Génesis 36

Rá ichiyúkúnꞌ kene nu̱u̱nꞌ Esaú

1Rá yaꞌá kúvi tu̱ꞌun jie̱ꞌe̱ꞌ rá ñɨvɨ ichiyúkúnꞌ Esaú, ya̱ suni naní re̱ꞌ Edom: 2Esaú nta̱na̱ꞌá re̱ꞌ jín rá ñaꞌan se̱ꞌya ñuunꞌ Canaán. Ɨɨn naní Ada, ya̱ kuvi se̱ꞌya sɨ́ꞌɨ́ Elón te̱e se̱ꞌya ichiyúkúnꞌ Het, jee suni ɨɨn naní Aholibama, ya̱ kuvi se̱ꞌya sɨ́ꞌɨ́ Aná jín kúvi ña tiání Zebeón te̱e heveo. 3Jee suni nta̱na̱ꞌá re̱ꞌ jín ñaꞌan naní Basemat, ya̱ kuvi se̱ꞌya sɨ́ꞌɨ́ Ismael jín ya̱ kuvi ña ku̱ꞌva Nebaiot. 4Jee se̱ꞌya yɨ́ɨ́ Ada ya̱ ni̱yo jín Esaú nkuvi Elifaz, jee se̱ꞌya yɨ́ɨ́ Basemat ya̱ ni̱yo jín Esaú nkuvi Reuel. 5Jee se̱ꞌya yɨ́ɨ́ Aholibama ya̱ ni̱yo jín Esaú nkuvi Jeús, Jaalam jín Coré. Rá yaꞌá nkuvi rá se̱ꞌya yɨ́ɨ́ Esaú, ya̱ nkaku sáá nneeꞌ re̱ꞌ nu̱u̱nꞌ ñuꞌun ñuunꞌ Canaán.

6Jee Esaú nna̱keꞌen re̱ꞌ rá ñasɨ́ꞌɨ́ re̱ꞌ, jín rá se̱ꞌya yɨ́ɨ́ re̱ꞌ, jín rá se̱ꞌya sɨ́ꞌɨ́ re̱ꞌ, jín ntáká rá ñɨvɨ nééꞌ jín re̱ꞌ, jín rá xi̱ni̱kɨ̱ꞌ re̱ꞌ, jín ntáká rá kitɨ re̱ꞌ, jín kua̱íyó ya̱ ni̱ꞌi̱nꞌ re̱ꞌ nu̱u̱nꞌ ñuunꞌ Canaán, jee kua̱ꞌa̱nꞌ re̱ꞌ inka ka̱ꞌ nu̱u̱nꞌ ñuꞌun, sáva kuneeꞌ sɨ́ɨ́n re̱ꞌ nu̱u̱nꞌ ñaniꞌ re̱ꞌ Jacob. 7Chi kue̱ꞌe̱ꞌ víꞌí rá nantíñú kúmí ni núvíꞌ ráa ya̱ ntu̱ví kúvi kuneeꞌ nkáá ráa, chi ni nu̱u̱nꞌ ñuꞌun nu̱u̱nꞌ nééꞌ ráa kúvi ráa to̱ꞌo̱ꞌ ntu̱ví kúneí xtekúꞌ‑u ráa jie̱ꞌe̱ꞌ ya̱ íyó kue̱ꞌe̱ꞌ rá sa̱na̱ꞌ ráa. 8Jee saáva Esaú, ya̱ suni maáréꞌ ví Edom, kua̱ꞌa̱nꞌ re̱ꞌ rá yuku íyó ñuunꞌ Seir.

9Rá tu̱ꞌun yaꞌá kuvi jie̱ꞌe̱ꞌ rá ichiyúkúnꞌ Esaú, tájííꞌ yanaꞌán rá ñɨvɨ ñuunꞌ Edom, ya̱ káá ne̱ rá yuku sánitɨ́ɨn Seir. 10Rá yaꞌá kuvi rá súví rá se̱ꞌya yɨ́ɨ́ Esaú: Elifaz, ya̱ kuvi se̱ꞌya yɨ́ɨ́ Ada ya̱ kúvi ñasɨ́ꞌɨ́ Esaú, jín Reuel, ya̱ kuvi se̱ꞌya yɨ́ɨ́ Basemat ya̱ kúvi ñasɨ́ꞌɨ́ Esaú.

11Jee rá se̱ꞌya yɨ́ɨ́ Elifaz nkuvi Temán, Omar, Zefo, Gatam jín Cenaz. 12Jee Elifaz, se̱ꞌya Esaú, nna̱kasaɨn re̱ꞌ ñaꞌan ya̱ naní Timna, jee ni̱yo ɨɨn se̱ꞌya yɨ́ɨ́ ña jín re̱ꞌ ya̱ naní Amalec. Rá yaꞌá nkuvi rá ichiyúkúnꞌ Ada, ɨɨn rá ñaꞌan ya̱ nkuvi ñasɨ́ꞌɨ́ Esaú.

13Jee yaꞌá nkuvi rá se̱ꞌya yɨ́ɨ́ Reuel: Nahat, Zera, Sama jín Miza. Rá yaꞌá nkuvi rá ichiyúkúnꞌ Basemat, inka ka̱ꞌ rá ñaꞌan ya̱ nkuvi ñasɨ́ꞌɨ́ Esaú.

14Jee yaꞌá nkuvi rá se̱ꞌya yɨ́ɨ́ Aholibama ya̱ nkuvi inka ñasɨ́ꞌɨ́ Esaú, jee nkuvi ña se̱ꞌya sɨ́ꞌɨ́ Aná jee nkuvi ña tiání Zibeón. Jee ni̱yo se̱ꞌya yɨ́ɨ́ Aholibama jín Esaú, Jeús, Jaalam, jín Coré.

15Rá nku̱ñáꞌnú nyosoꞌ nu̱u̱nꞌ rá ichiyúkúnꞌ Esaú nkuvi rá yaꞌá: se̱ꞌya yɨ́ɨ́ xíꞌnañúꞌún Esaú ví Elifaz, jee rá ichiyúkúnꞌ ya̱ nkene nu̱u̱nꞌ Elifaz ya̱ nku̱ñáꞌnú ráa ví Temán, Omar, Zefo, Cenaz, 16Coré, Gatam jín Amalec. Rá yaꞌá nkuvi rá te̱e nku̱ñáꞌnú nyosoꞌ nu̱u̱nꞌ rá ñɨvɨ ya̱ nkuvi rá tataꞌ ichiyúkúnꞌ Elifaz nu̱u̱nꞌ ñuꞌun ñuunꞌ Edom, jee nkuvi ráa ichiyúkúnꞌ nkene nu̱u̱nꞌ Ada, ñaꞌan ya̱ nkuvi ñasɨ́ꞌɨ́ Esaú.

17Jee rá yaꞌá nkuvi rá se̱ꞌya yɨ́ɨ́ Reuel, ya̱ nkuvi se̱ꞌya Esaú, jee rá te̱e nku̱ñáꞌnú nyosoꞌ nu̱u̱nꞌ nkuvi Nahat, Zera, Sama jín Miza. Rá te̱e yaꞌá nkuvi rá te̱e nku̱ñáꞌnú nyosoꞌ nu̱u̱nꞌ rá ñɨvɨ ya̱ nkuvi rá tataꞌ ichiyúkúnꞌ Reuel nu̱u̱nꞌ ñuꞌun ñuunꞌ Edom, jee nkuvi ráa ichiyúkúnꞌ nkiji nu̱u̱nꞌ Basemat, ñaꞌan ya̱ nkuvi ñasɨ́ꞌɨ́ Esaú.

18Jee rá te̱e yaꞌá nkuvi rá se̱ꞌya yɨ́ɨ́ Aholibama, ñaꞌan ya̱ nkuvi ñasɨ́ꞌɨ́ Esaú. Jee rá te̱e nku̱ñáꞌnú nyosoꞌ nu̱u̱nꞌ nkuvi Jeús, Jaalam jín Coré. Rá te̱e yaꞌá nkuvi rá te̱e nku̱ñáꞌnú nyosoꞌ nu̱u̱nꞌ rá ñɨvɨ ya̱ nkuvi rá tataꞌ ichiyúkúnꞌ nkiji nu̱u̱nꞌ Aholibama, ñaꞌan nkuvi ñasɨ́ꞌɨ́ Esaú, jee maáña nkuvi se̱ꞌya sɨ́ꞌɨ́ Aná.

19Rá te̱e yaꞌá nkuvi rá ichiyúkúnꞌ nkiji nu̱u̱nꞌ Esaú, ya maáréꞌ ví Edom, jín nkuvi ráa rá te̱e nku̱ñáꞌnú nyosoꞌ nu̱u̱nꞌ rá tataꞌ ichiyúkúnꞌ nkiji nu̱u̱nꞌ re̱ꞌ.

20Jee rá te̱e yaꞌá nkuvi rá se̱ꞌya yɨ́ɨ́ te̱e naní Seir te̱e horeo, ya̱ nneeꞌ nu̱u̱nꞌ ñuꞌun ñuunꞌ Edom yukuán, nkuvi ráa Lotán, Sobal, Zibeón, Aná, 21Disón, Ezer, jín Disán. Rá te̱e yaꞌá nkuvi rá te̱e nku̱ñáꞌnú nyosoꞌ nu̱u̱nꞌ rá ñɨvɨ horeo, ya̱ nkuvi rá ichiyúkúnꞌ nkiji nu̱u̱nꞌ Seir, nu̱u̱nꞌ ñuꞌun ñuunꞌ Edom.

22Jee rá se̱ꞌya yɨ́ɨ́ Lotán nkuvi Hori jín Heman. Jee Timna nkuvi ku̱ꞌva Lotán.

23Jee rá se̱ꞌya yɨ́ɨ́ Sobal nkuvi Alván, Manahat, Ebal, Sefo jín Onam.

24Jee rá se̱ꞌya yɨ́ɨ́ Zibeón nkuvi Aja jín Aná. Jee Aná ví ya̱ nna̱niꞌinꞌ nu̱u̱nꞌ kene nute nu̱u̱nꞌ ñuꞌun sáɨn, ni sáá kúmí re̱ꞌ rá burrúꞌ tátáꞌ re̱ꞌ Zebeón.

25Jee rá se̱ꞌya Aná ya̱ ni̱yo ví se̱ꞌya yɨ́ɨ́ re̱ꞌ Disón, jín ɨɨn se̱ꞌya sɨ́ꞌɨ́ re̱ꞌ ya̱ naní Aholibama.

26Jee rá se̱ꞌya yɨ́ɨ́ Disón nkuvi Hemdán, Esbán, Itrán jín Querán.

27Jee rá se̱ꞌya Ezer nkuvi Bilhán, Zaaván jín Acán.

28Jee rá se̱ꞌya yɨ́ɨ́ Disán nkuvi Uz jín Arán.

29Jee rá te̱e ya̱ nku̱ñáꞌnú nyosoꞌ nu̱u̱nꞌ rá ñɨvɨ horeo nkuvi Lotán, Sobal, Zibeón, Aná, 30Disón, Ezer jín Disán. Rá te̱e yaꞌá nkuvi rá te̱e nku̱ñáꞌnú nyosoꞌ nu̱u̱nꞌ rá ñɨvɨ horeo, nu̱u̱nꞌ táꞌán veꞌi ta tataꞌ ichiyúkúnꞌ, ya̱ ni̱yo nu̱u̱nꞌ ñuunꞌ Seir.

31Jee rá te̱e nkuvi rá rey ya̱ nta̱túníꞌ nu̱u̱nꞌ ñuꞌun ñuunꞌ Edom nékúvi ne̱ sáá ntiáꞌan koo rey ya̱ tátúníꞌ nu̱u̱nꞌ rá ñɨvɨ Israel, jee nkuvi rá te̱e yaꞌá: 32Bela, ya̱ nkuvi se̱ꞌya yɨ́ɨ́ Beor, jee nta̱túníꞌ re̱ꞌ nu̱u̱nꞌ ñuunꞌ Edom, jee ñuunꞌ re̱ꞌ nkuvi ñuunꞌ naní Dinaba. 33Jee sáá ni̱ꞌi̱ꞌ Bela, jee nu̱u̱nꞌ re̱ꞌ nna̱tatúníꞌ Jobab, ya̱ nkuvi se̱ꞌya yɨ́ɨ́ Zera, ya̱ kuvi te̱e ñuunꞌ naní Bosra. 34Jee sáá ni̱ꞌi̱ꞌ Jobab, jee nu̱u̱nꞌ re̱ꞌ nna̱tatúníꞌ Husam, ya̱ nkuvi te̱e ñuunꞌ sánitɨ́ɨn ñuunꞌ Temán. 35Jee sáá ni̱ꞌi̱ꞌ Husam, jee nu̱u̱nꞌ re̱ꞌ nna̱tatúníꞌ Hadad, ya̱ nkuvi se̱ꞌya yɨ́ɨ́ Bedad, jee maáréꞌ jín rá ñɨvɨ re̱ꞌ nka̱ntáꞌán ráa si̱kɨ̱ꞌ rá ñɨvɨ Madián, nu̱u̱nꞌ nkuvi sánitɨ́ɨn ñuunꞌ Moab, jee nku̱neí Hadad, jee ñuunꞌ re̱ꞌ nkuvi ñuunꞌ naní Avit. 36Jee sáá ni̱ꞌi̱ꞌ Hadad, jee nu̱u̱nꞌ re̱ꞌ nna̱tatúníꞌ Samla, ya̱ kúvi te̱e ñuunꞌ Masreca. 37Jee sáá ni̱ꞌi̱ꞌ Samla jee nu̱u̱nꞌ re̱ꞌ nna̱tatúníꞌ Saúl, ya̱ kuvi te̱e ñuunꞌ Rehobot, ñuunꞌ ya̱ káá yúntekáꞌnú. 38Jee sáá ni̱ꞌi̱ꞌ Saúl, jee nu̱u̱nꞌ re̱ꞌ nna̱tatúníꞌ Baal‑hanán, ya̱ kuvi se̱ꞌya yɨ́ɨ́ Acbor. 39Jee sáá ni̱ꞌi̱ꞌ Baal‑hanán, se̱ꞌya yɨ́ɨ́ Acbor, jee nu̱u̱nꞌ re̱ꞌ nna̱tatúníꞌ Hadad, jee ñuunꞌ re̱ꞌ naní Pau. Jee ñasɨ́ꞌɨ́ Hadad naní Mehetabel, ya̱ nkuvi ña se̱ꞌya sɨ́ꞌɨ́ Matred jín suni tiání Mezaab ví ña.

40Rá te̱e yaꞌá nkuvi rá te̱e nku̱ñáꞌnú nyosoꞌ nu̱u̱nꞌ ta rá tataꞌ táꞌán veꞌi Esaú, sánikua̱ꞌ ni̱yo ta sɨ́ꞌɨ́ veꞌi ráa, jín ta ñuunꞌ nu̱u̱nꞌ nneeꞌ ráa, jín rá súví ráa: Timna, Alva, Jetet, 41Aholibama, Ela, Pinón, 42Cenaz, Temán, Mibzar, 43Magdiel jín Iram.

Jee rá te̱e yaꞌá nkuvi rá te̱e nku̱ñáꞌnú nyosoꞌ nu̱u̱nꞌ ñuunꞌ Edom, sánikua̱ꞌ nu̱u̱nꞌ ñuꞌun nu̱u̱nꞌ nneeꞌ ráa jín ya̱ nku̱mí ráa. Jee Esaú suni naní re̱ꞌ Edom jee nkuvi re̱ꞌ tátáꞌ jííꞌ rá ñɨvɨ Edom.

Currently Selected:

Génesis 36: meh

Highlight

Copy