1 Timoteo 6

1Nta̱ká ñɨvɨ ya̱ kúvi musúꞌ, #6:1 Esclavo (musúꞌ ya̱ kéꞌen ñɨvɨ maa) ya̱ yɨ́ꞌɨ́ naꞌá ɨɨn i̱toꞌoꞌ, íyó ku̱ꞌvayuꞌú ráa ya̱ íyó saꞌá ñáꞌnú ráa nu̱u̱nꞌ i̱toꞌoꞌ ráa, sáva nkákuíyuꞌú ñɨvɨ kune̱ꞌyá ráa Ndiosíꞌ jín tu̱ꞌun re̱ꞌ ya̱ xínéꞌénꞌ‑ó. 2Jee rá musúꞌ, ya̱ íyó i̱toꞌoꞌ ráa, ya̱ ínúꞌ iniꞌ rává Cristo, ntu̱ví íyó núun ka̱ꞌ sáꞌá ñáꞌnú ráa nu̱u̱nꞌ i̱toꞌoꞌ ráa, jie̱ꞌe̱ꞌ ya̱ ñaniꞌ ráa ví rává. Soo íyó saꞌá va̱ꞌa ráa ka̱ꞌ tiñu, chi i̱toꞌoꞌ ráa ya̱ ni̱ꞌi̱nꞌ tiñu váꞌa vá, kúvi ñɨvɨ ínúꞌ iniꞌ rává Cristo, jee Ndiosíꞌ jín rá musúꞌ ñúnúunꞌ ráa rává. Xinéꞌénꞌ nú jee xiníꞌvɨ́ꞌ nú iniꞌ ñɨvɨ tu̱ꞌun yaꞌá.

Ná kúvi nijia ya̱ kúvi ya̱ kúká

3Ré néni ɨɨn ñɨvɨ xínéꞌénꞌ tu̱ꞌun íyó sɨ́ɨ́n, ya̱ ntu káꞌánꞌ nuún jín tu̱ꞌun na̱a̱ꞌ I̱toꞌoꞌ‑ó Jesús ya̱ kúvi Cristo, jee ya̱ ntu íyó na̱kua̱ꞌ xínéꞌénꞌ Ndiosíꞌ jie̱ꞌe̱ꞌ ichi na̱a̱ꞌ sáni kuíni Ndiosíꞌ ya̱ kaka‑ó, 4jee vi̱xi̱ꞌ ñɨvɨ vá, jee ntu̱náꞌ jiáku̱ꞌun iniꞌ‑i. Kúꞌvíꞌ xi̱ni̱ꞌ‑i níní káꞌánꞌ‑a jie̱ꞌe̱ꞌ rá kue̱ꞌe̱ꞌ tu̱ꞌun jee kantátúꞌun‑u,

jee nu̱u̱nꞌ yaꞌá va̱ji ya̱ sáꞌá úꞌvi iniꞌ ñɨvɨ,

jee kútíxín ráa,

jee kákuíyuꞌú ráa,

jee jiáni niva̱ꞌa iniꞌ ɨɨn inka ráa,

5jee máni xtáña̱ꞌán ɨɨn inka ráa,

chi maá ñɨvɨ ni̱ta antúníꞌ ví ráa,

chi ntu̱náꞌ jíníꞌ ráa ya̱ naáꞌ,

jee jiáni iniꞌ ráa, ya̱ retú kunikɨnꞌ ráa ichi Cristo jee kuvi ni̱ꞌi̱nꞌ víꞌí ráa si̱kɨ̱ꞌ ka̱ꞌ.

[Saꞌá sɨ́ɨ́n maánú nu̱u̱nꞌ ñɨvɨ íyó suꞌva.]

6Soo kuéntáꞌ ni̱ꞌi̱nꞌ víꞌí‑ó si̱kɨ̱ꞌ ka̱ꞌ kúvi ya̱ yɨ́tíñú‑ó nu̱u̱nꞌ ichi na̱a̱ꞌ Ndiosíꞌ, retú kuva̱ꞌa iniꞌ‑ó jín ya̱ kúmí‑ó. 7Chi ntu̱náꞌ váji jín‑ó ñɨ̱vɨ́ yaꞌá, jee ni ntu̱náꞌ kúvi kɨ̱ꞌɨ̱nꞌ jín‑ó. 8Soo retú íyó ya̱ yájíꞌ‑ó jín saꞌma ñúꞌún‑ó, jee jín rá yaꞌá kuva̱ꞌa iniꞌ‑ó. 9Soo rá ñɨvɨ ñúꞌún iniꞌ, ya̱ kukúká ráa, jee kininkava ráa nu̱u̱nꞌ ya̱ níyo kánéꞌén iniꞌ ráa, jín nu̱u̱nꞌ ya̱ níyo naanꞌ iniꞌ ráa, ya̱ kúvi máñáꞌ maáráa, ya̱ saꞌá kini ráa maáráa. Jee kininkava ráa nu̱u̱nꞌ ti̱vɨ́ ráa, jee sikɨ́naanꞌ ráa maáráa, ya̱ koo sɨ́ɨ́n ráa nu̱u̱nꞌ Ndiosíꞌ nɨ́ɨ́nkání. 10Yoꞌo nta̱ká [nu̱u̱nꞌ] ya̱ níváꞌa ví ya̱ ñúnúunꞌ xu̱ꞌún. Jee sava ñɨvɨ, ya̱ kuíni víꞌí ráa maa, nxi̱nóo ráa ichi Cristo ya̱ kúneí iniꞌ‑ó. Jee suꞌva nkenta xinóꞌo víꞌí ráa maáráa.

Sáꞌá va̱ꞌa‑ó fesáꞌ kunikɨnꞌ‑ó ichi Cristo ya̱ kúneí iniꞌ‑ó

11Soo noꞌó, te̱e yɨ́tíñú nu̱u̱nꞌ Ndiosíꞌ, ya̱chi̱ꞌ kuiyo nú chusává maánú nu̱u̱nꞌ nɨꞌɨ ya̱ níváꞌa yaꞌá. Jee kunikɨnꞌ ni̱ꞌin nú,

ya̱ kino̱o na̱a̱ꞌ nú,

ya̱ kunikɨnꞌ nú ichi na̱a̱ꞌ sáni kuíni Ndiosíꞌ,

ya̱ kuneí iniꞌ nú Cristo,

ya̱ kunu̱u̱nꞌ nú Ndiosíꞌ jín ñɨvɨ,

ya̱ kuni̱ꞌin nú ya̱ kuiñɨ ni̱ꞌin nú jín Cristo, #6:11 Áxí: ya̱ káꞌnú koo iniꞌ nú.

ya̱ koo másúꞌ iniꞌ nú.

12Núnasɨ́ nú saꞌá nú fesáꞌ kunikɨnꞌ va̱ꞌa nú Cristo, ya̱ kúneí iniꞌ‑ó, kuéntáꞌ ɨɨn te̱e síkɨ́ sáꞌá fesáꞌ. Jee kuꞌun iniꞌ nú, ya̱ taji Ndiosíꞌ ta̱ꞌvi̱ꞌ nu̱u̱nꞌ nú, ya̱ kutekuꞌ nú nɨ́ɨ́nkání jín re̱ꞌ, chi jie̱ꞌe̱ꞌ yaꞌá vá nkana re̱ꞌ noꞌó. Jee suni jie̱ꞌe̱ꞌ yaꞌá, njia̱ꞌayuꞌú va̱ꞌa nú, ya̱ kúneí iniꞌ nú Cristo, ichinúúnꞌ kue̱ꞌe̱ꞌ ñɨvɨ, ya̱ kuvi stúvi ráa maa. 13Tétíñú ni̱ꞌ noꞌó ichinúúnꞌ Ndiosíꞌ, ya̱ sáꞌá re̱ꞌ kutekuꞌ nɨꞌɨ ya̱ tékúꞌ, jín ichinúúnꞌ Cristo Jesús, ya̱ nsa̱náaꞌ va̱ꞌa re̱ꞌ ya̱ naáꞌ ichinúúnꞌ te̱e nísotíñú, naní Poncio Pilato. 14Jee ichinúúnꞌ ráa tétíñú ni̱ꞌ noꞌó, ya̱ sikúnkuvi va̱ꞌa nú tiñu nta̱túníꞌ ni̱ꞌ nu̱u̱nꞌ nú, sáva ntívɨ́ tiñu vá jee sáva nkúvi chikua̱chi ñɨvɨ maa, ne̱kua̱ꞌ niji tuku I̱toꞌoꞌ‑ó Jesús ya̱ kúvi Cristo. 15Jee saꞌá Ndiosíꞌ ya̱ nenta Cristo máá tiempúꞌ ñani Ndiosíꞌ.

Na̱ ka̱ꞌ netuꞌ ka̱ꞌ ví Ndiosíꞌ.

Métúꞌún re̱ꞌ vá tátúníꞌ nu̱u̱nꞌ nɨꞌɨ,

ya̱ nísotíñú re̱ꞌ #6:15 Kúvi re̱ꞌ rey nu̱u̱nꞌ nta̱ká rey. tátúníꞌ re̱ꞌ nu̱u̱nꞌ nta̱ká ráa ya̱ tátúníꞌ ráa nu̱u̱nꞌ rá ñuunꞌ,

jee I̱toꞌoꞌ nu̱u̱nꞌ ntáká rá i̱toꞌoꞌ ví re̱ꞌ.

16Métúꞌún re̱ꞌ vá íyó nɨ́ɨ́nkání jee sáꞌá re̱ꞌ ya̱ kutekuꞌ‑ó nɨ́ɨ́nkání.

Jee nééꞌ re̱ꞌ nu̱u̱nꞌ túúnꞌ ñuꞌunꞌ, ya̱ ni ɨɨn ntu kúvi kuyatin nu̱u̱nꞌ re̱ꞌ.

Jee ntiáꞌan kuniꞌ ni ɨɨn ñɨvɨ re̱ꞌ, ni ntu kúvi kune̱ꞌyá ráa re̱ꞌ.

Na̱ ka̱ꞌ koo ñáꞌnú re̱ꞌ ka̱ꞌ nu̱u̱nꞌ nɨꞌɨ nɨ́ɨ́nkání jee íyó fuersáꞌ ííꞌ re̱ꞌ ya̱ tátúníꞌ re̱ꞌ nu̱u̱nꞌ nɨꞌɨ nɨ́ɨ́nkání.

Suꞌva koo.

17Rá ñɨvɨ kúká ya̱ kúmí víꞌí nantíñú tiempúꞌ vitan, tetíñú nú ráa, ya̱ koto íyó vi̱xi̱ꞌ ráa, jee ya̱ koto jiáꞌa ráa tu̱neí iniꞌ ráa nu̱u̱nꞌ rá nantíñú kue̱ꞌe̱ꞌ yɨ́yáꞌvi, chi ntu̱ví kúun yoꞌo‑o jee ntu sukuáni chíneí‑i ráa. Chisaꞌ tatúníꞌ nú nu̱u̱nꞌ ráa, ya̱ ku̱ꞌva ráa tu̱neí iniꞌ ráa nu̱u̱nꞌ Ndiosíꞌ tékúꞌ, ya̱ kue̱ꞌe̱ꞌ víꞌí táji re̱ꞌ nu̱u̱nꞌ‑ó nɨꞌɨ nantíñú jíniñúꞌún‑ó, sáva kusɨ̱ɨ̱ꞌ iniꞌ‑ó jín‑i. 18Jee suni tatúníꞌ nú nu̱u̱nꞌ ráa, ya̱ saꞌá ráa ya̱ váꞌa, sáva kuvi kuéntáꞌ kúká ráa jín kue̱ꞌe̱ꞌ tiñu váꞌa sáꞌá ráa. Jee koo ma̱ni̱ꞌ iniꞌ ráa, ya̱ ɨɨn ni koo iniꞌ ráa ku̱ꞌva ráa ya̱ chineí ráa inka ñɨvɨ jín rá nantíñú ráa. 19Suꞌva chuꞌun va̱ꞌa ráa ya̱ váꞌa, ya̱ kino̱o kutú nɨ́ɨ́nkání tiempúꞌ ichinúúnꞌ, kuéntáꞌ íyó ɨɨn koo nu̱u̱nꞌ sámáꞌ va̱ꞌa ráa, ya̱ kino̱o kutú. Chuꞌun va̱ꞌa ráa ya̱ váꞌa suꞌva, sáva kuꞌun iniꞌ ráa ya̱ va̱ꞌa víꞌí ka̱ꞌ kutekuꞌ nijia ráa jín Cristo.

Tiñu nu̱u̱nꞌ nɨ́ꞌɨ njia̱ꞌa Pablo nu̱u̱nꞌ Timoteo

20Noꞌó, Timoteo, kumí váꞌa tiñu ya̱ ntaji Ndiosíꞌ nu̱u̱nꞌ nú. Chusává nú nu̱u̱nꞌ tu̱ꞌun nékáíyó káꞌánꞌ ñɨvɨ, ya̱ ntu íyó ñáꞌnú Ndiosíꞌ nu̱u̱nꞌ ráa, jín ya̱ núníꞌin nu̱u̱nꞌ tu̱ꞌun na̱a̱ꞌ Ndiosíꞌ, ya̱ káchíꞌ ráa nika̱ꞌ, ya̱ tu̱ꞌun níchí ví rá tu̱ꞌun vá. 21Íyó sava ñɨvɨ jiáꞌayuꞌú ráa nu̱u̱nꞌ rá tu̱ꞌun vá, jee nku̱sɨ́ɨ́n ráa nu̱u̱nꞌ ichi Cristo, ya̱ kúneí iniꞌ‑ó.

Na̱ ka̱ꞌ koo ma̱ni̱ꞌ iniꞌ Ndiosíꞌ ka̱ꞌ jín ránoꞌó.

Currently Selected:

1 Timoteo 6: meh

Highlight

Copy

Compare