Apoclipsis 12

Tu̱ꞌun ñaꞌan jín dragón

1Saájee ntu̱ví ɨɨn seña a̱nasɨ́ ne̱ antivɨ́ súkún: ɨɨn ñaꞌan yɨ́sukunꞌ ña nka̱niiꞌ kuéntáꞌ ñúꞌún ña saꞌma, jee nééꞌ yo̱o̱ꞌ chi̱ji jie̱ꞌe̱ꞌ ña, jee ñúꞌún xi̱ni̱ꞌ ña ɨɨn corona u̱xu̱ꞌ u̱vi̱ꞌ (12) tiu̱u̱nꞌ. 2Jee nééꞌ kue̱ꞌi̱ꞌ ña. Jee ne̱ kánajíín ña ya̱ téꞌnéꞌ iniꞌ ña, ya̱ nóꞌo víꞌí ña ya̱ kaku se̱ꞌya ña.

3Jee kuíre tukuni ntu̱ví inka ka̱ꞌ seña ne̱ antivɨ́ súkún: ɨɨn ko̱o̱ꞌ kuéꞌé káꞌnú mánasɨ́ naní dragón. Jee u̱xa̱ꞌ xi̱ni̱ꞌ ti̱ꞌ, jee u̱ji̱ꞌ nikɨ ti̱ꞌ. Jee u̱xa̱ꞌ corona jee ɨɨn corona ñúꞌún ta xi̱ni̱ꞌ ti̱ꞌ. 4Jee su̱ꞌma̱ꞌ ti̱ꞌ xtákaa ti̱ꞌ ɨɨn ya̱ uníꞌ tantúꞌ rá tiu̱u̱nꞌ íyó súkún, jee nsi̱kéne ti̱ꞌ ráa nu̱u̱nꞌ ñu̱ꞌún. Jee ña̱kui̱ñɨ̱ꞌ ti̱ꞌ ichinúúnꞌ ñaꞌan vá ya̱ sikáku ña se̱ꞌya ña, nétu ti̱ꞌ sáva kajiꞌ ti̱ꞌ nchíkɨ́n vá sáá kaku‑u. 5Saájee nsi̱káku ña ɨɨn nchíkɨ́n su̱chí yɨ́ɨ́, ya̱ suvire̱ꞌ vá kunisotíñú re̱ꞌ ya̱ tatúníꞌ ni̱ꞌin re̱ꞌ nu̱u̱nꞌ kua̱íyó rá ñɨvɨ ñɨ̱vɨ́ jín bastón ka̱a ne̱ xinóꞌo re̱ꞌ rá ñɨvɨ kénta si̱kɨ̱ꞌ Ndiosíꞌ. Saájee nsiíyo se̱ꞌya yɨ́ɨ́ ña kinaa re̱ꞌ antivɨ́ súkún nu̱u̱nꞌ teyuꞌ nu̱u̱nꞌ nééꞌ Ndiosíꞌ tátúníꞌ‑i kuneeꞌ re̱ꞌ jín‑i. 6Jee ñaꞌan vá ninu ña kua̱ꞌa̱nꞌ ña nu̱u̱nꞌ ñu̱ꞌún saɨn nu̱u̱nꞌ ntu̱náꞌ ñɨvɨ nééꞌ yukuán. Jee yukuán ya̱ íyó tu̱ꞌva ɨɨn nu̱u̱nꞌ nsa̱ꞌá Ndiosíꞌ, sáva ni̱ꞌi̱nꞌ ña ya̱ kajiꞌ ña, chi yukuán kuneeꞌ ña mil u̱vi̱ꞌ sientúꞌ u̱ni̱xiko (1260) ki̱vɨ̱ꞌ.

7Saájee ni̱yo tu̱ꞌun kantáꞌán máá xe̱e̱nꞌ antivɨ́ súkún. Jee najiáꞌáꞌ ííꞌ kúñáꞌnú, ya̱ naní Miguel, jín rá inka najiáꞌáꞌ ííꞌ ya̱ yɨ́ꞌɨ́ xi̱ntíín re̱ꞌ, nka̱ntáꞌán ráa jín ko̱o̱ꞌ mánasɨ́ vá ya̱ naní dragón. Jee ko̱o̱ꞌ mánasɨ́ vá jín rá najiáꞌáꞌ ya̱ yɨ́ꞌɨ́ xi̱ntíín re̱ꞌ nka̱ntáꞌán ráa jín rá najiáꞌáꞌ ííꞌ vá. 8Soo ntu̱ví nkúvi nku̱neí ko̱o̱ꞌ mánasɨ́ vá, jee saáva ni ntu̱ví íyó ka̱ꞌ nu̱u̱nꞌ ni̱ꞌi̱nꞌ ráa kuneeꞌ ráa ne̱ antivɨ́ súkún. 9Sukuán nkuvi jee ntavaꞌ rá najiáꞌáꞌ ííꞌ vá ko̱o̱ꞌ mánasɨ́ yukuán antivɨ́ súkún. Jee ko̱o̱ꞌ mánasɨ́ vá kúvi ko̱o̱ꞌ ya̱ íyó ne̱ yanaꞌán víꞌí. Jee maátíꞌ ví ya̱ naní ti̱ꞌ kui̱ꞌna̱ꞌ kúñáꞌnú jín suni naní ti̱ꞌ Satanás. Jee maáa vá xínáꞌví‑i rá ñɨvɨ kua̱íyó ñɨ̱vɨ́. Jee ntavaꞌ ráa maa ne̱ jín rá najiáꞌáꞌ‑a antivɨ́ súkún, jee nsi̱kéne ráa maa jín ne̱ rá najiáꞌáꞌ‑a nu̱u̱nꞌ ñu̱ꞌún iniꞌ ñɨ̱vɨ́ yaꞌá.

10Saájee nteso̱ꞌo ni̱ꞌ ɨɨn nusuyuꞌú ya̱ ni̱ꞌin káꞌánꞌ‑a ne̱ antivɨ́ súkún, jee káchíꞌ‑i:

Ya̱ nkenta ya̱ saꞌá Ndiosíꞌ‑ó ya̱ sikáku re̱ꞌ ñɨvɨ re̱ꞌ nu̱u̱nꞌ kui̱ꞌna̱ꞌ kúñáꞌnú,

jín ya̱ stúvi nijinꞌ re̱ꞌ ya̱ níso víꞌí re̱ꞌ fesáꞌ ííꞌ re̱ꞌ,

jín ya̱ tátúníꞌ re̱ꞌ nu̱u̱nꞌ nɨꞌɨ,

jín ya̱ nísotíñú Cristo ya̱ ñani re̱ꞌ tátúníꞌ‑i.

Chi nsi̱kéne re̱ꞌ máá maá kui̱ꞌna̱ꞌ ya̱ xíkóñáꞌán‑a rá ñaniꞌ‑ó jín ku̱ꞌva‑ó ya̱ yɨ́ꞌɨ́ ráa nu̱u̱nꞌ Cristo.

Chi nuví niñuꞌ xíkóñáꞌán‑a ráa nu̱u̱nꞌ Ndiosíꞌ‑ó.

11Soo nku̱neí ráa nu̱u̱nꞌ Satanás vá

jie̱ꞌe̱ꞌ ya̱ nñatɨ Cristo ni̱ñɨ̱ꞌ re̱ꞌ sáá ni̱ꞌi̱ꞌ re̱ꞌ nso̱ko̱ꞌ re̱ꞌ maáréꞌ nu̱u̱nꞌ Ndiosíꞌ jie̱ꞌe̱ꞌ ráa, ya̱ kúvi re̱ꞌ Lanchi Lúlí Ndiosíꞌ,

jee suni nku̱neí ráa jie̱ꞌe̱ꞌ tu̱ꞌun ya̱ njia̱ꞌa ráa ya̱ naáꞌ jie̱ꞌe̱ꞌ re̱ꞌ,

jee nku̱neí ráa jie̱ꞌe̱ꞌ ntu ñúnúunꞌ ráa maáráa ya̱ kutekuꞌ ráa jee ñeꞌneꞌ iniꞌ ráa maáráa súka̱ꞌ ne̱ kuviꞌ ráa jie̱ꞌe̱ꞌ tu̱ꞌun re̱ꞌ.

12Saáva ránoꞌó ya̱ nééꞌ ne̱ antivɨ́ súkún, na̱ ka̱ꞌ vá kusɨ̱ɨ̱ꞌ iniꞌ rán. #12:12 Tu̱ꞌun griego káchíꞌ: saáva na̱ ka̱ꞌ vá kusɨ̱ɨ̱ꞌ iniꞌ antivɨ́ súkún jín ránoꞌó ya̱ nééꞌ ne̱ yukuán.

Soo na̱ ka̱ꞌ náꞌví ka̱ꞌ ránoꞌó ya̱ nééꞌ iniꞌ ñɨ̱vɨ́ yaꞌá jín nu̱u̱nꞌ nteñúꞌún,

chi nkuun máá kui̱ꞌna̱ꞌ kíni nkenta‑a nu̱u̱nꞌ nééꞌ rán,

jee kítɨ́ꞌ nasɨ́kuitɨꞌ iniꞌ‑i,

chi jíníꞌ‑i ya̱ ntu kue̱ꞌe̱ꞌ ka̱ꞌ tiempúꞌ íyó kuvi xináꞌví‑i ránoꞌó.

Nkachiꞌ nusuyuꞌú vá.

13Jee sáá niniꞌ ko̱o̱ꞌ mánasɨ́ vá ya̱ nsi̱kéne rá najiáꞌáꞌ ííꞌ maa nu̱u̱nꞌ ñuꞌun iniꞌ ñɨ̱vɨ́, jee nta̱níkɨ́nꞌ ti̱ꞌ ñaꞌan ya̱ nsi̱káku ña se̱ꞌya yɨ́ɨ́ ña. 14Jee njia̱ꞌa Ndiosíꞌ u̱vi̱ꞌ chi̱yo̱ꞌ káꞌnú nu̱u̱nꞌ ña ya̱ íyó kuéntáꞌ chi̱yo̱ꞌ ta̱su̱nꞌ káꞌnú sáva kuvi nava ña kɨ̱ꞌɨ̱nꞌ ña nu̱u̱nꞌ ñu̱ꞌún saɨn, sáva kuíká ña nu̱u̱nꞌ ko̱o̱ꞌ a̱nasɨ́ vá. Jee kua̱ꞌa̱nꞌ ña nu̱u̱nꞌ kuneeꞌ ña u̱ni̱ꞌ kui̱ya̱ꞌ sava, nu̱u̱nꞌ kumí re̱ꞌ ña ya̱ ni̱ꞌi̱nꞌ ña ya̱ kajiꞌ ña. 15Saájee ntavaꞌ ko̱o̱ꞌ vá nute yuꞌú ti̱ꞌ kuéntáꞌ ɨɨn ntekáꞌnú kua̱ꞌa̱nꞌ‑a ya̱ta̱ꞌ nu̱u̱nꞌ kuáꞌánꞌ ñaꞌan vá, sáva teni ña saꞌá‑a. 16Soo nchi̱neí nu̱u̱nꞌ ñu̱ꞌún vá ña, chi nine ñuꞌun vá, jee yukuán nki̱vɨ nute káꞌnú ya̱ ntavaꞌ ko̱o̱ꞌ vá yuꞌuꞌ ti̱ꞌ. 17Saájee nki̱tɨ̱ꞌ iniꞌ ko̱o̱ꞌ mánasɨ́ vá néꞌyá ti̱ꞌ ña. Saájee kua̱ꞌa̱nꞌ ti̱ꞌ kantáꞌán ti̱ꞌ jín rá inka rá se̱ꞌya ichiyúkúnꞌ ña, ya̱ suvi kúvi rá ñɨvɨ ya̱ síkúnkuvi ráa tu̱ꞌun ya̱ tátúníꞌ Ndiosíꞌ, jee níkɨ́nꞌ na̱a̱ꞌ ni̱ꞌin ráa nu̱u̱nꞌ rá tu̱ꞌun Jesús. #12:18 Yaꞌá ví nu̱u̱nꞌ káchíꞌ sava rá tutuꞌ níso tu̱ꞌun ya̱ káchíꞌ‑ó ya̱ kúvi versículo 18, soo nu̱u̱nꞌ inka ka̱ꞌ rá tutuꞌ níso rá tu̱ꞌun vá nu̱u̱nꞌ capítulo 13 káchíꞌ ya̱ kúvi versículo 13:1.

Currently Selected:

Apoclipsis 12: meh

Highlight

Copy

Compare