2 Timoteo 3
3
Jie̱ꞌe̱ꞌ na̱ja koo rá ñɨvɨ ki̱vɨ̱ꞌ kua̱nɨꞌɨ
1Suni tɨɨn kuéntáꞌ nú, ya̱ rá ki̱vɨ̱ꞌ kua̱nɨꞌɨ kiji tiempúꞌ i̱yo koo. 2Chi koo ya̱ kunu̱u̱nꞌ rá ñɨvɨ maáráa ni,
jín ya̱ kunu̱u̱nꞌ ráa xu̱ꞌún,
jín ya̱ kaꞌanꞌ téyɨ́ɨ́ ráa,
jín ya̱ kani vi̱xi̱ꞌ iniꞌ ráa,
jín ya̱ tenu̱u̱nꞌ ráa si̱kɨ̱ꞌ ñɨvɨ jín si̱kɨ̱ꞌ Ndiosíꞌ,
jín ya̱ kujiááꞌ iniꞌ ráa nu̱u̱nꞌ tátáꞌ ráa jín nu̱u̱nꞌ nánáꞌ ráa,
jín ya̱ ni nsáꞌ koo ya̱ kútaꞌviꞌ nu̱u̱nꞌ ráa,
jín ya̱ ni nkóo ya̱ ñáꞌnú nu̱u̱nꞌ ráa nu̱u̱nꞌ Ndiosíꞌ,
3jín ya̱ ni nsáꞌ koo ñunkúún iniꞌ ráa jín táꞌán ráa,
jín ya̱ ni nsáꞌ nakava̱ꞌa ráa,
jín ya̱ kakuíyuꞌú ráa,
jín ya̱ nsáꞌ nakeꞌen ráa maáráa,
jín ya̱ xe̱e̱nꞌ niva̱ꞌa koo ráa,
jín ya̱ taꞌvi iniꞌ ráa kune̱ꞌyá ráa ya̱ váꞌa,
4jín ya̱ xi̱kóñáꞌán yuꞌuꞌ ráa ñanitáꞌán ráa nu̱u̱nꞌ rá te̱e jíto u̱ꞌvi̱ꞌ rává,
jín ya̱ ni nsáꞌ nikó iniꞌ ráa saꞌá ráa kua̱chi,
jín ya̱ kuꞌun téyɨ́ɨ́ víꞌí iniꞌ ráa,
jín ya̱ kunu̱u̱nꞌ ráa ya̱ sɨ́ɨꞌ iniꞌ maáráa nsú káꞌ kunu̱u̱nꞌ ráa Ndiosíꞌ,
5jín ya̱ kachiꞌ ráa nika̱ꞌ ya̱ yɨ́tíñú ráa nu̱u̱nꞌ Ndiosíꞌ,
soo jie̱ꞌe̱ꞌ tiñu sáꞌá ráa stúvi ráa ya̱ kúíchi iniꞌ ráa maa,
chi kasɨꞌ ráa ya̱ sama fuersáꞌ ííꞌ níso re̱ꞌ iniꞌ ánímaꞌ ráa.
Chusává nú nu̱u̱nꞌ ñɨvɨ ya̱ íyó suꞌva.
6Chi sava rá ñɨvɨ vá kíní ráa maáráa iniꞌ rá veꞌi, jee kúneí ráa jín rá ñaꞌan níjin, chi ya níso víꞌí ráña kua̱chi, chi túꞌva ráña kéꞌín ya̱ níyo víꞌí iniꞌ ráña. 7Sukuáni núkú ráña kútúꞌva ráña inka tu̱ꞌun jiáá, soo ni nsáꞌ kuvi kenta kukáꞌnú iniꞌ ráña ya̱ nááꞌ. 8Kuéntáꞌ rá te̱e tásɨ́ naní Janes jín Jambres nnuni̱ꞌin ráa nu̱u̱nꞌ Moisés tiempúꞌ yanaꞌán, suni sukuán rá ñɨvɨ xínáꞌví núníꞌin ráa nu̱u̱nꞌ ya̱ nááꞌ. Chi maá ñɨvɨ ni̱ta antúníꞌ ví ráa, jee nni̱kóyátá iniꞌ ráa nu̱u̱nꞌ tu̱ꞌun Cristo ya̱ kúneí iniꞌ‑ó. #3:8 Áxí: jee ntu níꞌinꞌ tiñu ráa nu̱u̱nꞌ ichi Cristo ya̱ kúneí iniꞌ‑ó. 9Soo nkuéꞌnu víꞌí tiñu sáꞌá ráa, chi nijinꞌ kájí kutu̱vi nu̱u̱nꞌ nɨꞌɨ ñɨvɨ ya̱ kúvi ráa te̱e naanꞌ, kuéntáꞌ nnoꞌo u̱vi̱ꞌ rá te̱e ya̱ nnuni̱ꞌin nu̱u̱nꞌ Moisés.
Tu̱ꞌun nu̱u̱nꞌ nɨ́ꞌɨ ya̱ tétíñú Pablo nu̱u̱nꞌ Timoteo
10Soo noꞌó, nnikɨnꞌ nú nku̱mí va̱ꞌa nú tu̱ꞌun xínéꞌénꞌ ni̱ꞌ,
na̱sa jiáꞌnu ni̱ꞌ ichi na̱a̱ꞌ,
ná kúvi ya̱ ñúꞌún iniꞌ ni̱ꞌ saꞌá ni̱ꞌ,
na̱sa kúneí iniꞌ ni̱ꞌ I̱toꞌoꞌ‑ó,
na̱sa íyó káꞌnú iniꞌ ni̱ꞌ,
na̱sa ñúnúunꞌ ni̱ꞌ ñɨvɨ jín Ndiosíꞌ,
jín na̱sa kúníꞌin ni̱ꞌ íñɨ́ ni̱ꞌ jín Cristo.
11Jee jíníꞌ nú na̱sa nito u̱ꞌvi̱ꞌ ñɨvɨ nuꞌuꞌ, jín rá tu̱nóꞌó nóꞌo ni̱ꞌ, sánikua̱ꞌ nkuvi jín nuꞌuꞌ rá ñuunꞌ Antioquía, Iconio jín Listra. Jee ñeꞌneꞌ iniꞌ ni̱ꞌ rá tu̱nóꞌó vá ya̱ nito u̱ꞌvi̱ꞌ ráa nuꞌuꞌ yukuán, soo I̱toꞌoꞌ‑ó nsi̱káku nuꞌuꞌ nu̱u̱nꞌ nɨꞌɨ ya̱ nnoꞌo ni̱ꞌ yukuán. 12Chi ya̱ nááꞌ ví nijia ya̱ koto u̱ꞌvi̱ꞌ ñɨvɨ nta̱ká rá ñɨvɨ ya̱ kuíni ráa kueꞌnu ráa ichi na̱a̱ꞌ sáni kuíni Ndiosíꞌ jie̱ꞌe̱ꞌ nika̱ꞌ yɨ́ꞌɨ́ ráa nu̱u̱nꞌ Cristo Jesús. 13Soo rá ñɨvɨ kánéꞌén ya̱ xínáꞌví ráa ñɨvɨ saꞌ víꞌí káꞌ saꞌá ráa rá mánasɨ́ nijia ka̱ꞌ. Jee xináꞌví ráa rá ñɨvɨ, jee suni xináꞌví ñɨvɨ ráa.
14Soo noꞌó, kuni̱ꞌin nú jín ya̱ nku̱tu̱ꞌvá nú, ya̱ jínúꞌ iniꞌ nú. Chi suvinú vá jíníꞌ nú iniꞌ rá ñɨvɨ ya̱ nxi̱néꞌénꞌ maa noꞌó. 15Chi ne̱ sáá lúlí nú, jee ya jíníꞌ nú Tu̱ꞌun Ndiosíꞌ níso nu̱u̱nꞌ Tutuꞌ Ííꞌ. Jee suvivá kuvi saꞌá‑a ya̱ kuꞌun kájí xi̱ni̱ꞌ nú na̱sa ki̱vɨ nú nu̱u̱nꞌ natavaꞌ Ndiosíꞌ yó nu̱u̱nꞌ kua̱chi‑ó nanitáꞌvíꞌ‑ó, jie̱ꞌe̱ꞌ ya̱ kuneí iniꞌ‑ó Cristo Jesús. 16Nɨꞌɨ Tutuꞌ Ííꞌ níso tu̱ꞌun nkene yuꞌú Ndiosíꞌ, jee íyótiñu tu̱ꞌun vá sáva xinéꞌénꞌ‑ó ya̱ nááꞌ,
jee sáva naxinákutíñú‑ó nu̱u̱nꞌ ñɨvɨ ya̱ sáꞌá niva̱ꞌa,
jee sáva nachuꞌun‑ó ichi na̱a̱ꞌ ñɨvɨ,
jee sáva sikújia‑ó ñɨvɨ kueꞌnu na̱a̱ꞌ ráa sáni kuíni Ndiosíꞌ.
17Sáva ɨɨn ñɨvɨ ya̱ yɨ́ꞌɨ́ naꞌá Ndiosíꞌ kujia iniꞌ‑i jee koo tu̱ꞌva‑a sáva saꞌá‑a nta̱ká tiñu váꞌa.
Currently Selected:
2 Timoteo 3: meh
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
