Génesis 35

Sáꞌá Ndiosíꞌ ya̱ váꞌa jín Jacob nu̱u̱nꞌ naní Betel

1Nkachiꞌ Ndiosíꞌ nu̱u̱nꞌ Jacob:

“Nako̱o jee kuáꞌán kuneeꞌ nú nu̱u̱nꞌ ñuꞌun naní Betel jee nu̱u̱nꞌ ñuꞌun yukuán samaꞌ nú yu̱u̱ꞌ nu̱u̱nꞌ so̱ko̱ꞌ nú sa̱na̱ꞌ nu̱u̱nꞌ nuꞌuꞌ ya̱ kúvi Ndiosíꞌ sáva kuneñu̱ꞌun nú nuꞌuꞌ ya̱ nkitu̱vi ni̱ꞌ nu̱u̱nꞌ noꞌó sáá nkenekunu yuꞌuꞌ nú nu̱u̱nꞌ ñaniꞌ nú Esaú”, nkachiꞌ maá Ndiosíꞌ.

2Saájee nkachiꞌ Jacob nu̱u̱nꞌ rá táꞌán veꞌi re̱ꞌ jín nu̱u̱nꞌ ntáká rá ñɨvɨ ya̱ kútáꞌán jín re̱ꞌ:

―Siíyo rán nɨꞌɨ rá inka ndiosíꞌ ya̱ ntu kúvi ráa máá Ndiosíꞌ tékúꞌ, ya̱ íyó ráa nteñu‑órán ya̱ kúvi ráa rá ndiosíꞌ ya̱ néñu̱ꞌun rá inka ñɨvɨ, jee nasaꞌá noo rán ñunéꞌyúꞌ rán jee sama rán saꞌma ñuꞌun rán. 3Jee nakuiñɨꞌ‑órán jee kɨ̱nkaa‑órán nu̱u̱nꞌ ñuꞌun Betel, chi yukuán samaꞌ ni̱ꞌ yu̱u̱ꞌ sáva saꞌá ni̱ꞌ ɨɨn nu̱u̱nꞌ sáva so̱ko̱ꞌ‑ó nu̱u̱nꞌ Ndiosíꞌ ya̱ nna̱xiníkó re̱ꞌ nu̱u̱nꞌ nuꞌuꞌ jee chíneí re̱ꞌ nuꞌuꞌ sáá i̱yó ni̱ꞌ jín tu̱ꞌun núkuíꞌyáꞌ iniꞌ, jee kútáꞌán re̱ꞌ jín ni̱ꞌ né ni nkúvi nu̱u̱nꞌ kua̱ꞌa̱nꞌ ni̱ꞌ ―nkachiꞌ Jacob.

4Jee nna̱ku̱ꞌva ráa nu̱u̱nꞌ Jacob ntáká rá ndiosíꞌ ya̱ ntu kúvi maá Ndiosíꞌ tékúꞌ ya̱ kumí ráa jín rá si̱kɨ̱ꞌ so̱ꞌo ya̱ níntakaa rá so̱ꞌo ráa, jee Jacob nse̱ꞌí maa chi̱ji ñuꞌun jie̱ꞌe̱ꞌ ɨɨn tu̱ya̱á ya̱ íñɨ́ yatin nu̱u̱nꞌ Siquem. 5Jee sáá nkene ráa Siquem, jee nsa̱ꞌá Ndiosíꞌ nyu̱ꞌví nasɨ́kuitɨꞌ ntáká rá ñɨvɨ nééꞌ rá ñuunꞌ káá yatin ñuunꞌ vá, jee saáva ntu̱ví nníkɨ́nꞌ ráa rá se̱ꞌya yɨ́ɨ́ Jacob sáva kaꞌniꞌ ráa rává.

6Jee Jacob jín ntáká rá ñɨvɨ ya̱ kua̱ꞌa̱nꞌ jín re̱ꞌ nkenta ráa ñuunꞌ naní Luz, ya̱ suni naní Betel, ya̱ káá nu̱u̱nꞌ ñuꞌun ñuunꞌ Canaán. 7Jee yukuán nsamaꞌ re̱ꞌ yu̱u̱ꞌ nu̱u̱nꞌ so̱ko̱ꞌ re̱ꞌ sa̱na̱ꞌ nu̱u̱nꞌ Ndiosíꞌ, jee nsi̱kúnání re̱ꞌ súví nu̱u̱nꞌ ñuꞌun yukuán El Betel,#35:7 El Betel kuíni kachiꞌ: Ndiosíꞌ ñuunꞌ Betel. chi yukuán nkitu̱vi Ndiosíꞌ nu̱u̱nꞌ re̱ꞌ, sáá ninu yuꞌuꞌ re̱ꞌ nu̱u̱nꞌ ñaniꞌ re̱ꞌ Esaú.

8Jee suni yukuán ni̱ꞌi̱ꞌ Débora, ñaꞌan ya̱ nku̱mí ña Rebeca, jee nse̱ꞌí ráa ña jie̱ꞌe̱ꞌ ɨɨn tu̱ya̱á, yatin Betel. Jee nsi̱kúnání Jacob nu̱u̱nꞌ ñuꞌun yaꞌá “tu̱ya̱á ya̱ tóo ntenúúnꞌ”. #35:8 Tu̱ꞌun hebreo ví Alón‑bacut. Alón‑bacut kuíni kachiꞌ: tu̱ya̱á ya̱ tóo ntenúúnꞌ.

9Sáá nkene Jacob ñuunꞌ Padán‑aram jee nni̱kó re̱ꞌ, jee Ndiosíꞌ nstúvi tuku maáa nu̱u̱nꞌ Jacob jee nsa̱ꞌá Ndiosíꞌ ya̱ netuꞌ kuvi re̱ꞌ, jee nkachiꞌ‑i nu̱u̱nꞌ re̱ꞌ:

10“Maánú naní Jacob,

soo nku̱nání ka̱ꞌ súví nú Jacob,#35:10 Jacob kuíni káchíꞌ: nama. Soo tésóꞌo kuéntáꞌ tu̱ꞌun ya̱ kuíni káchíꞌ: tɨɨn xu̱jieꞌéꞌ. Jee jiátíñú tu̱ꞌun vá sáva kachiꞌ ɨɨn ñɨvɨ ya̱ nákunasɨꞌ inka ñɨvɨ áxí ɨɨn ñɨvɨ ya̱ xínáꞌví.

chisaꞌ Israel #35:10 Israel kuíni káchíꞌ: súkúta̱ꞌán jín Ndiosíꞌ, áxí, súkúta̱ꞌán Ndiosíꞌ. kuvi súví nú”

nkachiꞌ Ndiosíꞌ, jee nsi̱kúnání‑i re̱ꞌ Israel.

11Jee suni nkachiꞌ Ndiosíꞌ nu̱u̱nꞌ re̱ꞌ:

―Nuꞌuꞌ ví Ndiosíꞌ ya̱ níso ni̱ꞌ nɨꞌɨ ntántúníꞌ fuersáꞌ ííꞌ. Nataꞌviꞌ víꞌí ka̱ꞌ jee kukueꞌeꞌ ka̱ꞌ ichiyúkúnꞌ nú, jee kene nu̱u̱nꞌ noꞌó ɨɨn nación jín kue̱ꞌe̱ꞌ víꞌí rá ñuunꞌ. Jee ne̱ nu̱u̱nꞌ yɨkɨkúñu nú kene rá ichiyúkúnꞌ nú ya̱ kuvi rá te̱e tatúníꞌ. 12Jee ñuꞌun ya̱ njia̱ꞌa ni̱ꞌ nu̱u̱nꞌ Abraham jín nu̱u̱nꞌ Isaac, jee suni táji ni̱ꞌ maa nu̱u̱nꞌ nú, jee suni ku̱ꞌva ni̱ꞌ maa nu̱u̱nꞌ rá ichiyúkúnꞌ nú ―nkachiꞌ Ndiosíꞌ nu̱u̱nꞌ Jacob.

13Jee sáá kua̱ꞌa̱nꞌ Ndiosíꞌ yukuán nu̱u̱nꞌ nkaꞌanꞌ‑a jín re̱ꞌ, 14jee nkeꞌen Jacob ɨɨn yu̱u̱ꞌ jee ñani nichiꞌ re̱ꞌ maa, kuéntáꞌ ɨɨn seña, nu̱u̱nꞌ ni̱ñɨ re̱ꞌ sáá nkaꞌanꞌ Ndiosíꞌ jín re̱ꞌ, jee nyosoꞌ re̱ꞌ nixiꞌ nu̱xi uva jín aceite nu̱u̱nꞌ yu̱u̱ꞌ vá sáva nso̱ko̱ꞌ re̱ꞌ nixiꞌ vá nu̱u̱nꞌ Ndiosíꞌ. 15Jee nsi̱kúnání re̱ꞌ súví nu̱u̱nꞌ ñuꞌun yukuán Betel nu̱u̱nꞌ nkaꞌanꞌ re̱ꞌ jín Ndiosíꞌ.

Sáá ni̱ꞌi̱ꞌ Raquel

16Jee kuíre nkene ráa Betel, soo yakuꞌ ni ka̱ꞌ kúníꞌ jee kenta ráa nu̱u̱nꞌ káá ñuunꞌ Efráta nékúvi, sáá nkaku se̱ꞌya yɨ́kɨ́n Raquel, jee nnoꞌo víꞌí ña tu̱nóꞌó sáá nkenta ta̱ꞌvi̱ꞌ se̱ꞌya ña. 17Jee sáá maa hora víjí víꞌí ka̱ꞌ íyó ta̱ꞌvi̱ꞌ se̱ꞌya ña jee nkachiꞌ ñaꞌan ya̱ síkáku se̱ꞌya ña nu̱u̱nꞌ ña:

―Koto yúꞌví nú, chi ya̱ nkaku inka ka̱ꞌ se̱ꞌya yɨ́ɨ́ nú ―nkachiꞌ ñaꞌan ya̱ staꞌviꞌ se̱ꞌya vá nu̱u̱nꞌ ña.

18Soo sáá kéne ta̱chi̱ꞌ káꞌánꞌ ña, jee nsi̱kúnání ña súví te̱e lúlí vá Benoni, #35:18 Benoni kuíni káchíꞌ se̱ꞌya yɨ́ɨ́ tu̱nkuéká iniꞌ, áxí, se̱ꞌya yɨ́ɨ́ tu̱nkuíꞌyáꞌ iniꞌ. jee ni̱ꞌi̱ꞌ ña. Soo tátáꞌ‑a nsi̱kúnání maa Benjamín. #35:18 Benjamín kuíni káchíꞌ: se̱ꞌya yɨ́ɨ́ naꞌá kuáꞌá, áxí, se̱ꞌya yɨ́ɨ́ ya̱ ñúnúunꞌ ka̱ꞌ. 19Jee suꞌva ni̱ꞌi̱ꞌ Raquel, jee nse̱ꞌí ráa ña ichi nu̱u̱nꞌ kua̱ꞌa̱nꞌ ráa ya̱ kua̱ꞌa̱nꞌ ñuunꞌ Efráta, ya̱ kúvi Belén ntañúꞌún.

20Jee ñani nichiꞌ Jacob yu̱u̱ꞌ kuéntáꞌ sɨꞌɨnꞌ nu̱u̱nꞌ ñuꞌun nu̱u̱nꞌ nse̱ꞌí re̱ꞌ ña jee sɨꞌɨnꞌ yu̱u̱ꞌ yaꞌá kúvi ɨɨn seña nu̱u̱nꞌ nse̱ꞌí ráa Raquel ne̱ vitan. 21Jee nke̱chí Israel, #35:21 Níso tutuꞌ yaꞌá súví Israel. Sava íchí káchíꞌ Moisés súví Jacob, jee sava íchí káchíꞌ re̱ꞌ Israel. Ɨɨn ni te̱e ví‑i. Sáá káchíꞌ re̱ꞌ súví Jacob, suni Israel ví‑i. Jee sunisaá sáá káchíꞌ re̱ꞌ súví Israel, suni Jacob ví‑i. ya̱ súví‑i ví Jacob, jee kua̱ꞌa̱nꞌ re̱ꞌ, jee ña̱kuneeꞌ re̱ꞌ ne̱ ichinúúnꞌ ka̱ꞌ torre ya̱ naní Migdal‑Edar, #35:21 Naní Migdal‑Edar ya̱ kuíni káchíꞌ: veꞌi súkún nu̱u̱nꞌ kúmí ráa rá kue̱ꞌe̱ꞌ sa̱na̱ꞌ. jee yukuán ñani re̱ꞌ rá veꞌi sayo saꞌma kuneeꞌ re̱ꞌ. 22Jee sáá nééꞌ Israel (Jacob) nu̱u̱nꞌ ñuꞌun yukuán, jee ña̱ꞌa̱nꞌ Rubén nnu̱ne̱ꞌén re̱ꞌ jín Bilha, ñaꞌan ya̱ nákasaɨn tátáꞌ re̱ꞌ. Jee sáá nku̱káꞌnú iniꞌ tátáꞌ re̱ꞌ ya̱ nsa̱ꞌá re̱ꞌ jee nki̱tɨ̱ꞌ nasɨ́kuitɨꞌ iniꞌ tátáꞌ re̱ꞌ.

Rá se̱ꞌya Jacob

U̱xu̱vi̱ꞌ (12) rá se̱ꞌya Israel (Jacob) íyó. 23Rá se̱ꞌya Jacob ya̱ ni̱yo jín ñasɨ́ꞌɨ́ re̱ꞌ Lea nkuvi Rubén, ya̱ kúvi se̱ꞌya yɨ́ɨ́ ñaꞌnu re̱ꞌ, jee ni̱yo rá inka ka̱ꞌ ya̱ naní Simeón, Leví, Judá, Isacar jín Zabulón. 24Jee rá se̱ꞌya Jacob ya̱ ni̱yo jín ñasɨ́ꞌɨ́ re̱ꞌ Raquel nkuvi José jín Benjamín. 25Jee rá se̱ꞌya Jacob ya̱ ni̱yo jín Bilha, ñaꞌan ya̱ kuvi musúꞌ jiátíñú saɨn Raquel, nkuvi Dan jín Neftalí. 26Jee rá se̱ꞌya Jacob ya̱ ni̱yo jín Zilpá, ñaꞌan ya̱ kuvi musúꞌ jiátíñú saɨn Lea, nkuvi Gad jín Aser. Rá yaꞌá nkuvi rá se̱ꞌya Jacob, ya̱ nkaku ráa nu̱u̱nꞌ ñuunꞌ Padán‑aram.

Sáá ni̱ꞌi̱ꞌ Isaac

27Jee ña̱ne̱ꞌyá Jacob tátáꞌ re̱ꞌ Isaac nu̱u̱nꞌ ñuunꞌ naní Mamré, ñuunꞌ ya̱ suni naní Quiriat Arba, ya̱ kuvi Hebrón, nu̱u̱nꞌ nneeꞌ Abraham jín suni Isaac. 28Jee Isaac íñɨ́ re̱ꞌ sientúꞌ ku̱mi̱xiko (180) kui̱ya̱ꞌ sáá ni̱ꞌi̱ꞌ re̱ꞌ. 29Jee nna̱keꞌen Ndiosíꞌ ánímaꞌ re̱ꞌ nnu̱tútú‑u ichi kútú jín ánímaꞌ rá jííꞌ re̱ꞌ yanaꞌán, sáá ya̱ nku̱ñáꞌnú nasɨ́kuitɨꞌ re̱ꞌ, jee rá se̱ꞌya yɨ́ɨ́ re̱ꞌ Esaú jín Jacob nse̱ꞌí ráa re̱ꞌ.

Currently Selected:

Génesis 35: meh

Highlight

Copy