yuꞌú xíꞌna kitɨ xéénꞌ kákini. 14Jee kúvi ráa ta̱chi̱ꞌ kíni kui̱ꞌna̱ꞌ, ya̱ sáꞌá ráa seña a̱nasɨ́. Jee kua̱ꞌa̱nꞌ ráa nu̱u̱nꞌ rá ñɨvɨ nísotíñú ya̱ tátúníꞌ nu̱u̱nꞌ nta̱ká rá ñuunꞌ kua̱íyó ñɨ̱vɨ́ nu̱u̱nꞌ nééꞌ ñɨvɨ, sáva nastútú ráa rává jín rá soldado rává kantáꞌán rává si̱kɨ̱ꞌ Ndiosíꞌ, máá ki̱vɨ̱ꞌ ñáꞌnú ñani Ndiosíꞌ keꞌneꞌ re̱ꞌ kua̱chi rá ñɨvɨ, ya̱ níso re̱ꞌ fesáꞌ ííꞌ ni̱ꞌin ya̱ kúñáꞌnú nasɨ́kuitɨꞌ re̱ꞌ nu̱u̱nꞌ kua̱íyó.

15Jee nkachiꞌ Jesús:

―Tɨɨn kuéntáꞌ va̱ꞌa rán, sa̱naanꞌ ni nenta ni̱ꞌ kuéntáꞌ kua̱ꞌ kénta sa̱naanꞌ ɨɨn te̱e kuíꞌná. Saáva na̱ ka̱ꞌ netuꞌ ka̱ꞌ kuvi ñɨvɨ ya̱ ñúꞌún nito iniꞌ‑i, kuéntáꞌ kua̱ꞌ ɨɨn ñɨvɨ ya̱ íyó listo saꞌma sáva ntu jíka ñɨɨn léꞌlé‑e jee nkóo‑o tu̱ꞌun kánuun sáá kune̱ꞌyá ñɨvɨ nu̱u̱nꞌ‑u.

16Jee nna̱stútú rá ta̱chi̱ꞌ kíni vá rá ñɨvɨ tátúníꞌ vá jín rá soldado ráa ɨɨn nu̱u̱nꞌ naní Armagedón, tu̱ꞌun káꞌánꞌ rá ñɨvɨ hebreo kúvi‑i.

17Saájee ya̱ uxáꞌ najiáꞌáꞌ ííꞌ nsi̱kúténuun‑u tu̱nóꞌó ñúꞌún iniꞌ ko̱ꞌo̱ꞌ‑o nu̱u̱nꞌ ta̱chi̱ꞌ víjin. Jee nteso̱ꞌo ni̱ꞌ ya̱ káꞌánꞌ ɨɨn nusuyuꞌú laxín ne̱ iniꞌ veꞌi ííꞌ veñu̱ꞌun káꞌnú ne̱ nu̱u̱nꞌ teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ, jee nkachiꞌ‑i:

―Ya̱ nkuna̱a̱ꞌ tiñu.

18Saájee ñanu̱te̱ꞌ tajia, jee nnɨꞌɨn xá njiaku, jee nkana víꞌí tajia, jee nkenta ɨɨn ñutáan máá na̱sɨ nijia ya̱ ni ntiáꞌan koo sukuán, ne̱ nɨ́ɨ́nkání tiempúꞌ ya̱ íyó ñɨvɨ iniꞌ ñɨ̱vɨ́, chi na̱ ka̱ꞌ a̱nasɨ́ nta̱an ñutáan vá. 19Jee ñuunꞌ ñáꞌnú ya̱ kúvi Jerusalén nku̱sɨ́ɨ́n‑ɨ ne̱ u̱ni̱ꞌ pedasúꞌ. Jee rá ñuunꞌ íyó ñɨ̱vɨ́ nta̱nɨ̱ꞌ ráa. Jee nna̱ku̱ꞌun iniꞌ Ndiosíꞌ ñuunꞌ ñáꞌnú Babilonia sáva ku̱ꞌva re̱ꞌ ntántúníꞌ tu̱nóꞌó xéénꞌ kunoꞌo ráa jie̱ꞌe̱ꞌ kítɨ́ꞌ víꞌí iniꞌ re̱ꞌ, ya̱ kúvi kuéntáꞌ ku̱ꞌva re̱ꞌ nixiꞌ xe̱e̱nꞌ koꞌo ráa. 20Jee ntáká rá ñuunꞌ káá sɨ́ɨ́n ma̱ꞌñú nteñúꞌún nno̱ñúꞌún ráa kua̱ꞌa̱nꞌ ráa, jee nnaanꞌ rá yuku ranika̱ꞌ ya̱ nsáꞌ naniꞌinꞌ ñɨvɨ ráa. 21Jee ne̱ súkún nki̱nkuun rá ñɨ́ñɨ́ máá náꞌnú nijia, ya̱ ne̱ u̱vi̱xiko (40) kilo ve̱i ráa, nkininkava ráa xi̱ni̱ꞌ rá ñɨvɨ. Jee nkakuíyuꞌú rá ñɨvɨ si̱kɨ̱ꞌ Ndiosíꞌ jie̱ꞌe̱ꞌ tu̱nóꞌó ya̱ ñe̱te̱ꞌ ñɨ́ñɨ́ máá náꞌnú nijia, chi máá tu̱nóꞌó xéénꞌ kúvi tu̱nóꞌó vá.

Currently Selected:

Apoclipsis 16: meh

Highlight

Copy

Compare